17°C , Thunderstorms | Kigali-Rwanda

Uko Izere wigisha mu Ishuri ryo ku Nyundo yavumbuye impano yo gushushanya

Yanditswe na Tumukunde Georgine

Ku ya 20-09-2019 saa 06:51:59
Umunyabugeni Izere Annaise

Umunyabugeni Izere Annaise wo mu Murenge wa Nyundo mu Karere ka Rubavu, akaba anigisha ubugeni mu Ishuri ry’Ubugeni ryo ku Nyundo (Ecole d’Art de Nyundo), yasobanuye uko yavumbuye impano ye yo gushushanya, anakangurira abakobwa bagenzi be kudapfukirana impano zabo bakazikoresha mu kwiteza imbere.

Izere akora ubugeni bwo gushushanya, gusiga amarangi, no gukora imitako yifashishije imyenda, avuga ko ibijyanye no gushushanya yabikundaga kuva kera akiri muto, akajya abikora mu buryo busanzwe ariko atiyumvishaga ko ari impano afite ishobora no gukura ikamuteza imbere.

Mu kiganiro n’Imvaho Nshya, yagize ati: “Gushushanya nabitangiye kera nkiri mutoya, ibyo mbonye byose nkabyigana; niga mu mashuri abanza nakundaga gushushanya ikarita y’Afurika cyangwa iy’u Rwanda ngasigamo n’amabara […], nkumva ibyerekeranye n’ibishushanyo ndabikunze”.

Yakomeje asobanura uko yaje kuvumbura ko afite impano agira ati: “ Naje kuvumbura ko mfite impano niga mu kiciro rusange (Tronc Commun), abana twiganaga bambwiraga ko nakwiga ibijyanye n’ubwubatsi kuko babonaga ari byo bihuye n’ibyo nkora, nange numvaga ko amasomo y’Ubumenyi (Sciences) ntayashaka, sinari nzi ko hari ishuri ryigisha ubugeni, bamanitse urutonde rw’ibigo nibwo nabonye ko Ecole d’Art ihari”

Nubwo yari amaze kumenya ko ishuri rihari ariko yabanje kwitinya, abanza gushidikanya ku kemezo yari agiye gufata cyo kujya kwiga ubugeni. Yishimira ko umubyeyi we yamushyigikiye muri urwo rugendo agatinyuka.

Yagize ati: “Data yabimfashijemo ashaka amakuru ajyanye na ririya shuri, arambwira ngo ndihitemo numva arantunguye cyane kuko numvaga adashobora kubyemera, ashaka ko niga siyansi, ariko yarambwiye ngo abona nkunda ibintu byo gushushanya ni byo nagombye kwiga”.

Izere yatangiye kwiga ubugeni muri 2009 kugeza muri 2011. Ati: “Ntangira kwiga numvaga ndi ku rwego rwo hasi ariko nari mfite intego yo kumenya ibindi birenzeho, kuko numvaga mbikunze cyane kandi nkanatsinda”.

Yakomeje avuga ko ubwo bumenyi yari afite yirinze kubupfukirana ahubwo ashaka uko yabuteza imbere abifashijwemo n’Ishuri ryigisha ubugeni kandi yabigezeho kuko bwamubereye isoko y’iterambere, ubu amaze imyaka igera kuri 5 ari umwarimu wigisha ubugeni.

Umushahara abona umufasha kwigurira ibyo akenera mu buzima bwa buri munsi, yabashije no kunganira ababyeyi be bamwishyuriraga amafaranga y’ishuri yiga muri kaminuza mu Ishami ry’Inozamubano (Relations Publiques).

Ati: “Kwiga nkora byaramfashije, amafaranga nabonaga narayazigamaga nkayakoresha mu byo umunyeshuri wiga muri kaminuza akenera…Ntabwo wasaba ababyeyi buri kintu cyose”.

Aha ni ho ahera asaba abakobwa ko niba hari impano biyumvamo bagomba gukora ibishoboka ikajya ahagaragara bakayibyaza umusaruro, bagaharanira kwigira.

Izere ageze ku rwego rwo gushushanya yifashishije mudasobwa, ariko ngo icyo imufasha cyane ni ukwihutisha akazi kuko n’ibyo akoresheje intoki asanga binoze cyane.

Akurikije aho ageze ateza imbere impano ye, yagize ati: “Inzozi zange narazikabije”.

Kimwe mu bihangano bya Izere Annaise

Nyuma yo kwigisha, Izere hari indi mishinga akora

Izere avuga ko iyo atarimo kwigisha aba afite indi mishinga akora imuteza imbere. Ati: “Nkora inkuru zishushanyije, impapuro z’ubutumire, izo kwifurizanya iminsi mikuru myiza, karendari, imitako,…”

Agaruka ku ntego afite yagize ati: “Mfite intego yo gukomeza gutera imbere nkabeshwaho n’ubugeni, kandi nifashishije ubugeni ngatanga umusanzu wange mu kujijura abantu; nshobora gukora inkuru ishushanyije irimo ubutumwa igafasha abantu guhindura imyumvire”.

Ku bijyanye n’uko hari abavuga ko umwuga w’ubugeni nta mafaranga abonekamo yatunga umuntu, bisaba ko uwukora agira n’ikindi kintu akora, Izere avuga ko amafaranga aboneka, biterwa n’uburambe umuntu aba afite kandi akaba yaranateguye neza umushinga wamwinjiriza ifaranga.

Yagize ati: “Iyo ugitangira byo ntibiba byoroshye, ariko hashize igihe runaka ubirimo byagutunga byonyine, kuko hari ukuntu waba warabiteguye uvuga uti mu myaka iri imbere bizantunge byonyine”.

Avuga ko ikizitira abanyabugeni kugeza ubu ari uko ahenshi uretse no mu Rwanda, usanga ibihangano atari iby’ibanze umuntu akenera mu buzima; abikenera yageze ku rundi rwego rw’ubuzima, ibyo bikaba bigira ingaruka ku isoko ryabyo.

Agaragaza uko umunyabugeni yahangana n’icyo kibazo, yagize ati: “Ariko iyo ugerageje ugashakira mu bintu abantu bakenera cyane, ukagira uburyo ubikoramo nk’ibyo byo gutaka, iby’amaherena,… amafaranga wayabona”.

Izere avuga ko yakunze gushushanya kuva akiri muto

Yifuza ko hashyirwaho kaminuza yigisha ubugeni

Izere avuga ko nubwo yumva hari urwego yavuyeho n’urwo agezeho mu bugeni bitamubuza gukomeza kwihugura mu bindi biruseho, yifuza ko mu Rwanda hanajyaho kaminuza yigisha ubugeni kugira ngo ababwize barusheho kwiyungura ubumenyi.

Yakomeje agira ati: “Hari urwego nagezeho ku buryo nanafasha ubishaka kugira aho agera, ariko hari urundi rwego numva ntari nageraho numva nshaka kugeraho kandi nzabishobora kuko buri mwaka hari ibintu bishya byinshi niga mu bijyanye n’ubugeni, haba ari ukwigira kuri internet, kujya mu mamurikagurisha, cyangwa gusoma ibitabo, no kwigisha bituma nkora ubushakashatsi”.

Arasaba Leta ko yashyira ingufu mu guha agaciro ubugeni iyo kaminuza ikaba yajyaho.

Inama agira abandi bakobwa biga ubugeni

Izere w’imyaka 26, ni umwe mu bakobwa bahawe igihembo na Madamu Jeannette Kagame cy’uko yatsinze neza ibizamini bisoza amashuri yisumbiye, akaba ashishikariza abakobwa kwigirira ikizere kuko na bo bashoboye, by’umwihariko asaba abiga ubugeni kutitinya bakarebera kuri bagenzi babo bagize icyo bageraho.

Ati: “ Nange ngitangira ntabwo numvaga ko hari umuhungu narusha gushushanya, numvaga ko ari ibintu bigomba kuba bizwi n’abahungu gusa, ariko abo ndusha barahari[…], Itangazamukuru mwadufasha n’abandi bakobwa bari mu bugeni bakagaragara bakabera urugero rwiza abandi bakiri inyuma”.

Nubwo abakobwa bamaze kwinjira mu bugeni bataraba benshi ariko umubare ugenda wiyongera, ngo hari ikizere ko bazaba benshi. Akiga mu mashuri yisumbuye yiganye n’abakobwa umunani, abakabakaba 30 ari abahungu, mu myaka y’imbere ho harimo umukobwa umwe, ahandi nta n’umwe.

Ati:“Umubare ugenda wiyongera, aho nigisha ugenda wiyongera ntabwo ari nka mbere”.

Arakangurira abakobwa n’abagore bakora ubugeni guhuza imbaraga, bagakorera hamwe kugira ngo bateze umbere umwuga wabo.

Arasaba abantu baba bacyumva ko hari imirimo yagenewe abahungu gusa abakobwa bayikoze nta musaruro mwiza wavamo, guhindura imyumvire kuko abakobwa na bo iyo bayikoze barayinoza bikaba byiza.

Ati: “Hari aho bitarumvikana cyane ko umukobwa yakora ubugeni, n’umuhaye ikiraka aba yumva ko atabishobora ahubwo ajya gushaka ukimukorera, ariko iyo ugize ibyo ukora uwo waguhaye ikiraka akuri iruhande ahita abona ko ushoboye”.

Umunyabugeni Izere Annaise arahamagarira abakobwa kugaragaza impano n’ubushobozi bafite.

Umwanditsi:

Tumukunde Georgine

Tanga Igitekerezo

Email yanyu ntigaragazwa ku rubuga. Amazina na Email ni ngombwa.