Volleyball: Gisagara VC irakira UTB VC mu mukino wa kabiri wa “Playoffs 2019”

Yanditswe na Nkomeje Guillaume

Ku ya 09-03-2019 saa 09:39:33
Mu mukino ubanza ubwo Gisagara VC yatsindiraga i Kigali UTB VC amaseti 3-1

Gisagara VC irakira UTB VC mu mukino wa kabiri w’irushanwa rihuza amakipe yabaye aya mbere muri shampiyona y’ikiciro cya mbere “FRVB Playoffs 2019” mu bagabo ubere i Gisagara (14h00).

Iyi kipe ya Gisagara VC yari yitwaye neza mu mukino wa mbere itsinda UTB VC amaseti 3 kuri 1 (23-25, 25-21, 26-24 na 25-22) wabereye kuri Sitade Amahoro i Remera tariki 15 Gashyantare 2019.

Gisagara VC iza kuba iri imbere y’abafana bayo irasabwa gutsinda uyu mukino kugira ngo yizere kugera ku mukino wa nyuma ushobora no kuyihesha kwisubiza igikombe cya shampiyona yatwaye mu myaka ibiri yikurikiranya (2017 na 2018).

Iyi kipe iri mu bihe byiza cyane ko iheruka no kwegukana igikombe k’irushanwa ry’Akarere ka 5 ry’amakipe “CAVB Zone V Men Club Championship 2019” nyuma y’uko yitwaye neza igatsinda REG VC ku mukino wa nyuma amaseti 3 kuri 1.

Ku ruhande rw’ikipe ya UTB VC itozwa na Nyirimana Fidele itari yagatsinzwe na Gisagara VC muri shampiyona y’uyu mwaka, ikeneye gutsinda uyu mukino bityo biyigumishe mu rugamba rwo guhatanira igikombe cya shampiyona.

Aganira n’Imvaho Nshya, Dusabimana Vincent, kapiteni wa Gisagara VC atangaza ko biteguye neza bitewe n’uko ufite byinshi usobanuye birimo ko nibaramuka bitwaye neza bibongerera amahirwe yo gutwara igikombe cya shampiyona.

Nyirimana Fidele, umutoza wa UTB VC nawe aremeza ko bameze neza nta mukinnyi ufite ikibazo kandi biteguye guhanganira insinzi nubwo bisa nk’ibigoye.

Mu wundi mukino, IPRC-Ngoma VC irakira REG VC i Ngoma (10h00). REG VC niramuka itsinze uyu mukino irahita ikatisha itike yo gukina umukino wa nyuma kuko yari yatsinze IPRC-Ngoma VC mu mukino wa mbere amaseti 3-0.

Mu gihe UTB VC na IPRC-Ngoma VC haramuka hagize ikipe itsinda uyu mukino wa kabiri, byasaba ko hazakinwa umukino wa 3 wazaba tariki 16 Werurwe 2019.

Mu mukino ubanza ubwo Gisagara VC yatsindiraga i Kigali UTB VC amaseti 3-1

Umwanditsi:

Nkomeje Guillaume

Tanga Igitekerezo

Email yanyu ntigaragazwa ku rubuga. Amazina na Email ni ngombwa.