17°C , Thunderstorms | Kigali-Rwanda

Uwitonze Fabiola, umugore witinyutse ukora akazi ko kuba ‘MC’ mu bukwe

Yanditswe na Uwimana Donatha

Ku ya 21-09-2019 saa 18:03:53
Uwitonze Fabiola ayoboye ubukwe, ibintu bitamenyerewe ku bagore

Uwitonze Fabiola wo mu Murenge wa Nyamabuye mu Karere ka Muhanga, ni umubyeyi wubatse, yaritinyutse akora akazi kadasanzwe kamenyerewe gukorwa n’abagabo aba umusangiza w’amagambo (MC) mu bukwe.

Avuga ko iki gitekerezo kimwe n’indi mishinga akora yabitekereje ubwo yari umurezi mu kigo kimwe cy’amashuri yisumbuye giherereye muri aka karere.

Mu kiganiro n’Imvaho Nshya yagize ati: “Naratekereje nsanga nakora ubu-MC. Ni bwo nagiye kubyiga, ntangira mfatanya n’abamenyereye. Ubu kugeza ubu ubukwe ndabuyobora genyine bugahumuza.”

Avuga ko aka kazi akora usanga abantu bamushima, na we akanezerwa. Ikimwemeza ko aba yakoze neza ni uko usanga abo bakoranye na we bagenda bakamurangira abandi bageni.

Uwitonze ubu amaze imyaka 2 akora ako kazi ko kuba umusangiza w’amagambo mu bukwe, gusa ngo yabanje gukorana n’abandi ubu akaba amaze umwaka umwe yikorana.

Asobanura ko agitangira ako kazi uwo bashakanye yabonaga asa nk’aho atazabishobora ariko ubu rwose ngo aramushyigikira cyane. Ku kijyanye n’igishoro, avuga ko bitamusabye igishoro kinini gusa ngo ni we wishakiraga amatike amujyana mu bukwe butandukanye.

Nubwo akora aka kazi agafatanyije n’indi mirimo, Uwitonze avuga ko ajya ahura n’imbogamizi, ati: “Imbogamizi ni ko hari abantu bavuga bati ntawayoborerwa ubukwe n’umugore abandi bakambona nk’umushirasoni nifuza rwose ko bamenya ko umuntu ari nk’undi ubundi kandi ko n’umugore ashoboye.”

Uwitonze Fabiola yifuza kumenyekana birenze aha ku buryo yumva afite intumbero y’uko yatera imbere akagera ku rwego rwo kuyobora ibirori mpuzamahanga ndetse n’inama zitandukanye.

Mu rwego rwo kwigira kandi biruseho yihangiye n’indi mirimo itandukanye irimo kuririmba, kubyina, gusiga abageni no gukora gato cyangwa imitsima.

Ku bijyanye no kuririmba, avuga ko yatangiye kuririmba kera akiri muto abyigishijwe na mama we. Ku myaka 12 ni bwo yatangiye kujya mu bukwe akajya aririmbira abageni.

Ati: “Nararirimbaga nabyina bakabikunda nange nkumva ngenda mbyishimira kurushaho ngeze mu mashuri yisumbuye ngana amatorero agatangira kujya anjyana kuririmba mu biraka bitandukanye nyuma yo kurangiza kwiga nagiye mu buzima bwo hanze mbona akazi k’uburezi nagakoze imyaka itanu nyuma nza kubona bitankundiye ndasezera kubera ko nari ngiye gukomeza amashuri. Ni bwo noneho kuririmba kwange nabigize akazi kugeza n’iyi saha. Ubu abageni barampamagara nkabaririmbira k’umunsi w’ubukwe bwabo.

Nyuma nabwo naje gutekereza no kuba nasiga abageni (Make up). Mu kubimenya nasuraga murandasi ndeberaho uburyo n’ibikoresho nakwifashisha kugira ngo mbinoze neza kuko kujya mu ishuri ryabyo nari narabiburiye uburyo, kugeza ubu iyo umugeni ansabye kumuririmbira angirira n’ikizere nkamusiga”.

Avuga ko agifite imbogamizi zo kuba atabasha guhaza abakiriya be ku rwego yifuza kuko hari nk’ibikoresho ngo akenera ntabibone bitewe n’ubushobozi.

Kankindi Gaudiose ushinzwe umurage ndangamuco n’umurage ndangamateka mu nteko Nyarwanda y’Ururimi n’umuco, RALC, mu kiganiro n’Imvaho Nshya aranenga abavuga ko kuba umugore yayobora ibirori ari uguta umuco. Asaba abavuga ibyo ko bagomba guhindura imyumvire bakumva ko umugore ashoboye.

Ati: “Kuba umugore yayobora ibirori si ikibazo, yavuga ijambo cyangwa yajya mu nzego z’ubuyobozi n’ibindi byinshi cyane si ikibazo. Akwiye gushaka amafaranga agateza imbere urugo rwe n’Igihugu. Kuba kera bitarakorwaga nta bwo wabigereranya n’ubu kuko umuco urakura hari ibigomba kuvamo n’ibisigara mu muco ndetse hakinjiramo n’ibindi”.

Asaba abagore kwiteza imbere mu buryo ubwo ari bwo bwose, binyuze mu buryo bwiza kuko umuco ugaragara mu nzego zose no mu kwiteza imbere binyuze mu muco ntibahejwe.

Ibyo byose ngo umugore aba akwiye kubikora ariko yiyubashye. Ati: “Umugore nta bwo yajya imbere y’abantu yambaye umwenda utubahitse, akwiye kuyobora ibirori yambaye neza.”

Kuba Umugore w’Umunyarwandakazi agenda yitunyuka, Kanakuze Jeanne D’arc, Perezidante w’impuzamiryango Pro Femmes Twese hamwe, avuga ko ari ukubera ko umugore yamenye uruhare rwe mu iterambere ry’umuryango no mu iterambere ry’Igihugu.

Umwanditsi:

Uwimana Donatha

Tanga Igitekerezo

Email yanyu ntigaragazwa ku rubuga. Amazina na Email ni ngombwa.