Kigali-Rwanda

Mostly cloudy
21°C
 

Volleyball: Ikipe y’igihugu y’abagore yabuze itike yo kuzitabira All African Games

Yanditswe na NKOMEJE GUILLAUME

Ku ya 22-05-2019 saa 17:25:36

Kuva tariki 18 kugeza 25 Gicurasi 2019 i Kampala muri Uganda habereye imikino y’Akarere ka Gatanu muri Volleyball mu kiciro cy’abagore “2019 CAVB Zone V Championships”, ikipe y’u Rwanda yaje gusoreza ku mwanya wa 3 mu makipe 4 yari yitabiriye.

Muri iri rushanwa ryari rigamije gushaka itike yo kuzakina imikino ya “2019 All African Games” ikipe y’igihugu ya Kenya ni yo yaje kwegukana igikombe itsinze Uganda yari mu rugo amaseti 3-0 (25-20, 25-17 na 25-16).

Ikipe y’u Rwanda yaje gusoreza ku mwanya wa 3 nyuma y’uko yitwaye neza itsinda Ethiopie amaseti 3-0 (25-16, 25-11 na 25-19) ni mu mukino wabaye tariki 21 Gicurasi 2019.

Ikipe y’igihugu yari yajyanye intego yo kuzana itike y’iyi mikino ya All African Games 2019 yatangiye nabi kuko yatsinzwe na Kenya mu mukino wa mbere ku maseti 3-0 (25-10, 25-17 na 25-10).

Iyi kipe y’igihugu y’abagore itozwa na Mudahinyuka Christophe yongeye gutsindwa na Uganda mu mukino wa kabiri amaseti 3-1 (25-21, 21-25, 25-19 na 25-17).

Uko amakipe yakurikiranye

Ikipe ya Kenya yabaye iya mbere, ikurikirwa na Uganda, u Rwanda ku mwanya wa 3 naho Ethiopie isoreza ku mwanya wa nyuma wa 4.

Iyi kipe y’igihugu ya Kenya yisubizaga iki gikombe k’iri rushanwa idatsinzwe umukino n’umwe, ikaba yahise ikatisha itike yo kuzahagararira Akarere ka 5 mu mikino y’Afurika “All African Games 2019” izabera i Rabat muri Maroc kuva tariki 19 kugeza 31 Kanama 2019.

Mu mikino y’Afurika iheruka “All Africa Games 2015”, ikipe ya Misiri na Kenya ni zo zahagarariye aka karere ka 5. Mu makipe 12 yari yitabiriye ikipe ya Kenya ni yo yegukanye igikombe itsinze ku mukino wa nyuma ikipe ya Cameroun amaseti 3-1 (15-25, 25-14, 25-15 na 25-19).

Ubusanzwe amakipe 3 ya mbere mu irushanwa riheruka yabaga afite itike gusa uyu mwaka bisa n’ibyahindutse kuko Maroc yagaragaje ko ifite ikibazo cyo kwakira abantu benshi bituma amakipe atakibaye 12 nk’uko byari bisanzwe ahubwo aba 8 bivuze ko muri buri karere kazagenda ikipe imwe hanyuma hakiyongeraho ikipe ya Maroc izaba yakiriye irushanwa.

Ikipe y’u Rwanda yaherukaga mu mikino y’Akarere ka 5 muri 2017

Mu mikino y’Akarere ka 5 ikipe y’u Rwanda yaherukaga kwitabira ni iya 2017 “2017 CAVB Zone V Championships” yabereye i Nairobi muri Kenya kuva tariki 27 Nyakanga kugeza 04 Kanama 2017 nabwo ntiyitwaye neza kuko yabaye iya nyuma (4) inyuma ya Uganda (3), Misiri (2) na Kenya yabaye iya mbere. Iyi kipe yatozwaga na Nsengiyumva Jean Marie ikaba yari yongeye kwitabira imikino mpuzamahanga nyuma y’imyaka irindwi (2011) yari imaze yarahagaze.

Ikipe y’igihugu y’abagore yasoreje ku mwanya wa 3 mu mikino y’Akarere ka 5

Umwanditsi:

NKOMEJE GUILLAUME

Tanga Igitekerezo

Email yanyu ntigaragazwa ku rubuga. Amazina na Email ni ngombwa.