27°C , Mostly cloudy | Kigali-Rwanda

Uburinganire ni ubuzima bwacu–Musenyeri Rucyahana

Yanditswe na KAYITARE JEAN PAUL

Ku ya 15-05-2018 saa 07:36:37
Musenyeri John Rucyahana umuyobozi w'Ihuriro ry'amadini n'amatorero

Umuyobozi w’ihuriro ry’amadini n’amatorero mu Rwanda, Bishop Rucyahana John, atangaza ko umugabo n’umugore mu muryango nyarwanda bafite uburenganzira bumwe kandi uburinganire bwabo bukwiye kuba ari bwo buzima bwabo. Anavuga kandi ko kuba Itegeko Nshinga kimwe n’amahame remezo by’u Rwanda bivuga ku buringanire, byagombye kubahirizwa.

Musenyeri John Rucyahana umuyobozi w’Ihuriro ry’amadini n’amatorero

Mu kiganiro kihariye n’Imvaho Nshya, Musenyeri Rucyahana yagize ati “Uburinganire ni ubuzima bwacu tugomba kugira aho umugabo n’umugore biyumva ko bafite amahirwe angana, bafite agaciro kangana, uburenganzira bungana, bubahana, bafatanya, basangira muri ako gaciro ku bumwe bwabo, noneho n’abana babo bakarerwa bazi ko umugabo n’umugore buzuzanya, ari bamwe bafite agaciro kangana nk’abantu bagize umuryango cyangwa bagize igihugu.”

Akomeza avuga ko Itegeko Nshinga, amahame remezo y’u Rwanda avuga uburinganire bw’umugabo n’umugore bikaba bivuze ko ubwo buringanire buhari kuko biri mu mategeko no mu Itegeko Nshinga. Ati “Ariko ntibiragenda neza mu ngiro kuko uko abagabo bafata abagore babo cyangwa uko abana b’abahungu bafata bashiki babo si cyo kimwe nkuko umugore afata umugabo cyangwa umukobwa afata musaza we.”

Musenyeri Rucyahana avuga ko iyo urebye ihohoterwa rikorerwa abagore n’abakobwa ari ryo ryinshi kuko ngo usanga abagabo ari bo bahohotera cyane kuruta uko abakobwa bahohotera basaza babo.

Avuga ko ibyo ari ibintu bizatwara igihe kirekire kubimaramo no kubirandura kuko biba byarafashe indi ntera, ikindi byaramenyerewe gukorwa. Ati “Ni ibintu ubona ko biba bisa n’ibyamenyerewe gukorwa kuko bidashyirwa hanze, bitavugwa, bidatandagazwa, gusa ikibi kigomba kuvugwa, ababikoze bagahanwa. Ibyo rero kugira ngo bicike, ni uko tuzashyiraho uburyo bwo kwigisha n’ubwo kugeza abantu mu bumenyi bw’uburinganire.”

Ku rundi ruhande, Musenyeri Rucyahana avuga ko icyo usanze mu itorero ari nacyo usanga mu muryango nyarwanda, kandi ngo n’icyo usanze mu muryango ni nacyo usanga mu itorero cyangwa mu idini.

Ati “Uburinganire bubaye mu itorero no mu muryango nyarwanda buba bwagezemo, iyo hanze bubuze ni ukuvuga ko na hahandi bajya gusengera buba butariyo kandi ni ko kuri kuko ibyo bavana mu rusengero ni byo bajyana mu miryango noneho n’ibyo bavana mu ngo ni na byo bajyana mu nsengero”.

Umwanditsi:

KAYITARE JEAN PAUL

Tanga Igitekerezo

Email yanyu ntigaragazwa ku rubuga. Amazina na Email ni ngombwa.