Umuhanzi LIMU  yasohoye indirimbo ivuga bigwi by’Abarinzi b’igihango muri Kicukiro

Yanditswe na Imvaho Nshya

Ku ya 21-07-2021 saa 11:04:42

Umuhanzi Twizerimana Floduard ukoresha izina “LIMU”  mu buhanzi  yasohoye indirimbo yise “Icyomoro n’igihango” ivuga ibigwi by’abarinzi  b’igihango mu Karere ka Kicukiro.

Aganira n’Imvaho Nshya, LIMU avuga ko  iyi ndirimbo ikubiyemo ubutumwa buvuga ku  barinzi b’igihango bo muri aka Karere   barimo  n’abatoranijwe nk’Abarinzi b’igihango ku rwego rw’igihugu nk’uwitwa Mukankaka Rose.

Yagize ati : “Narayihanze ngira ngo  nshishikarize cyane cyane urubyiruko kurangwa n’ibikorwa byiza nk’ibyaranze izi ndakemwa natwe nk’urubyiruko  dukwiye kubigiraho byinshi tukubaka u Rwanda rw’ejo hazaza ruzira amacakubiri rw’uje ubumwe.”

Uyu muhanzi avuga ko  Abarinzi b’igihango ari abantu baranzwe n’ibikorwa by’indashyikirwa nko kuba bararokoye abantu mu gihe cya Jenoside yakorewe Abatutsi mu 1994 , usibye n’ibyo Abarinzi b’igihango ni abantu bahaye abandi icyizere cyo kubaho nyuma y’ibyo bihe bitoroshye banyuzemo.

Umuhanzi LIMU  aririmba indirimbo zitandukanye zivuga kuri gahunda za  Leta, kurwanya ibiyobyabwenge mu rubyiruko, kurwanya ihohoterwa rishingiye ku gitsina by’umwihariko kurwanya Inda ziterwa abangavu, iz’urukundo n’izindi zitandukanye.

Umuhanzi Twizerimana Floduard “LIMU”

Mu ndirimbo amaze gusohora harimo “Amarembo y’ u Rwanda”, “Dukomere ku gihango”, “Tora Paul Kagame”, “Uragiye” n’izindi zitandukanye.

Umuhanzi LIMU arasaba  urubyiruko bagenzi be ko  bakomera ku muco n’umurange w’u Rwanda  by’umwihariko  bagakomera ku isano y’Ubunyarwanda.  Anashimira kandi  Itangazamakuru uburyo ridahwema kubafasha kugeza ubutumwa bukubiye mu mpano zitandukanye Abanyarwanda bifitemo.

Uyu muhanzi aranashimira “Igihango Band” kuko bamufasha umunsi ku munsi kugira ngo akore ibihangano byiza binogeye amatwi akanashimira Abanyarwanda muri rusange by’umwihariko abitangiye u Rwanda batizigama kugira ngo rugere aho rugeze ubu.

Umwanditsi:

Imvaho Nshya

Tanga Igitekerezo

Email yanyu ntigaragazwa ku rubuga. Amazina na Email ni ngombwa.