25°C , Mostly cloudy | Kigali-Rwanda

Urugamba rwo gusubiza agaciro umwirabura nta kiciro kihariye kirurwana cyonyine–Musoni

Yanditswe na KAYITARE JEAN PAUL

Ku ya 27-05-2018 saa 10:59:55

Umuyobozi w’Ihuriro rigamije kwigenga kw’Afurika (Pan African Movement Rwanda), ishami ry’u Rwanda, Musoni Protais, avuga ko urugamba rw’agaciro k’Umunyafurika rukwiye kurwanwa na buri wese kandi ko nta kiciro kihariye cyarurwana cyonyine.

Musoni Protais asobanura ko agaciro k’umunyafurika gaharanirwa na buri wese (Foto Kayitare J. P)

Yagize ati “Urugamba rwo gusubiza agaciro umwirabura nta kiciro kihariye kirurwana cyonyine, ntiwavuga ngo ni abanyapolitiki bazayirwana bonyine, ntiwavuga ngo ni abikorera bazikorera bonyine, ntiwavuga ko ari abemera Imana mu buryo bwabo butandukanye bonyine, ni urugamba rugomba kurwanwa natwe twese kuko ni urugamba mbere na mbere rw’imyumvire, rw’imyemerere nk’umunyafurika, umwirabura afite uburenganzira nk’ubw’undi muntu wese, ubushobozi nk’ubw’undi wese akwiriye kwigirira ikizere, icyo kizere kikamuganisha ku gufatanya n’abandi”.

Musoni avuga ko abemera Imana bakwiye kugira uruhare mu kugira ngo Afurika ive mu bibazo irimo, ariko na none abayobozi b’imyemerere y’Imana bakifuza ko umunyafurika na we abaho neza kandi akabana neza n’undi munyafurika.

Musenyeri Rucyahana John wo mu Itorero ry’Angilikani avuga ko hari intambwe yatewe n’abanyamadini ariko ngo ntaho baragera kuko ari bo bagombye kuba barafashe iya mbere mu guharanira agaciro k’umunyafurika.

Ati “Abanyamadini ndabona twarateye intambwe kuko dufite umuryango w’abanyamadini uhuriweho n’amadini yose ubwo twateye intambwe ariko ntituragera aho tugomba kuba twarageze kuko iyo tuza kuba twarateye intambwe ikwiriye, tuba  twarafashe iya mbere mu kurwanirira agaciro k’Afurika n’ubwigenge bw’Afurika, iterambere ry’Afurika, ituze n’ubumwe bw’Afurika kuko byanditswe no mu nyigisho twigisha, ni twe tuba twarabifashe mbere ariko ikibazo dufite turimo turakurikira abanyapolitiki kandi ari twe twagombye kuba twarabitangiye mbere kuko n’inyigisho twigisha zibidutegeka kubikora ariko ikibidutera ni imyumvire”.

Sheihk Mbarushimana Sulaiman, umunyamabanga wa Mufuti w’u Rwanda, avuga ko abayobozi b’amadini bakwiye kwigisha ubumwe bw’abanyafurika.

Ati “Abayobozi b’amadini bakwiye kwigisha abayoboke babo kuko uruhare rwacu ni ukwigisha ubumwe bw’abanyafurika mu Rwanda ku buryo bw’umwihariko bakumva neza agaciro k’ubumwe bw’Abanyarwanda hanyuma bagakurikizaho agaciro k’Abanyafurika, barangiza bakatwigisha uko bikwiye nkuko Bibiliya na Korowani bibivuga”.

 

Umwanditsi:

KAYITARE JEAN PAUL

Tanga Igitekerezo

Email yanyu ntigaragazwa ku rubuga. Amazina na Email ni ngombwa.