19°C , Mostly cloudy with thunderstorms | Kigali-Rwanda

Volleyball: Amakipe 9 ni yo azitabira irushanwa ribanziriza shampiyona mu bagore

Yanditswe na BUGINGO FIDELE

Ku ya 12-12-2019 saa 11:19:31
Ikipe ya UTB VC ubwo yegukanaga igikombe k'irushanwa ribanziriza shampiyona ya 2019

Amakipe 9 ni yo yemeje  ko azitabira  irushanwa ribanziriza shampiyona ryateguwe n’ikipe ya UTB VC  “UTB Volleyball Women Pre-Season Tournament 2019-2020”.

Iri rushanwa biteganyijwe ko rizabera i Kigali tariki 21 na 22 Ukuboza 2019. Aya makipe 9 yamaze kwemeza ko azitabira arimo ikipe ya UTB VC itegura iri rushanwa, RRA VC, Ruhango VC, APR VC, IPRC Huye VC, IPRC Kigali VC, KVC na  GS St Aloys VC.

Mu makipe azitabira kandi harimo ikipe y’igihugu ya Botswana yasabye kwitabira mu rwego rwo kwitegura imikino mpuzamahanga bazitabira.

Ikipe izitwara neza ikegukana iri rushanwa ribanziriza shampiyona izahabwa igikombe ndetse n’ibihumbi 300 by’amafaranga y’u Rwanda. Iya kabiri izahabwa ibihumbi 150 naho iya 3 ihabwe ibihumbi 100.

Iri rushanwa ni inshuro ya kabiri rigiye kuba kuko  iriheruka ryabaye tariki 12 na 13 Mutarama 2019 aho ryateguraga shampiyona ya 2019. Iri rushanwa ryari  ryitabiriwe n’amakipe  5 ari yo RRA VC, UTB VC, IPRC-Kigali VC, KVC na St Aloys VC. Ikipe ya UTB VC yari yatsinze RRA VC amaseti 3-0 (14-25, 22-25 na 22-25) mu mikino y’amajonjora yegukanye igikombe yigaranzuye   RRA VC iyitsinze  amaseti 3-2 (25-16,22-25,25-17,18-25 na 15-10).

Iyi kipe ya UTB VC yari ikinnye umwaka wa mbere  ni yo yanegukanye shampiyona  y’ikiciro cya mbere mu mwaka wa 2019.

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.