27°C , Partly sunny | Kigali-Rwanda

Umutoza wa Miroplast FC nibatamuhembera abakinnyi azegura

Yanditswe na BIZIMANA ERIC

Ku ya 20-02-2018 saa 07:17:20
Muhire Hassan, umutoza wa Miroplast FC aratangaza ko abakinnyi be nibadahembwa ahita asezera ku mirimo ye

Umutoza wa Miroplast FC, Muhire Hassan aravuga ko nibirenza icyumweru batarahemba abakinnyi be azahita yegura ku mirimo ye.

Muhire Hassan, umutoza wa Miroplast FC aratangaza ko abakinnyi be nibadahembwa ahita asezera ku mirimo ye

Ibi yabitangaje  nyuma yo gutsindwa na Etincelles FC  ibitego 6-0 i Rubavu  bitewe n’ibibazo abakinnyi bari bafite byo guhembwa nabi. Aba bakinnyi bagiye mu minsi mikuru bafitiwe ukwezi  kw’ikirarane bataha babwiwe ko bazayabona  tariki  08 Mutarama 2018, hiyongeraho ukundi kwezi, bituma abakinnyi bamara ibyumweru bibiri barahagaritse imyitozo.

Muhire avuga ko gutsindwa ibi bitego byatewe n’ imyiteguro mibi aho abayobozi bari bemeye kubahemba tariki 12 Gashyantare 2018, ntibabyubahiriza, anahishura ko abakinnyi bemeye kuza gukina ari we ubinginze.

Ati « Ibyabaye ntakintunguye kirimo. Abakinnyi bamaze igihe bafite ibibazo kuko iyo umukinnyi amaze amezi atatu adahembwa burya biba bigoye ko yatanga umusaruro. Banze kuza gukina, biba ngombwa ko njya kwinginga buri mukinnyi iwe mu rugo, tuva i Kigali tuje i Gisenyi saa yine”.

Muhire anerekana ko gutakaza uyu mukino byanaturutse ku kuba atari afite abakinnyi batanu babanzamo hakaniyongeraho ibibazo by’abakinnyi bitsindishije bagaha Etincelles ibitego 5 muri bitandatu batsinzwe.

Umutoza wa Miroplast FC  avuga ko nibadahemba abakinnyi be nawe nta cyo yaba agikora. Ati :”Abakinnyi twari duhuje ibibazo (byo kudahembwa), ubuyobozi bwansabye ko nabavana mu rugo bakaza gukina, banyizeza ko muri iki cyumweru twinjiyemo bazahita babahemba, nange ndategereje ndebe, nibadakora ibyo biyemeje nange nta cyo naba mpari nkora”.

Imvaho Nshya yagerageje kuvugana na Nshimiyimana Alexis, Umunyamabanga Mukuru wa Miroplast FC  ntibyakunda.

Ibibazo by’imishahara biravugwa nyuma y’uko  tariki 07 Ukuboza 2017, Sibomana Jean Claude wari umuganga akanabivanga no kuba umucungamutungo w’iyi kipe yatorokanye miliyoni 3 zari imishahara y’abakinnyi aho kuyashyira kuri konti. Miroplast FC  ni ikipe yazamutse mu kiciro cya mbere muri uyu mwaka w’imikino.

Umwanditsi:

BIZIMANA ERIC

Tanga Igitekerezo

Email yanyu ntigaragazwa ku rubuga. Amazina na Email ni ngombwa.