25°C , Partly sunny | Kigali-Rwanda

Volleyball: Gisagara VC na RRA VC zisubije igikombe cya shampiyona

Yanditswe na BUGINGO FIDELE

Ku ya Jun 18, 2018

Nyuma yo kwitwara neza mu mikino ya  “Playoffs 2018”, ikipe ya Gisagara VC mu bagabo na RRA VC mu bagore zegukanye igikombe cya shampiyona ya 2018. Izi kipe akaba ari nazo zari zifite iki gikombe cya shampiyona iheruka ya 2017.

Gisagara VC yegukanye igikombe cya shampiyona ya 2018

Mu kiciro cy’abagabo, Gisagara VC yatangiye umwaka yigaragaza nyuma yo kuzana abakinnyi bakomeye barimo abakinira ikipe y’igihugu nka Mukunzi Christophe usanzwe ari kapiteni w’ikipe y’igihugu, Dusabimana, Sibomana Placide  Madison ndetse na Ongom Ivan ukomoka muri Uganda.

Mu mikino ya “Playoffs 2018”, mu guhatanira umwanya wa mbere ikipe ya Gisagara VC yatsinze REG VC imikino 2-0. Umukino wa mbere wabereye i Gisagara, Gisagara VC yatsinze REG VC amaseti 3-1 naho uwo kwishyura wabaye tariki 16 Kamena 2018, Gisagara VC itsinda amaseti 3-0.

Ibi bikaba byahise bituma Gisagara VC yegukana igikombe cya shampiyona gisanze  icy’umwaka ushize wa 2017.

Guhatanira umwanya wa 3 hazakinwa undi mukino

Ubusanzwe amakipe 4 ya mbere ku rutonde rwa shampiyona ni yo akina “Playoffs” kugira ngo hamenyekane ikipe izegukana igikombe.  Gisagara VC yari yasoje ari iya mbere yasezereye APR VC yari yasoje ari iya 4 ku mikino 2-1 naho REG VC yari yabaye iya kabiri isezerera UTB VC ku mikino 2-0.

Hagati ya UTB VC na APR VC na zo zigomba guharanira umwanya wa 3. Umukino ubanza UTB VC yatsinze APR VC amaseti 3-1 naho umukino wa kabiri APR VC itsinda UTB VC amaseti 3-2. Nyuma yo kunganya umukino 1-1, izi kipe zizakina umukino wa 3 kuko ikipe igomba gutsida imikino 2. Uyu mukino uzaba tariki 30 Kamena 2018.

Mu bagore, RRA VC   yisubije igikombe

RRA VC nyuma yo gusezerera KVC yagombaga gukina na APR VC nayo yasezereye Ruhango VC. Umukino wa nyuma ubanza, RRA VC yatsinze APR VC amaseti 3-1 naho uwo kwishyura wabaye tariki 16 Kamena 2018, RRA VC itsinda APR VC amaseti 3-2. Nyuma yo gutsinda APR VC imikino 2-0, RRA VC yahise yegukana igikombe cya shampiyona ya 2018.

RRA VC nayo yisubije igikombe cya shampiyona mu kiciro cy’abagore

Mu guhatanira umwanya wa 3, KVC yatsinze Ruhango VC  umukino ubanza amaseti 3-0 naho uwo kwishyura Ruhango VC itsinda amaseti 3-2. Izi kipe zizongera gukina umukino wa 3 wa kamarampaka tariki 30 Kamena 2018.

Tariki 14-15 Nyakanga 2018 ni bwo hateganyijwe irushanwa rihuza amakipe 4 ya mbere “CARRE D’AS” ari nabwo ikipe ya Gisagara VC na RRA VC zizashyikirizwa igikombe cya shampiyona.