Volleyball: Gisagara na REG zageze ku mukino wa nyuma wa Playoffs 2019

Yanditswe na Nkomeje Guillaume

Ku ya 11-03-2019 saa 08:49:39
Gisagara VC yageze ku mukino wa nyuma wa Playoffs 2019 isezereye UTB VC

Ikipe ya Gisagara VC na REG VC zamaze kubona itike yo kuzakina umukino wa nyuma w’irushanwa rihuza amakipe yabaye aya mbere muri shampiyona y’ikiciro cya mbere mu bagabo “FRVB Playoffs 2019”.

Gisagara VC ifite igikombe cya shampiyona iheruka ya 2018 yageze ku mukino wa nyuma nyuma yo gutsinda UTB VC bigoranye mu mukino wa kabiri amaseti 3 kuri 2.

Muri uyu mukino wabereye i Gisagara, ikipe ya Gisagara VC yakiniraga imbere y’abafana bayo yatangiye nabi kuko yatsinzwe iseti ya mbere ku manota 25-23, itsindwa n’iya kabiri kuri 27-25.

Gisagara VC ibifashijwemo na Akumuntu Kavalo ndetse na Dusengimana Wicklif, yaje kugaruka mu mukino itsinda iseti ya 3 kuri 25-19, itsinda iya 4 kuri 25-14 ndetse n’iya kamarampaka (5) ku manota 15 kuri 12.

Iyi kipe ya Gisagara VC yari yitwaye neza mu mukino wa mbere itsinda UTB VC amaseti 3 kuri 1 (23-25, 25-21, 26-24 na 25-22), umukino wari wabereye kuri Sitade Amahoro i Remera tariki 15 Gashyantare 2019. Ibi bivuze ko Gisagara VC igeze ku mukino wa nyuma isezereye UTB VC iyitsinze imikino 2-0.

Ku rundi ruhande, REG VC nayo yageze ku mukino wa nyuma itsinze IPRC-Ngoma mu mukino wa kabiri amaseti 3-1 (25-18, 25-19, 22-25 na 25-22). Umukino wa mbere REG VC yari yatsinze IPRC Ngoma amaseti 3-0.

Gisagara VC yageze ku mukino wa nyuma wa Playoffs 2019 isezereye UTB VC

Umwanditsi:

Nkomeje Guillaume

Tanga Igitekerezo

Email yanyu ntigaragazwa ku rubuga. Amazina na Email ni ngombwa.