Kigali-Rwanda

Mostly cloudy with showers
25°C
 

Volleyball: Hamenyekanye amakipe azakina “Playoffs 2018”

Yanditswe na NKOMEJE GUILLAUME

Ku ya 03-05-2018 saa 07:23:41

Nyuma y’uko hasojwe imikino ya shampiyona ya Volleyball ya 2018 y’ikiciro cya mbere mu bagabo, amakipe ane ya mbere ayobowe na Gisagara VC yakatishije itike yo kuzakina irushanwa rya kamarampaka “Playoffs 2018” rizatangira tariki 5 Gicurasi 2018.

Mu makipe azitabira iri rushawa ry’uyu mwaka wa 2018 ni Gisagara VC yabaye iya mbere n’amanota 44, REG VC ya kabiri n’amanota 39, UTB VC ya 3 na 37 ndetse na APR VC yabaye iya kane na 31.

Gisagara VC iyoboye urutonde izahura na APR VC mu mikino ya Playoffs

Amategeko agenga iri rushanwa avuga ko ikipe ya mbere ya Gisagara VC izahura n’iya 4 ari yo APR VC, REG VC ya 2 ikazahura na UTB VC ya 3. Ikindi ni uko aya makipe aba agomba guhura mu mikino ibiri ubanza n’uwo kwishyura, mu gihe amakipe yanganya insinzi bagakina umukino wa 3. Hanyuma izatsinze zikine imikino ibiri itsinze igatwara igikombe ndetse izatsinzwe zigakinira umwanya wa 3.

Mfashimana Adalbert, umunyamabanga mukuru w’ishyirahamwe ry’umukino wa Volleyball mu Rwanda “FRVB” yabwiye Imvaho Nshya ko nyuma y’iyi mikino ya shampiyona irangiye hari byinshi ibasigiye kandi babona bakwiye kwishimira.

Avuga ko muri iyi mikino irangiye yagaragaje ihangana rikomeye ku makipe ari muri shampiyona. Yagize ati Muri iyi mikino irangiye, twishimira ko hagaragaye ihangana rikomeye ku makipe ari muri shampiyona yacu,  ibi bigaragara cyane ku makipe 4 ya mbere”.

Icya kabiri bishimira nka FRVB, ni uko amakipe yagiye azamura urwego rw’imikinire ugereranyije n’uko yagiye atangira iyi shampiyona. Ati Icya kabiri twakwishimira, amakipe yatangiye agaragaza intege nke yagiye agaragaza kuzamura urwego rw’imikinire yayo. Ibi wabibona nko kuri KVC na UNIK VC aho muri iyi minsi wasangaga akina amaseti 5 n’amakipe 4 ya mbere”.

Mfashimana akomeza avuga ko ikindi bishimira ari uko n’iyi shampiyona igaragaramo abakinnyi benshi bakiri bato kandi bafite urwego rwiza ndetse bikaba bitanga ikizere ko ejo ari heza ku makipe makuru ndetse n’ikipe y’igihugu.

Uko andi makipe yasoje akurikirana ku rutonde, ku mwanya wa 5 hari Kirehe VC n’amanota 21, UNIK VC na 18, IPRC-East VC na 16, KVC na 5 iyanganya na IPRC-South VC ya 9 ari nayo ya nyuma.

Shampiyona ya 2017 yegukanywe n’ikipe ya Gisagara VC mu bagabo na RRA VC mu bagore.

Umwanditsi:

NKOMEJE GUILLAUME

Tanga Igitekerezo

Email yanyu ntigaragazwa ku rubuga. Amazina na Email ni ngombwa.