Kigali-Rwanda

Partly sunny
24°C
 

Volleyball: Gisagara VC yatangiye kwitegura irushanwa ryo kwibuka

Yanditswe na BIZIMANA ERIC

Ku ya 05-06-2018 saa 07:32:05
Gisagara VC yatangiye kwitegura irushanwa ryo kwibuka riri mu mpera z'iki cyumweru

Ikipe ya  Gisagara VC yatangiye umwiherero wo kwitegura irushanwa ryo kwibuka ku nshuro ya 24 Jenoside yakorewe Abatutsi mu 1994 rizaba  mu mpera z’iki cyumweru tariki 09-10 Kamena 2018.

Gisagara VC yatangiye kwitegura irushanwa ryo kwibuka riri mu mpera z’iki cyumweru

Uyu mwiherero watangiye ku wa Mbere tariki 04 Kamena 2018 saa kumi z’umugoroba (16h00) kuri Gymanase ya Gisagara uzarangire ku wa Gatanu tariki 8 Kamena 2018  mbere yo gufata urugendo berekeza mu mujyi wa Kigali  ahazabera iri rushanwa.

Umutoza wa Gisagara VC, Nyirimana Fidele agaragaza ko bafite intego yo kwegukana iri rushanwa kugira ngo bazamure morale izabafasha mu mukino ukomeye bafitanye na REG VC wo kwishyura muri “Playoffs 2018” uzaba tariki 16 Kamena 2018.

Nyirimana yagize ati Iri rushanwa rizadufasha kwitegura umukino dufitanye na REG VC. Turitsinze icya mbere bituma tuba ikipe ya mbere yubashywe mu karere kuko riba ririmo amakipe akomeye yose yo mu karere; ikindi bizanatwongerera imbagara tuzabashe gutsinda REG VC  mu mukino wo kwishyura wa Playoffs, ubundi dutware igikombe’’.

Umutoza wa Gisagara yemeza ko ari umwanya mwiza wo kumenyera ikibuga Sitade Amahoro i Remera gikunze kubagora, cyane ko abakurikiranira hafi bemeza ko Gisagara VC yitwara neza cyane mu rugo.

Ikipe ya Gisagara VC mu irushanwa ryo kwibuka riheruka muri 2017 yaviriyemo muri ¼ isezerewe na REG VC ku maseti 3-1 (25-23,26-24, 22-25 na 25-18). Iyi kipe ya REG VC ikaba yarageze ku mukino wa nyuma itsindwa na APR VC amaseti 3-2.

 

Umwanditsi:

BIZIMANA ERIC

Tanga Igitekerezo

Email yanyu ntigaragazwa ku rubuga. Amazina na Email ni ngombwa.