Kigali-Rwanda

Partly sunny
18°C
 

Volleyball: Harakinwa imikino y’ibanza y’irushanwa rya “Playoffs” mu bagore

Yanditswe na NKOMEJE GUILLAUME

Ku ya Jun 6, 2019

Uyu munsi

RRA VC-KVC (Amahoro-17h00)

UTB VC – APR VC (Amahoro-19h00)

Kuri uyu wa Kane tariki 06 Kamena 2019 harakinwa imikino ibanza y’irushanwa rihuza amakipe yabaye ane ya mbere muri shampiyona y’igihugu mu kiciro cy’abagore rizwi nka “Playoffs 2019” ry’uyu mwaka wa 2019.

Mu mikino ibiri iteganyijwe irimo uwo ikipe ya RRA VC yabaye iya mbere muri shampiyona n’amanota 46, ihuramo na KVC yasoreje ku mwanya wa 4 n’amanota 25, ubere kuri Sitade Nto i Remera (17h00).

Ni umukino ugiye guhuza amakipe yombi yagaragaje umukino mwiza muri shampiyona y’uyu mwaka wa 2019. Ikipe ya RRA VC ifite igikombe cya shampiyona iheruka ya 2018, mu mikino 14 yakinnye yabashije gutsindamo 13, itsindwa umukino umwe.

Ku rundi ruhande, ikipe ya KVC yo yatsinze imikino 9 mu mikino igera kuri 14 yabashije gukina.

Mu mukino wo kwishyura wa shampiyona uheruka guhuza aya makipe yombi, wabereye kuri Sitade Amahoro tariki 26 Gicurasi 2019, RRA VC yatsinze KVC amaseti 3-0 (25-15, 25-11 na 25-15).

Nyuma y’uyu mukino, ikipe ya APR VC yabaye iya kabiri muri shampiyona n’amanota 36 irakina na UTB VC yabaye iya 3 n’amanota 35, ukaba utangira saa moya z’umugoroba (19h00).

Nk’uko bitangazwa n’ishyirahamwe Nyarwanda ry’umukino wa Volleyball “FRVB”, ni uko imikino ya kabiri muri Playoffs, izakinwa tariki 09 Kamena 2019, ikazabera ku bibuga byo hanze ya Sitade Amahoro i Remera.

Aya makipe agomba gutanguranwa gutsinda imikino 2 y’ikinyuranyo, izikomeje zikazahura ku mukino wa nyuma aho ikipe izatwara igikombe igomba gutsinda imikino 2 y’ikinyuranyo.

Mu mwaka ushize wa 2018, RRA VC yari yasezereye KVC yaje gutwara igikombe itsinze APR VC yari yasezereye Ruhango VC imikino 2-0.  RRA VC yatsinze APR VC mu mukino wa nyuma ubanza, amaseti 3-1 naho uwo kwishyura wabaye tariki 16 Kamena 2018, RRA VC itsinda APR VC amaseti 3-2.

RRA VC irakina na KVC mu mukino ubanza w’irushanwa rya Playoffs 2019