Kigali-Rwanda

Mostly cloudy
21°C
 

USAID yasoje ku mugaragaro umushinga PSDAG washyigikiraga ‘Made in Rwanda’

Yanditswe na NTAWITONDA JEAN CLAUDE

Ku ya 02-07-2019 saa 07:16:25
Ambasaderi wa Leta Zunze Ubumwe z’Amerika mu Rwanda, Peter Vrooman (uwa kabiri iburyo) ari kumwe na Melanie Bittle, Umuyobozi wa PSDAG basura ibyamuritswe byatewe inkunga na PSDAG

Umushinga ‘Private Sector Driven Agricultural Growth (PSDAG) waterwaga inkunga n’Ikigo cya Leta Zunze Ubumwe za Amerika gishinzwe Iterambere Mpuzamahanga (USAID) wasoje ibikorwa byawo.

PSDAG wari umushinga w’imyaka itanu wa miriyari 22.8 z’amadolari ya Amerika, wari ugamije kuzamura ishoramari mu buhinzi, kuzamura imibereho y’abaturage no gushyigikira ikerekezo cya Leta y’u Rwanda cya vision 2020 hazamurwa ubuhinzi ku rwego rusagurira amasoko.

Melanie Bittle, Umuyobozi wa PSDAG avuga ko uyu mushinga wubatse ubufatanye hagati y’abahinzi, abacuruzi, n’inganda unatera inkunga imishinga y’iby’ubuhinzi itandukanye mu Rwanda.

Abafatanyabikorwa b’uyu mushinga ni abahinzi borozi, abikorera, na sosiyete sivile.

Uyu mushinga wakoranye na leta y’u Rwanda ku mishinga itandukanye cyane cyane mu biganiro bigamije gukorana na sosiyete sivile.

Ubu bufatanye hagati ya PSDAG na Leta y’u Rwanda Melanie avuga ko bwazamuye ishoramari mu buhinzi mu Rwanda.

Ku bufatanye n’abashoramari 50 mu by’ubuhinzi, amakoperative 90 n’ibigo by’imari 6 PSDAG yafashije kuzamura : “ Ishoramari mu buhinzi n’ubworozi bwiyongereye kugera kuri miriyari 24.6 z’amafaranga y’u Rwanda, uzamura ibigurishwa mu gihugu no mu mahanga kugera kuri miriyari 63.8 z’amafaranga y’u Rwanda, ufasha abahinzi kubona inguzanyo igera kuri miriyari 23.7 z’amafaranga y’u Rwanda.”

Iyo ubukungu buteye imbere n’Abanyarwanda batera imbere

Ambasaderi wa Leta Zunze Ubumwe z’Amerika mu Rwanda, Peter Vrooman yashimye ibyo uyu mushinga wagezeho.

Yagize ati : “Uyu muhinga wa PSDAG wakoze ibikorwa byiza kandi byinshi ufatanyije n’amakopetarive ndetse n’abikorera.”

Yagarutse ku nkuru ya Nayino Mariya Mukarushema wo mu murenge wa Ndera Akarere ka Gasabo wavukanye ubumuga bwo kutavuga no kutumva bigatuma ahura n’imbogamizi nyinshi mu buzima zijyanye n’ivangura n’ihezwa mu myaka mike ishize ihezwa ryamubuzaga kubona akazi, bikamukomerera kwita ku bana be ariko mu mwaka wa 2017 yahawe akazi na Masaka Creamery itunganya ibijyanye n’amata.

Uru ruganda rwahawe na USAID inkunga ihwanye na miriyoni 250 z’amafaranga y’u Rwanda kugira ngo rugure amamashini no gushaka abakozi.

Amb. Peter Vrooman avuga ko kubera ako kazi yabonye umuryango wa Nayino umeze neza kuko umushahara we wakomeje kubafasha kwiteza imbere.

Yagize ati : “ Iyi nkuru ya Mariya yerekana impamvu USAID yateye inkunga amakoperative n’abashoramari batandukanye.”

Akomeza agira ati : “Iyo ubukungu buteye imbere n’Abanyarwanda batera imbere, agaciro kariyongera kandi bakagera ku nzozi zabo zikaba impamo.Ibindi bazafashwa n’indi mishinga dufatanyije irimo Hinga Weze.”

Ashimira abagize uruhare bose mu gutuma umushinga PSDAG ugera ku ntego zawo.

Hari abageze ku nzozi zabo

Mu isozwa ry’umushinga wari ugamije guteza imbere ishoramari mu buhinzi, umushinga wakozwe ku bufatanye bw’abaturage ba Amerika n’Abanyarwanda Nyirahategekimana Verediane, umuyobozi wa rumwe mu ruganda rukora imitobe akorera mu karere ka Kamonyi yavuze uburyo uyu mushinga wamufashije ukamutera inkunga z’imashini kuri 75% ku buryo ngo abasha gukora nta kibazo, agatanga n’akazi.

Ati : “Twageze ahantu tubasha kwigira ntabwo tuzahagarara gukora kandi tugerageza gukora neza tubasha guha urubyiruko akazi.”

Nduwayezu Leo, washinze ikompanyi itunganya ibikomoka kuri pulasitiki yavuze uburyo umushinga wa PSDAG wabateye inkunga kugira ngo babashe kubona amamashini, ubaha 50% by’amamashini bari bakeneye.

Uretse ibyo, ngo wabafashije kugira ubushobozi bwo kwegera amabanki kugira ngo babone inguzanyo yindi bari bakeneye.

Yagize ati : “Ubu nta kibazo dufite cyo gukorana n’amabanki urugero tugezeho banki iyo ari yo yose mu Rwanda yifuza kuba yatwegera tugakorana nayo.”

Akomeza yungamo ati : “Ikintu cya mbere badufashije ni uko twabonye amamashini y’ibanze twari dukeneye kugira ngo umushinga utangire.

Icya kabiri ni uko baduhaye ubushobozi bwo kugira ngo amabanki abashe kutwizera aduha amafaranga, ibyo twabigezeho ku buryo ubu ngubu mu bushobozi tugezeho amafaranga dukorera arahagije kugira ngo twigurire ibikoresho dukeneye kandi dufite n’ubushobozi bwo gukorana n’amabanki kugira ngo tube twabona inguzanyo dukeneye.”

Kugeza ubu yishimira ko bahaye abantu akazi bagera kuri 49.

PSF ishimira Leta y’u Rwanda guha umurongo abafatanyabikorwa b’iterambere

Nsengiyumva Francois, Perezida w’ihuriro ry’abahinzi n’aborozi mu rugaga rw’abikorera mu Rwanda yashimye ibyagezweho ku bufatanye n’uyu mushinga.

Yagize ati : “ Uyu mushinga waje muri gahunda y’ishoramari mu buhinzi. Tunashimira cyane leta y’u Rwanda ko ibasha guha umurongo abafatanyabikorwa b’iterambere abo rero nabo baje baje kugira ngo bafashe gutinyura abikorera mu gushora mu buhinzi.Uyu mushinga ushoje utinyuye abikorera mu gushora mu buhinzi.”

Akomeza agira ati : “Iyo urebye inguzanyo zijya mu buhinzi kugeza uyu munsi ntiziragera no 10% kuko hari bamwe bakeka ko batakunguka ariko iyo habonetse imishinga nk’iyi ngiyi iza igafasha abantu, ikereka abantu ko bishoboka icyo gihe bitangira gufungura abantu benshi cyane cyane ko iyo ushoye ifaranga 1 mu buhinzi amakeya ubona ni atatu.”

Avuga ko mu buhinzi n’ubworozi amafaranga ushyizemo waba uri leta cyangwa uwikorera bigira umuvuduko kuri 3.

Ati : “Icyo gihe rero nakangurira n’abacuruzi ko bose baza tugafatanya icya mbere cyo gushora mu buhinzi uretse kunguka bitanga n’akazi kenshi ku bantu benshi iyo ushoye mu buhinzi hari abantu bakora kubijyanye no kuzana inyongeramusaruro, hari abakora muri ubwo buhinzi nyir’izina, hari abazana imashini bakaguhingira.

Hari abaza bakaguterera, hari abaza bakagusarurira ndetse mu gucuruza umusaruro buri wese araza ukabona kakazi wakekaga ko ari gatoya kagize ikintu cyo kuzahura ubukungu bw’igihugu.”

Ibikorwa umushinga PSDAG wakoze byo gushyigikira abikorera bifasha kugera ku bitekerezo bigari by’igihugu

Umunyamabanga Uhoraho muri Minisiteri y’Ubuhinzi n’Ubworozi Musabyimana Jean Claude ashimira ibyagezweho n’uyu mushinga PSDAG, agashima uburyo bafatanyije.

Yagize ati : “By’umwihariko Minisiteri y’ubuhinzi n’ubworozi, tukaba dushaka gushimira abahagarariye igihugu cya Leta Zunze ubumwe z’Amerika mu Rwanda, abayobozi ba USAID mu Rwanda n’abandi bafatanyije kugira ngo uyu mushinga PSDAG ushobore gukora kandi ukabasha kugera kubyo wari wariyemeje.

Uyu munsi tukaba twishimira imyaka 5 y’ibikorwa bisize bishinze umusingi w’iterambere ry’urwego rw’abikorera cyane cyane ibikorwa bijyanye no guteza imbere ubuhinzi.”

Yakomeje agira ati “ Umushinga washoboye gukora byinshi byishimirwa n’abikorera. Tukaba twishimira ko ibikorwa umushinga PSDAG wakoze byo gushyigikira abikorera bidufasha kugera ku bitekerezo bigari by’igihugu gifite byaba gahunda y’imbaturabukungu 2020, yaba 2050 yaba gahunda ya Guverinoma y’imyaka 7.

Ndetse by’umwihariko twebwe nka Minisiteri y’Ubuhinzi n’Ubworozi biradufasha ku kugera kuri gahunda mbaturabukungu y’iterambere ry’ubuhinzi ikiciro cya 4 aho tuzashyira imbaraga nyinshi mu guteza imbere abikorera kugira ngo uruhare rwabo mu iterambere ry’ubuhinzi rugaragare cyane cyane ubuhinzi bugamije kutubonera amasoko ku banyarwanda n’isi yose, ibyo bakeneye haba ku ruganda mu bituruka mu ruganda, tukabibona mu bwinshi tukabibona no mu bwiza bwifuzwa n’iryo soko.”

Uretse ibi, avuga uyu mushinga wafashije by’umwihariko guteza imbere abikorera, cyane cyane kubona igishoro gikenewe kugira ngo imishinga yabo izahore itera imbere.

Byongeye kandi ngo uyu mushinga wafashije na none kongera ishoramari rijya mu buhinzi cyane cyane no kongerera ikizere inzego cyangwa se amabanki, amasosiyete y’ubwishingizi n’abandi kugira ngo ishoramari rishyirwa mu buhinzi rishobore kuboneka kandi ryiyongere.

Ati : “Ikindi kandi by’umwihariko twakoranye n’umushinga PSDAG cyane cyane mu kongerera ubushobozi bw’ishoramari dufatanyije haba ari MINAGRI ari ibigo dukorana nabyo RAB na NAEB ndetse no ku bufatanye n’izindi nzego kugira ngo abikorera bashobore kugira ubushobozi, kongera ubushobozi bwo kumva neza ndetse no gukora ishoramari rirambye.”

Avuga ko ubwo bufatanye bwatumye mu gihugu imirimo ishingiye kuri ibyo bikorwa yiyongera ku buryo imirimo irenga 1000 cyane cyane yabonywe n’urubyiruko.

Avuga ko ishoramari ryiyongereyeho miriyoni zisaga 50 z’Amadorari.

Yagize ati : “Byumwihariko PSDAG yadufashije gushyiraho urwego rwo kuganira n’abikorera hagamijwe gushakira ibisubizo ibibazo biba bigaragara mu rwego rw’ubuhinzi n’ubworozi tukabishaka dufatanyije haba inzego za leta ndetse n’abikorera.

Ibyo bikaba biri muri ya gahunda yacu twavugaga gahunda y’iterambere ry’ubuhinzi.”

Ngo hari n’imishinga myinshi mitoya n’iciriritse yafashije gushyira mu bikorwa gahunda ya Made in Rwanda, agashima ko myinshi mu mishinga iterwa inkunga na PSDAG yari imwe mu yamurikaga ibikorwa mu imurikabikorwa ry’ikoranabuhanga rya 14 ry’ubuhinzi n’ubworozi ku Mulindi.

Yizeza ko Minisiteri y’ubuhinzi n’ubworozi n’abafatanyabikorwa bayo bazakomeza gukora ibishoboka kugira ngo ibyagezweho n’umushinga PSDAG bikomeze gutera imbere, gufatanya n’abikorera kugira ngo urubuga rwashyizweho rw’ibiganiro rukomeze gutera imbere no gutanga umusaruro.

Yasabye ambasaderi uhagarariye igihugu cya Leta Zunze ubumwe za Amerika mu Rwanda ndetse n’uhagararye USAID mu Rwanda ko haboneka undi mushinga bakomezanya nawo kugira ngo ibikorwa byatangiye bikomeze.

Ambasaderi wa Leta Zunze Ubumwe z’Amerika mu Rwanda, Peter Vrooman (uwa kabiri iburyo) ari kumwe na Melanie Bittle, Umuyobozi wa PSDAG basura ibyamuritswe byatewe inkunga na PSDAG

 

Umwanditsi:

NTAWITONDA JEAN CLAUDE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.