Kigali-Rwanda

Mostly cloudy
21°C
 

Vita Club yageze ku mukino wa nyuma mu mikino y’Afurika

Yanditswe na Bugingo Fidèle

Ku ya 25-10-2018 saa 18:26:42
Emomo Eddy Ngoyi (5) watsinze ibitego 2 muri 4 Vita Club yatsinze Al-Masry

Ikipe ya AS Vita Club yo muri RDC nyuma yo gusezerera Al-Masry yo mu Misiri yageze ku mukino wa nyuma w’imikino y’Afurika y’amakipe yitwaye neza iwayo ‘Total CAF Confederation Cup 2018’.

Iyi kipe yitwaye neza mu mukino wa ½ wo kwishyura wabereye i Kinshasa tariki 24 Ukwakira 2018 itsinda Al-Masry ibitego 4-0 mu gihe mu mukino ubanza wabereye mu Misiri byari byarangiye ari 0-0.

Muri uyu mukino Emomo Eddy Ngoyi yatsinze ibitego 2, Jean-Marc Makusu Mundele atsinda igitego cya 3 naho icya kane gitsindwa na Mukoko Batezadio.

Vita Club ni ubwa mbere igeze ku mukino wa nyuma muri iki kiciro kuko yaherukaga muri iyi mikino muri 2010 aho yaviriyemo mu majonjora.

Ku rundi ruhande ikipe ya Raja Casablanca yo muri Maroc na yo yageze ku mukino wa nyuma isezereye ikipe ya Enyimba FC yo muri Nigeria ibitego 3-1 mu mikino yombi.

Iyi kipe ya Enyimba FC yasezereye Rayon Sports yo mu Rwanda muri ¼ yatsindiwe iwayo mu mukino ubanza igitego 1-0 naho mu mukino wa ½ wo kwishyura wabaye tariki 24 Ukwakira 2018, Raja Casablanca iyitsinda ibitego 2-1.

Raja Casablanca yaherukaga kugera ku mukino wa nyuma muri 2003 ari bwo bwari ubwa mbere ndetse inegukana iki gikombe itsinze Coton Sport Garoua ibitego 2-0.

Umukino wa nyuma ubanza uzahuza AS Vita Club na Raja Casablanca uzaba tariki 25 Ugushyingo 2018 ubere muri Maroc naho umukino wo kwishyura ubere i Kinshasa tariki 02 Ukuboza 2018.

Umwanditsi:

Bugingo Fidèle

Tanga Igitekerezo

Email yanyu ntigaragazwa ku rubuga. Amazina na Email ni ngombwa.