20°C , Mostly cloudy | Kigali-Rwanda

Umutoza Karekezi yirukanwe muri Kiyovu

Yanditswe na BUGINGO FIDELE

Ku ya 02-05-2021 saa 20:37:21
Karekezi Olivier wamaze kwirukanwa muri Kiyovu

Uwari umutoza mukuru  w’ikipe ya Kiyovu, Karekezi Olivier nyuma y’amezi 7 yamaze gutandukana n’iyi kipe nyuma yo kugaragaza imyitwarire itari myiza ndetse n’umusaruro muke.

Kuri iki Cyumweru tariki 02 Gicurasi 2021 ni bwo ubuyobozi bw’iyi kipe bwatangaje ko bwamaze gusesa amasezerano n’uyu mutoza. Mu butumwa bwashyizweho umukono na Perezida w’iyi kipe ya Kiyovu, Mvukiyehe Juvenal  bugaragaza ko Karekezi yirukanwe kubera kurenga ku mategeko ngengamyitwarire y’ikipe n’amabwiriza ya FERWAFA  n’ay’igihugu yo kwirinda  ikwirakwizwa ry’icyorezo cya  COVID-19 ubwo yasohokaga  aho ikipe icumbitse atabiherewe uburenganzira ndetse anabura  mu myitozo y’ikipe  nta  mpamvu.

Karekezi yirukanwe nyuma y’aho iyi kipe ya Kiyovu itsindiwe na Rutsiro FC ibitego 2-1 mu mikino ya shampiyona ya 2020-2021 irimo gukinwa mu matsinda. Uyu mukino wabaye tariki 01 Gicurasi 2021. Kiyovu iri mu itsinda A hamwe na Rayon Sports, Gasogi United na Rutsiro FC.

Kuva mu Kwakira 2020, Karekezi Olivier yatoje ikipe ya Kiyovu imikino 4 atsindwa 3 atsinda umukino umwe.

Nyuma yo kwirukana umutoza Karekezi, ikipe ya Kiyovu igiye kuba itozwa na Banamwana Camarade na Kalisa François bari basanzwe ari abatoza bungirije. Aba batoza bakaba bazahera ku mukino wa Rayon Sports tariki 05 Gicurasi 2021.

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.