21°C , Partly sunny | Kigali-Rwanda

Umujyi wa Kigali wasobanuye gahunda yo kuyobora amazi yangiza ibikorwa remezo

Yanditswe na Mutungirehe Samuel

Ku ya 29-12-2019 saa 16:07:03
Umuyobozi w'Umujyi wa Kigali Rubingisa Pudence asobanura uko bagiye guhangana no kuyobora amazi asenya ibikorwaremezo mu mugi (Foto Samuel M)

Umuyobozi w’Umujyi wa Kigali, Rubingisa Pudence, yatangaje ko bafite gahunda yo kuyobora amazi ava mu ngo no ku misozi akagera aho agomba kujya atangije ibikorwa remezo nk’imihanda, ruhurura n’inzu z’abaturage bitewe n’imiyoboro mito yagiye yubakwa.

Yabitangaje ubwo yagaragarizaga itangazamakuru gahunda ihari yo kuyobora amazi mu Mujyi wa Kigali, “Storm Water Managemet” hagamijwe guteganya ko igihe imvura yabaye nyinshi amazi menshi yabona aho aca atangije imiyoboro yateganyijwe n’ibindi bikorwa remezo byubatse.

Yavuze ko urebye muri rusange uko Umujyi wa Kigali ugenda utera imbere, haba mu mashanyarazi, amazi n’imihanda babona buri kintu cyose kigomba kongerwa cyangwa kwagurwa.

Akomeza agira ati “Umuhanda wari ufite imihanda ibiri urimo urakenera ine kubera ko turimo gutera imbere muri urwo rwego, amashanyarazi aho yari ari yewe n’amazi impombo ziyatwara zigenda zongerwa ugasanga ni ibikorwa remezo bya kera twari dufite ariko aho igihugu kigana cyangwa uko umugi ugenda utere imbere bimwe birasabwa kwiyongera.

N’iyo gahunda ya ‘Storm Water Management Plan’ iri muri gahunda; ngira ngo twahereye kuri iriya ya Nyabugogo aho yongerewe ukurikije uburemere bw’amazi amanuka.”

Yakomeje avuga ko usibye kongera za ruhurura amazi amanukiramo hari na gahunda yo kongera mu bugari imyenge (Biz) ica mu biraro cyangwa munsi y’imihanda ikabasha gusohora amazi menshi yihuta atuzuye ngo arenge ikiraro.

Ati “Ikindi ni uko na za Biz, ahakira amazi zigomba kongerwa; zigomba kongerwa kugira ngo uko amazi yinjiramo abe ahwanye n’ubushobozi bwo kuyakira, yose akaba ayoborwa mu bishanga. Ubwo harimo na za gahunda ya za ruhurura tugenda twubaka buri mwaka bikurikije n’ubushobozi dufite.

Ariko ibyo byose tukabihuza nanone na ya gahunda yo gukangurira abantu ngo ‘Witura ahantu hatemewe, wishyira inzu yawe ku mbago za ruhurura kandi uzi ko imvura ishobora kugwa ikagira ibyo yangiza, witura mu gishanga kubera impamvu izi n’izi. Iyo gahunda irahari, inyigo zirimo gukorwa ariko turayireba no mu buryo bwaguye bw’uko ibikorwa remezo tugomba kubyongera dukurikije n’uburyo umugi wacu ugenda utera imbere.”

Umuyobozi Mukuru w’Ikigo k’Igihugu gishinzwe kurengera ibidukikije, Eng. Ruhamya Coletta, yongeyeho ko abantu banagomba gukangurirwa gufata amazi ava ku nzu zabo, bikagira n’uruhare mu gukoresha amazi ataguzwe kandi ntiyangize ibikorwa by’umuturanyi wawe.

Minisitiri w’Ibikorwa Remezo Amb. Gatete Claver yavuze ko imvura iherutse kugwa ku ijoro rya Noheri, yaberetse ko bagomba gukora ibikorwa remezo mu buryo bugiye butandukanye.

Ati “Muri gahunda twari dufite, ndetse no muri gahunda yo kugira ngo turebe ukuntu twabungabunga iby’amazi no kuyayobora hano mu mugi, umushinga twari dufite wa Banki y’Isi twongeyemo icyo gice kijyanye nabyo. Hari gahunda twari dufite itunganya imigi, Umujyi wa Kigali n’imigi itandatu iwunganira, aho ngaho twabyongeyemo ndetse no ku bijyanye n’igice k’ibirunga hariya mu Mujyi wa Musanze aho amazi amanuka mu buryo budasanzwe.

Inyigo yarakozwe irarangira turimo turashaka andi mafaranga yiyongeraho ariko ubungubu hari n’ibikorwa by’ibanze byatangiriweho.”

Umujyi wa Kigali usanzwe kandi ufite gahunda yindi yo kuyobora no gutunganya amazi yakoreshejwe mu ngo, umushinga uzubakwa ku Giticyinyoni ahazashyirwa uruganda ruyakusanya rukayayungurura adakomeje kumenwa mu bishanga akangiza ibidukikije n’ibinyabuzima bibamo.

Umwanditsi:

Mutungirehe Samuel

Tanga Igitekerezo

Email yanyu ntigaragazwa ku rubuga. Amazina na Email ni ngombwa.