20°C , Partly cloudy | Kigali-Rwanda

Umujyi wa Kigali wahagurukiye abanywesha abana ibisindisha n’ababasambanya

Yanditswe na Ntawitonda Jean Claude

Ku ya 24-10-2019 saa 10:24:13
Bamwe mu bana bari munsi y'imyaka 18 bafatiwe mu tubari

Guhera tariki ya 20-30 Ukwakira 2019, Umujyi wa Kigali watangije ubukangurambaga bwo “Gukunda Igihugu” bwiganjemo ubutumwa bwo gukumira no kurwanya ibibazo bibangamiye iterambere ry’umwana birimo guhabwa ibiyobyabwenge, gusambanywa no gukoreshwa imirimo ivunanye.

Ubu bukangurambaga butangiye mu gihe Ubuyobozi bw’Umujyi wa Kigali ku bufatanye n’Inama y’Igihugu y’Abagore ku rwego rw’Umujyi wa Kigali, bukomeje ubufatanye mu kugenzura utubari, hakumirwa ko abana batagejeje ku myaka 18 y’amavuko bahabwa ibisindisha n’ibindi biyobyabwenge.

Ubuyobozi bw’Umujyi wa Kigali buvuga ko gukumira ibyo bibazo bibangamiye iterambere ry’umwana bizagabanya ibyago abana bahura na byo birimo gutwara inda kw’abangavu, gusarikwa n’ibiyobyabwenge ndetse no kugira abana b’u Rwanda bafite impagarike n’ubwenge bizima.

Ubukangurambaga bwatangijwe mu gihe raporo yatangajwe na Minisiteri y’Ubuzima guhera mu mwaka wa 2016 kugera 2018 yerekana ko mu Mujyi wa Kigali abangavu 7,219 batewe inda, na ho abana bakoreshejwe imirimo ivunanye mu mwaka wa 2016 na 2017 bakabakaba 1,314.

Umuyobozi w’Umujyi wa Kigali Rubingisa Pudence, yagize ati: “Kugira ngo u Rwanda rukomeze kubaho no gukataza mu iterambere rirambye, ryihuse kandi ritagira uwo riheza, ni ngombwa gukomeza umurage wo gukunda Igihugu. Icyumweru cyo kuzirikana ibikorwa byo gukunda Igihugu bizibanda cyane ku kwigisha urubyiruko kurwanya no gukumira ihohoterwa rikorerwa abana,”

Utubari dufatiwemo abana banywa inzoga turafungwa

Polisi y’u Rwanda ntihwema gushishikariza abacuruza inzoga kugenzura ibyangombwa by’abo binjiza mu tubari cyane cyane abo bakekaho kuba abana, ubirengaho agakurikiranwa n’amategeko kandi ako kabari kagafungwa.

Itegeko No 71/2018 rigaragaza ko umuntu ugurisha umwana inzoga cyangwa itabi, ubimushoramo cyangwa umushishikariza kubinywa cyangwa kujya mu tubari aba akoze icyaha.

Bamwe mu bakora ubucuruzi bw’akabari bavuga ko batemerera abana kunywa inzoga

Iyo abihamijwe n’urukiko, ahanishwa igifungo kitari munsi y’amezi atatu ariko kitageze ku mezi atandatu n’ihazabu y’amafaranga y’u Rwanda atari munsi y’ibihumbi ijana ariko atarenze ibihumbi magana abiri.

Umuvugizi wa Polisi y’u Rwanda John Bosco Kabera, yatangaje ko ba nyiri utubari mu Mujyi wa Kigali ndetse no mu gihugu hose bamenyeshejwe itegeko ribuza abantu guha abana inzoga ndetse no kubakoresha indi mirimo yo mu tubari.

Ati “Polisi y’u Rwanda ikomeje kongera imbaraga mu guhagarika icyo gikorwa cyangiza ahazaza h’abana b’u Rwanda, ndetse ufashwe anywesha umwana ibisindisha akurikiranwa n’amategeko.”

Habimana Alphonse Umuyobozi ushinzwe ibikorwa mu kabari Rio De Gikondo, gaherereye mu karere ka Kicukiro,  yavuze ko nta mwana bemerera kwinjira mu kabari atujuje imyaka y’ubukure kabone nubwo yaba agaragiwe n’ababyeyi cyangwa abamurera.

Yagize ati: “Nk’umubyeyi uretse kuba ndi umukozi muri aka kabari sinabona umwana winjiye hano ngo ndebere, kuko mbanza kumenya ikimuzanye cyangwa uwo bazanye isano bafitanye, bitaba ibyo bagakumirwa mbere y’uko bahabwa serivisi.”

Umubyeyi witwa Kayiranga Faustin wo muri uyu murenge wa Gikondo na we yagize ati: “Twese turerera u Rwanda ntibyanezeza nsanze umwana wange anywa inzoga mu kabari, kabone nubwo yaba afite imyaka 20.”

Aba bafashwe bashoye abana mu tubari muri uyu mwaka wa 2019

Abasambanya abana bararye bari menge 

Ubuyobozi bw’Umujyi wa Kigali butangaza ko abasambanya umwana bakurikiranwa n’amategeko byaba ngomba bakanahabwa igifungo cya burundu iyo bahamwe n’icyaha. 

Itegeko 68/2018 rigaragaza ko iyo gusambanya umwana byakurikiwe no kubana nk’umugabo n’umugore, igihano kiba igifungo cya burundu kidashobora kugabanywa kubera impamvu nyoroshyacyaha.

Uwasambanyije umwana iyo abihamijwe n’urukiko, ahanishwa igifungo kitari munsi y’imyaka 20 ariko kitarenze imyaka 25.  Iyo gusambanya umwana byakorewe ku mwana uri munsi y’imyaka 14, igihano kiba igifungo cya burundu kidashobora kugabanywa kubera impamvu nyoroshyacyaha.

Iyo gusambanya umwana ufite cyangwa urengeje imyaka 14 byamuteye indwara idakira cyangwa ubumuga, igihano kiba igifungo cya burundu.

Habimana Alphonse yavuze ko muri Rio De Gikondo nta mwana bemerera kwinjira mu kabari atujuje imyaka 18

Gukoresha abana imirimo ivunanye ni ukubangiza

 Imirimo ibujijwe ku bana irimo ivunanye ishobora na guhungabanya imimerere y’imibiri yabo n’ibindi bikoresho bishobora kugira ingaruka mbi, imirimo ikorwa amasaha menshi (abakozi bo mu rugo) cyangwa mu ijoro, n’ibindi.

Itegeko No 66 ryo ku wa 30/08/2018 rigenga umurimo mu Rwanda mu ngingo yaryo ya 117 riteganya ibyaha  n’ibihano byerekeye imirimo ibujijwe ku mwana uri mu nsi y’imyaka 18 y’amavuko.

Rivuga ko umukoresha ukoresheje umwana imwe mu mirimo ibujijwe ku mwana aba akoze icyaha, yaba abihamijwe n’itegeko agahanishwa igifungo kitari munsi y’imyaka ibiri ariko kitarenze imyaka itanu n’ihazabu y’amafaranga y’u Rwanda ari hagati y’ibihumbi 500 na miriyoni eshanu cyangwa kimwe muri ibyo bihano. 

Icyo ababyeyi basabwa

Visi Meya w’Umujyi ushinzwe Imibereho myiza n’Ubukungu Umutoni Gatsinzi Nadine, arasaba ababyeyi kubera abana urugero rwiza mu byo bakora byose, bubahiriza inshingano zabo, babatega amatwi, birinda amakimbirane, bakabaganiriza ku mihindagurikire y’imibiri yabo ndetse bakabatoza indangagaciro z’Umuco Nyarwanda kuko ari byo bibafasha gukurana uburere n’umuco utuma bavamo abagabo n’abagore bazima.

Akomeza asaba buri wese kutarebera umwana uhohoterwa cyangwa guhishira uwahohoteye umwana, no kudatererana umwangavu watewe inda. Ku bashora abana mu biyobyabwenge n’ababakoresha imirimo ivunanye, ngo amategeko ntazabihanganira.

Insanganyamatsiko y’ubukangurambaga iragira iti: “Gukunda Igihugu, Umurage wacu, Inkingi y’Iterambere rirambye.

Umwanditsi:

Ntawitonda Jean Claude

Tanga Igitekerezo

Email yanyu ntigaragazwa ku rubuga. Amazina na Email ni ngombwa.