28°C , Mostly cloudy | Kigali-Rwanda

Umuntu wa 8 yishwe na COVID-19 mu Rwanda, hakize 46

Yanditswe na Imvaho Nshya

Ku ya 12-08-2020 saa 20:32:34

Kuri uyu wa Gatatu tariki ya 12 Kanama 2020, Minisiteri y’Ubuzima yatangaje umugabo w’imyaka 37 y’amavuko wishwe na COVID-19 mu Rwanda, akaba abaye uwa munani uhitanywe na cyo kuva muri Werurwe ubwo umurwayi wa mbere yatangazwaga.

Uwo mugabo akurikiye abandi babiri batangajwe mu mpera z’icyumweru gishize barimo umwe w’imyaka 77 watangajwe ku ya 9 Kanama n’undi w’imyaka 51 watangajwe tariki ya 8 Kanama 2020.

Icyo abo barwayi babuze ubuzima muri iyi minsi itatu bahuriyeho ni uko bombi ari abagabo bari batuye mu Mujyi wa Kigali.

Umurwayi wa gatanu wabuze ubuzima yari umubyeyi w’imyaka 88 y’amavuko wo mu Karere ka Nyamasheke watangajwe ku ya 18 Nyakanga, akurikiye umugabo w’imyaka 78 watangajwe tariki ya 11 Nyakanga 2020.

Uwa gatatu yari umusirikare mu Ngabo z’u Rwanda (RDF) wafatiwe mu mahanga ari mu Butumwa bwa Loni bwo kubungabunga amahoro,  uwa kabiri yari umupolisikazi Eunid Mbabazi w’imyaka 24 y’amavuko na we wanduriye mu Butumwa bwo kubungabunga amahoro, mu gihe uwa mbere we yari umushoferi w’imyaka 65.

Inkuru ibabaje y’urupfu rw’uwo mugabo w’i Kigali, rwatangajwe hamwe n’umubare w’abarwayi bashya 18 batahuwe mu bipimo 4,886 byafashwe mu masaha 24 ashize, hakaba hanatashye abantu 46 bakize neza.

Ibyo byatumye umubare w’abamaze gukira COVID-19 ugera ku 1,524  mu bantu 2,189 bamaze gutahurwaho icyo cyorezo mu Rwanda. Abakirimo kwitabwaho n’abaganga kuri ubu ni 657.

Abarwayi bashya barimo 15 b’i Kigali bahuye n’abanduye ndetse bapimwe mu bibasiwe kurusha abandi, babiri bo mu Karere ka Ngoma n’umwe wo mu Karere ka Rubavu, bose bakaba bahise bashyirwa kato aho bakomeje kwitabwaho n’abaganga.

Abaturarwanda barasabwa kurushaho kubahiriza amabwiriza yo kwirinda ikwirakwizwa ry’icyo cyorezo, ari yo gusiga intera ya metero, kwambara udupfukamunwa no gukaraba intoki kenshi bakoresheje amazi meza n’isabune cyangwa arukoro yabugenewe.

Imibare yatangajwe ku rwego mpuzamahanga yerekana ko muri Afurika abamaze kwandura COVID-19 barenze miriyoni imwe  irimo abarenga ibihumbi 760 bakize n’abandi barenga ibihumbi 23.8 bahitanywe na cyo. Abamaze kwandura ku Isi bararenga miriyoni 20.6, barimo abakize barenga miriyoni 13.5 n’abapfuye barenga ibihumbi 749.5.

Umwanditsi:

Imvaho Nshya

Tanga Igitekerezo

Email yanyu ntigaragazwa ku rubuga. Amazina na Email ni ngombwa.