27°C , Partly sunny | Kigali-Rwanda

Uwize muri “Collège Fondation SINA Gérard (C.F.S.G)” ntagorwa n’ikizamini

Yanditswe na Ntawitonda Jean Claude

Ku ya 16-03-2020 saa 12:10:56
Abanyeshuri bakora ibizamini bya Leba batsinda bose

Rwiyemezamirimo SINA Gérard aratangaza ko amahirwe aboneka muri “Collège Fondation Sina Gérard (C.F.S.G)” arema ikizere mu banyeshuri ku buryo amasomo no gukora ibizamini bya Leta bitabagora.

Mu kiganiro Imvaho Nshya yagiranye na SINA Gérard yashimangiye ko bitewe n’uburyo biga babona ibyo bashyira mu ngiro, mu mwaka wa 2019 abanyeshuri 129 bize mu kiciro rusange (Tronc Commun) na 59 basozaga amashuri yisumbuye batsinze 100%.

Yagize ati: “Abanyeshuri bacu biga neza, ikibigaragaza ni uko umwaka wa 2019 batsinze 100%. Mu kiciro rusange harimo abana 120 batsinze bose, abarangiza ayisumbuye na bo bari 59% batsinda100%. Ikizamini ntikibagora, kandi abarangije muri Collège Fondation SINA Gérard bose bafite ubushobozi bwo kwihangira umurimo.”

Collège Fondation SINA Gérard ubu ifite amashami ikenda ari yo: Gutunganya Ibiribwa (Food Processing), Ubuhinzi (Agronomie), Ubuvuzi bw’Amatungo  (Veterinary), Gutunganya Imisatsi, Ubudozi, Ubwubatsi, Ububaji, Gusudira ndetse n’Ubukanishi.

SINA Gérard ati: “Ubuhinzi, Ubworozi, gutunganya ibikomoka ku buhinzi n’ubworozi, kubaka, gusudira, ubudozi, gutunganya imisatsi no gukanika byose tubifite mu nganda n’amateliye anyuranye babyigiramo ku buryo duhamya ko umwana urangije iwacu ajya ku isoko ry’umurimo yiyizeye kandi azi no kwihangira umurimo.”

Iri shuri ryashinzwe hagamijwe kuzamura ubuhinzi n’ubworozi  no gutegurira u Rwanda abagoronome, abaveterineri b’umwuga, n’abatekinisiye b’inzobere mu myuga inyuranye.

Rimaze kugira abanyeshuri bakabakaba 2,000 bose bitegura kuhakura ubumenyi buhambaye kuko abenshi biga  banimenyereza umwuga w’ubuhinzi, ubuvuzi bw’amatungo no gutunganya ibiribwa muri SINA Gérard/ESE URWIBUTSO.

Kuba abanyeshuri baba ahantu hakorerwa ubuhinzi bunyuranye bw’inkeri, Marakuja, Pomme, imizabibu, Macadamia,  n’ubworozi bw’inka, ihene, inkoko, ingurube, inkwavu  n’ibindi, ni amahirwe kuri bo kuko bibabera imfashanyigisho zituma ibyo biga babifata kurushaho.

Abiga muri  C.F.S.G bubakiwe Shapeli

Mu ntangiriro z’ukwezi kwa Kamena 2019, muri C.F.S.G hatashywe Shapeli yitiriwe Mutagatifu Gérard, yubatswe ku musozi wa Tare ifasha abanyeshuri kugira indangagaciro za Gikirisitu no kuba indakemwa mu mico no mu myifatire.

SINA Gérard anavuga ko muri C.F.S.G bigisha ku buntu abana b’u  Rwanda batishoboye barenga 600 mu mashuri y’inshuke n’abanza baturuka mu mpande zitandukanye z’Igihugu.

SINA Gérard yagize ati: “Mu rwego rwo kubashishikariza kwiga kugira ngo hadasigara n’umwe, mu mashuri y’inshuke n’abanza tugiramo abana 600 twishyurira amafaranga y’ishuri buri mwaka kugira ngo natwe twumve ko dufasha imfubyi, abana b’abapfakazi n’abatishoboye; ni ho dutegurira Umunyarwanda w’ejo hazaza kwinjira mu Kerekezo 2050 yemye.”

SINA Gérard arategura kubaka kaminuza

SINA Gérard avuga ko mu rwego rwo kujyana n’Ikerekezo 2050, ateganya gushinga kaminuza yigisha imyuga n’ubumenyi ngiro, hagamijwe ko abarangiza ayisumbuye bajya banaminuza mu myuga bize, muri Collège Fondation SINA Gérard.

SINA ati: “Muri 2050 dufite ikerekezo cyo kuba dufite kaminuza yigisha ubumenyi ngiro; ubu naheraga mu kiburamwaka nkageza muri segonderi, ariko ndateganya kugira kaminuza ijyanye n’ikifuzo cya Nyakubahwa Perezida wa Repubulika y’u Rwanda Paul Kagame cyo kubaka kaminuza nyishi mu gihugu zigisha ibijyanye n’ubumenyi ngiro.”

Uburezi, umusaruro wa SINA Gérard/ESE URWIBUTSO

Guteza imbere uburezi mu Rwanda ni imwe mu ntego za SINA Gérard/ESE URWIBUTSO, zigamije iterambere ry’Abanyarwanda n’Igihugu muri rusange binyuze mu buhinzi, ubworozi  ndetse no kongera umusaruro w’ibikomoka kuri ubwo buhinzi n’ubworozi.

Kuri ubu SINA Gérard/ESE URWIBUTSO itunganya ibicuruzwa bitandukanye bikunzwe mu Rwanda ndetse no ku rwego mpuzamahanga nk’urusenda rw’Akabanga, Agashya k’umutobe w’imbuto za Marakuja,  inkeri, inanasi, karoti n’imizabibu, amandazi y’Urwibutso, Divayi iva ku mizabibu ndetse n’inzoga iva ku bitoki yitwa  “Akarusho” , ibisuguti biva mu bijumba no mu ifarini y’ingano byitwa “Akarabo”, “yahurute” iva mu mata no mu nkeri yitwa “Akaryoshye”, ifu y’imvange z’ibihingwa binyuranye yitwa “Akanozo”,  “ketchup” izwi nka “Akiwacu”, confiture yitwa “Akacu” ndetse n’amazi yitwa “Akandi”.

SINA Gerard yahawe ibihembo by’ishimwe ku rwego rw’uturere, Intara, Igihugu, Afurika, Amerika, u Burayi n’ahandi, kubera uruhare agira mu guhindura imibereho y’abaturage benshi biganjemo abahinzi borozi, guteza imbere ibikorerwa mu Rwanda, ubuziranenge ndetse no kugira uruhare mu iterambere ry’Igihugu muri rusange.

Arashimira Leta y’u Rwanda yegereje ubuyobozi abaturage bikabaha ububasha bwo kugira uruhare mu gushyira mu bikorwa gahunda z’iterambere rirambye ry’Igihugu.

SINA Gérard ari kumwe na bamwe mu banyeshuri ba C.F.S.G

College Fondation Sina Gerard ni ishuri risurwa n’abantu benshi batandukanye

SINA Gérard ari kumwe na bamwe mu banyeshuri ba C.F.S.G

Shapeli yitiriwe Mutagatifu Gerard kugira ngo abanyeshuri bakomeze gutozwa indangagaciro zubukirisitu

Umwanditsi:

Ntawitonda Jean Claude

Tanga Igitekerezo

Email yanyu ntigaragazwa ku rubuga. Amazina na Email ni ngombwa.