Kigali-Rwanda

Mostly cloudy
27°C
 

Volleyball: Amakipe 31 ni yo amaze kwemeza kuzitabira “Memorial Rutsindura 2018”

Yanditswe na NKOMEJE GUILLAUME

Ku ya Jun 22, 2018

Kuva tariki 23 kugeza 24 Kamena 2018 hateganyijwe irushanwa ryo kwibuka Rutsindura Alphonse wahoze ari umutoza wa Volleyball wazize Jenoside yakorewe Abatutsi mu 1994 “Memorial Rutsindura 2018” rizabera mu Karere ka Huye.

REG VC ni yo yegukanye igikombe k’irushanwa ryo kwibuka Rutsindura Alphonse mu bagabo mu mwaka ushize wa 2017

Iri rushanwa ngarukamwaka ryateguwe n’Iseminari nto ya Karubanda “PS Virgo Fidelis”, amakipe 31 yo mu byiciro bitandukanye ni yo amaze kwemeza kuzitabira ubwo rizaba rikinwa ku nshuro ya 16.

Irushanwa ry’uyu mwaka wa 2018, ryatumiwemo amakipe yose yo mu kiciro cy’abagabo n’abagore bakuru, amashuri yisumbuye, ikiciro rusange, (abatarengeje imyaka 17), abanza (abatarengeje imyaka 15) hamwe n’andi makipe atabarizwa muri shampiyona ndetse n’umukino wa Volleyball ikinirwa ku mucanga “Beach Volleyball”.

Amakipe 31 amaze kwemeza kuzitabira iri rushanwa

Amakipe 31 yemeje kwitabira iri rushanwa, mu kiciro cy’abagabo bakuru bakina shampiyona  hari APR VC, Kirehe VC, Gisagara VC, REG VC, UTB VC,  KVC, IPRC-South VC, Young Club de Goma. Mu bagore ni APR VC, RRA VC, Ruhango VC, St Aloys ndetse na KVC.

Mu mashuri yisumbuye (Abagabo) ni  LDN, PSVF Butare, GSOB, CXR, Marie Merci de Kibeho, St Joseph Kabgayi na IPRC-West. Ay’ikiciro rusange batarengeje imyaka 17 hari PSVF Butare, GSOB, CXR naho mu mashuri abanza (baterengeje imyaka 15) ni  EP Tumba, EP Butare Catholique, EP Matyazo na EP Simbi.

Ku rundi ruhande, amakipe adasanzwe akina shampiona hari Umucyo VC,  Foudre Fort VC, Drojuba VC na ASEVIF. Ni mu gihe hagitegerejwe amakipe azakina umukino wa Volleyball yo ku mucanga (Beach Volleyball).

Mu mwaka ushize wa 2017, REG VC ni yo yegukanye igikombe  k’iri rushanwa mu bagabo itsinze APR VC ku mukino wa nyuma amaseti 3-1 naho mu bagore gitwarwa na RRA VC itsinze APR VC amaseti 3-1.