Kigali-Rwanda

Mostly cloudy
26°C
 

Volleyball: Gisagara VC  irakira APR VC  mu mukino ubanza wa “Playoffs 2018”

Yanditswe na NKOMEJE GUILLAUME

Ku ya 05-05-2018 saa 08:57:06
Kapiteni wa APR VC, Mutabazi Yves (12) avuga ko biteguye kwitwara neza imbere ya Gisagara VC

Uyu munsi

Gisagara VC -APR VC (Gisagara-10h00)

REG VC – UTB VC (Amahoro-18h00)

Uyu munsi tariki 05 Gicurasi 2018, Gisagara VC irakira APR VC mu mukino ubanza w’irushanwa rya kamarampaka “Playoffs 2018” rihuza amakipe yabaye ane ya mbere muri shampiyona. Umukino urabera i Gisagara.

Kapiteni wa APR VC, Mutabazi Yves (12) avuga ko biteguye kwitwara neza imbere ya Gisagara VC

Gisagara VC   yasoje imikino ya shampiyona iyoboye  n’amanota 44 na ho  APR VC iba iya kane n’amanota 31. Ubwo aya makipe yombi yaherukaga guhura muri iri rushanwa riheruka mu 2017 “Playoffs 2017”, Gisagara VC yasezereye APR VC iyitsinze mu mikino 2-0.

Iyi Gisagara VC ifite igikombe cya shampiyona y’umwaka ushize, iherutse gutsinda APR VC mu mukino usoza shampiyona amaseti 3-1.

Umutoza mukuru wa Gisagara V,  Nyirimana yabwiye Imvaho Nshya ko uyu mukino bawiteguye neza kandi ko babizi neza ko APR VC ari ikipe nziza. Avuga ko intego yabo ari ugutwara igikombe. Yagize ati “Turasabwa gutsindira hano ndetse n’iy’i Kigali, icyo dushyize imbere ni ugutwara igikombe”.

Mutabazi Yves, Kapiteni wa APR VC na we avuga ko  biteguye neza ndetse bifitiye ikizere kinshi cyo kuza kwitwara neza imbere ya Gisagara VC.

Ati “Turiteguye, twakoraga imyitozo kabiri ku munsi, turashaka gukina bitandukanye n’uko twitwaye muri shampiyona aho twumvaga n’ubundi yaramaze kuba iya mbere, ikizere kirahari ”.

Mu wundi mukino ukomeye, REG VC yabaye iya 2 n’amanota 39 irakira UTB  VC ya 3 n’amanota 37, kuri Sitade Amahoro i Remera (18h00).

Nyuma y’iyi mikino, iya kabiri iteganyijwe kuzaba tariki 12 Gicurasi 2018. Aha ikipe igomba gutsinda imikino 2 kugira ngo ikomeze mu kiciro gikurikiraho, buri kipe nitsinda umukino umwe hazakinwa umukino wa 3 tariki 19 Gicurasi 2018.

 

Umwanditsi:

NKOMEJE GUILLAUME

Tanga Igitekerezo

Email yanyu ntigaragazwa ku rubuga. Amazina na Email ni ngombwa.