24°C , Partly sunny | Kigali-Rwanda

Urwego rw’Umuvunyi rwasubije ibibazo byabajijwe n’Inteko Ishingamategeko

Yanditswe na RUTAYISIRE EMILE

Ku ya 07-02-2020 saa 06:57:56
Umuvunyi Mukuru Murekezi Anastase hagati y'Abavunyi bungirje atanga ibisobanuro ku bibazo by'Abadepite( Ifoto. Umuvunyi)

Ku butumire bw’Inteko Ishingamategeko,Umutwe w’Abadepite, Komisiyo ya Politiki, Uburinganire n’Ubwuzuzanye bw’Abagabo n’Abagore mu Iterambere ry’Igihugu, kuri uyu wa kane taliki ya 6 Gashyantare 2020, Komisiyo yagiranye ikiganiro n’Urwego rw’Umuvunyi ku bibazo byagaragaye muri raporo y’ibikorwa by’Urwego rw’Umuvunyi by’umwaka wa 2018-2019; aho Umuvunyi Mukuru yagize icyo avuga ku bibazo byabajijwe n’Abadepite.

Umuvunyi Mukuru, Anastase Murekezi yabwiye Abadepite bagize Komisiyo ya Politiki, Uburinganire n’Ubwuzuzanye bw’Abagabo n’Abagore mu Iterambere ry’Igihugu, ko bashimishwa cyane n’ubufatanye bw’Urwego rw’Umuvunyi n’Abadepite, Minisiteri y’Ubutegetsi bw’Igihugu n’izindi nzego mu kurwanya ruswa n’akarengane.

Abadepite babajije niba Abayobozi batandukanye bo mu Turere bazi cyangwa bubahiriza ibiri mu itegeko ngenga rigena imyitwarire y’abayobozi kuko Urwego rw’Umuvunyi rwabahuguye. Umuvunyi Mukuru, Anastase Murekezi yababwiye ko basanze hari abatazi ibyerekeye uburyo bwo kwakira no gutanga impano zitangwa mu rwego rw’akazi. Ibi bigatuma habaho kwitiranya impano bahabwa mu rwego rw’akazi cyangwa mu buzima busanzwe, kuba batazi ko akazi bakora katabangikanywa no kuba mu buyobozi bw’amashyirahamwe (NGOs) no kutamenya amasezerano batemerewe gukora ku giti cyabo ndetse no gupiganira amasoko ya Leta binyuze ku kigo afitemo imigabane.

Urwego rw’Umuvunyi rugasaba ko abayobozi bagomba kubahiriza icyo amategeko ateganya kuri izo ngingo cyane cyane abashya binjira mu kazi nabo bakihutira kumenya ibyo amategeko abemerera gukora n’ibyo ababuza.

Abadepite bifuje kumenya ubumenyi  abanyeshuri bo mu mashuri yisumbuye bafite kuri ruswa kuko bagiye bahabwa ibiganiro n’Urwego rw’Umuvunyi, ndetse bibaza niba nta byuho bagaragaza mu buzima babamo ku ishuri. Basubijwe ko babona mu bukangurambaga butangwa mu mashuri yisumbuye, bigaragara ko n’ubwo muri bo hari abazi ruswa, imyumvire y’abanyeshuri kuri ruswa ikiri hasi ku buryo ubukangurambaga buzakomeza kwitabwaho kuko n’Ubuyobozi bw’Ibigo bugaragaza ubushake mu kurwanya ruswa.

Umuvunyi Mukuru ati”Abanyeshuri n’ubwo nta byuho bagaragaza, ariko ibyuho bya ruswa birashoboka haba mu myigishirize no mu micungire y’umutungo w’Ikigo nka ruswa ishingiye ku gitsina, ku nyereza umutungon’ibindi”.

Abadepite bibajije impamvu Urwego rw’Umuvunyi rwahisemo guha ibiganiro mbwirwa ruhame abagize Urugaga rw’Abahesha b’Inkiko n’Urugaga rw’Abahanga mu by’Ubwubatsi muri gahunda yo gukumira no kurwanya ruswa n’ibyuho byaba bigaragara muri ibyo byiciro.

Umuvunyi Mukuru, Anastase Murekezi yababwiye ko mu gutoranya ibi byiciro hashingiwe kuri serivisi batanga bitewe na risks zaruswa zishobora kubamo( Ibituma muri iyo myuga habamo ruswa) n’ingaruka byagira ku mibereho y’abantu. Batoranyijwemo kandi ngo hashingiwe ku makuru avuga ibyuho bya ruswa muri ibi byiciro. Murekezi ati” Aha twavuga nka ruswa mu kurangiza imanza, ruswa mu igenagaciro n’ibindi”.

 

Muri gahunda yo kurwanya ruswa, Inama ngishwanama ku kurwanya ruswa n’akarengane ku nzego zose iriho, ikwiye kuba igira uruhare rugaragara ku buryo itanga umusaruro yitezweho.  Abadepite bibajije ari mpamvu ki Inama Ngishwanama ku kurwanya ruswa n’akarengane zidakemura ibibazo uko bikwiye hamwe na hamwe aho zikorera nko gukemura ibibazo by’ingurane.

Umuvunyi Mukuru yavuze ko Imikorere y’Inama Ngishwanama ku rwego rw’Akarere  yakunze kugaragaramo intege nke, ariko bitewe n’imbaraga zigenda zishyirwamo ku bufatanye bw’Urwego rw’Umuvunyi na MINALOC, imikorere yazo igenda ivugururwa zikaba zitezweho kuzatanga umusaruro ugaragara zishyiraho ingamba zihamye zo kurwanya ibibazo bya ruswa n’akarengane. Ikindi ngo n’uko muri raporo zitangwa n’izo Nama bigaragara ko ziga ku bibazo bitandukanye by’akarengane.

Mu gutangira ibiganiro, Honorable Depite Rubagumya Furaha Emma, Perezida wa komisiyo ya Politiki, Uburinganire n’Ubwuzuzanye bw’Abagabo n’Abagore mu Iterambere ry’Igihugu mu nteko ishinga amategeko, na bagenzi be muri Komisiyo bashimye raporo bagejejweho n’Urwego rw’Umuvunyi kandi ko banyuzwe n’ibisobanuro bahawe basaba ko aho bagiye bagaragaza imikorere igomba kunozwa nk’uburyo bwo gukoresha ikoranabuhanga  ku kurwanya ruswa n’akarengane ko babyakwihutishwa anavuga ko bazatanga raporo ku nteko rusange.

Perezida wa Komisiyo y’Abadepite baganiriye n’Urwego rw’Umuvunyi, Depite Rubagumya Furaha Emma hagati yumva ibisobanuro by’Umuvunyi Mukuru( Ifoto. Umuvunyi )

Umuvunyi Mukuru Murekezi Anastase n’Abavunyi bamwungirije, iburyo bwe n’ibumoso n’itsinda ry’abandi bayobozi bakorana bumva ibibazo by’Abadepite( Ifoto. Umuvunyi )

Umwanditsi:

RUTAYISIRE EMILE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.