Kigali-Rwanda

Mostly cloudy
20°C
 

Volleyball: Gisagara VC irakira REG VC ku munsi wa 6 wa shampiyona

Yanditswe na NKOMEJE GUILLAUME

Ku ya 05-01-2019 saa 09:08:28
Ubwo Gisagara VC yatsindaga REG VC mu mukino wa shampiyona ubanza

Uyu munsi tariki 05 Mutarama 2019, shampiyona y’igihugu ya Volleyball “Volleyball National League 2018-2019” y’ikiciro cya mbere mu bagabo, irakomeza hakinwa imikino  y’umunsi wa 6 ari nawo wa kabiri w’imikino yo kwishyura.

Mu mikino 5 iteganyijwe, utegerejwe n’abakunzi benshi ba Volleyball  naho ikipe ya Gisagara VC iyoboye urutonde rwa shampiyona by’agateganyo n’amanota 18 yakira REG VC ya kabiri na 17, ubere kuri Sitade Nto Amahoro  i Remera, saa kumi n’imwe z’umugoroba (17h00).

Ubwo Gisagara VC yatsindaga REG VC mu mukino wa shampiyona ubanza.

Gisagara VC igiye kwakira REG VC idafite Akumuntu Kavalo Patrick werekeje muri Jordania mu igeragezwa mu ikipe ya Al Awdeh Youth Club irasabwa gutsinda uyu mukino kugira ngo ikomeze kwizera kuguma ku mwanya wa mbere wa shampiyona.

Ku rundi ruhande, REG VC itozwa na Mugisha Benon nayo nta kosa igomba gukora kuko gutsinda Gisagara VC byayiha amahirwe yo guhita ifata umwanya wa mbere.

Mu mukino ubanza wa shampiyona wabereye kuri Sitade Nto Amahoro  i Remera tariki 17 Ugushyingo 2018, ikipe ya Gisagara VC yitwaye neza itsinda REG VC bigoranye amaseti 3 kuri 2 (23-25, 25-18, 25-22, 21-25 na 15-9).

Uyu mukino wa Gisagara VC na REG VC uraza kuba wabanjirijwe n’uza guhuza APR VC na Kirehe VC (15h00).

Mu yindi mikino iteganyijwe kubera muri IPRC-Karongi, IPRC-Karongi VC irakira IPRC-Ngoma VC (10h00), UTB VC ikine na IPRC- Ngoma VC (12h00) ndetse UTB VC ikine na IPRC-Karongi VC (14h00).

Abantu baza kureba iyi mikino ibera muri IPRC-Karongi barasusurutswa n’abahanzi  baribo Eric Senderi ndetse Bull Dogg.

Nk’uko bitangazwa n’ishyirahamwe ry’umukino wa Volleyball mu Rwanda “FRVB”, iyi mikino y’umunsi wa 6 wa shampiyona izasozwa n’uzahuza REG VC na APR VC, ukaba uzabera kuri Sitade Nto i Remera tariki 09 Mutarama 2019 (18h00).

Kugeza ubu, ikipe ya Gisagara VC yatwaye igikombe cya shampiyona iheruka ya 2017-2018  iracyayoboye urutonde by’agateganyo n’amanota 18 ikurikirwa na REG VC n’amanota 17, UTB VC ku mwanya wa 3 n’amanota 14, hakaza IPRC-Karongi VC ku mwanya wa 4 n’amanota 8 , IPRC-Ngoma VC n’amanota 7, APR VC n’amanota 5 naho Kirehe VC ni iya nyuma (7) n’amanota 3.

 

 

 

 

 

 

 

 

Umwanditsi:

NKOMEJE GUILLAUME

Tanga Igitekerezo

Email yanyu ntigaragazwa ku rubuga. Amazina na Email ni ngombwa.