20°C , Partly cloudy | Kigali-Rwanda

Volleyball: Gisagara na REG zitwaye neza mu mukino ubanza wa “Playoffs 2018”

Yanditswe na NKOMEJE GUILLAUME

Ku ya 08-05-2018 saa 07:18:26
REG VC yitwaye neza itsinda UTB VC mu mukino wa mbere wa Playoffs

Gisagara VC ndetse na REG VC zitwaye neza zitsinda umukino ubanza w’irushanwa rya kamarampaka “Playoffs” rihuza amakipe yabaye ane ya mbere muri shampiyona ya Volleyball y’uyu mwaka wa 2018.

REG VC yitwaye neza itsinda UTB VC mu mukino wa mbere wa Playoffs

Iyi mikino yombi yabaye ku wa Gatandatu tariki 5 Gicurasi 2018, Gisagara VC yabaye iya mbere muri shampiyona yakiniraga imbere y’abafana bayo yaje gutsinda APR VC amaseti 3-0 (27-25, 25-15 na 27-25).

Ku rundi ruhande, REG VC yabaye iya 2 yatsinze UTB VC ya 3 amaseti 3-1 (25-19, 18-25,25-12 na 25-18).

Nyuma yo gutsinda iyi mikino ibanza ya “Playoffs”, Gisagara VC na REG VC zirasabwa gutsinda umukino wa kabiri  kugira ngo zikomeze ku mukino wa nyuma. Imikino iteganyijwe tariki 12 Gicurasi 2018.

Mu kiciro cy’abagore, shampiyona naho irimo kugana ku musozo. Mu mikino yabaye ku cyumweru tariki 6 Gicurasi 2018, RRA VC yatsinze IPRC-Kigali amaseti 3-0, KVC itsinda St Aloys 3-1, RRA VC itsinda KVC 3-0, St Aloys itsinda IPRC Kigali 3-2, APR VC itsinda St Joseph 3-0 ndetse APR VC itsinda Ruhango VC amaseti 3-1.

Kugeza ubu, RRA VC  irayoboye n’amanota 33, ikurikiwe na APR VC na 32, Ruhango VC (18), St Aloys (15), KVC (13), IPRC Kigali  (8) naho St Joseph ni iya nyuma n’inota 1.

 

 

 

 

 

 

Umwanditsi:

NKOMEJE GUILLAUME

Tanga Igitekerezo

Email yanyu ntigaragazwa ku rubuga. Amazina na Email ni ngombwa.