Ubuhamya bukomeye bwa Bavugamenshi wiciwe umugabo n’abana 6 muri Jenoside

Yanditswe na Mugisha Benigne

Ku ya 19-10-2019 saa 17:41:55
Uyu ni umukecuru Bavugamenshi (hagati) ushima ko Leta y'Ubumwe n'Ubuyobozi bwiza bwamukuye ahakomeye (Foto Mugisha B)

Bavugamenshi Verediyana ni umukecuru w’imyaka 61, mu gihe cya Jenoside yakorewe Abatutsi yiciwe umugabo n’abana bose yari yarabyaye uko ari 6.

Ashimira Perezida Kagame ko yamukijije akamuha n’inka imukamirwa, akanenga Leta ya Habyarimana yamumazeho urubyaro akaba asigaye wenyine.

Ibi bikubiye mu buhamya Bavugamenshi yatangiye mu karere ka Rusizi ubwo hatahwaga inzu y’impinganzima yatujwemo ababyeyi 40 b’Intwaza na we arimo.

Yagize ati “Ndashimira Perezida Kagame wampaye inka ikaba inkamirwa ubuzima bukaba bumeze neza. Leta ya Kagame yarankijije, yankuye ahakomeye.”

Uko Bavugamenshi yiciwe n’abo mu muryango we

Uyu mubyeyi utarahigwaga muri Jenoside, yari yarashatse umugabo wahigwaga, Umututsi, avuga ko ubwo Jenoside yatangiraga, umugabo we wari mu bahigwa baje bakamujyana mu gihe abandi bari batangiye gusahura mu nzu ye.

Ati “Umugabo baza kumujyana yari mu nzu, arambwira ngo ibintu byakomeye bagiye kumwica kuko ari Umututsi. Ubwo nasigaranye abana 6 twari twarabyaranye, sinongeye kumubona.”

Bavugamenshi avuga ko umugabo yamaze kwicwa ahita ajya kwa nyirasenge mu Murenge wa Nyakiriba, Akarere ka Rubavu ashoreye abana 6 yabyaranye n’umugabo we.

Agezeyo basaza be bahise bamusamira hejuru bamushimira ko abazaniye inzoka batarinze kujya kuzihiga, bamubwira ko nta kabuza babica kuko yemeye gushakana n’Umututsi.

Ati “Barambonye bambwira ko nemeye gushakana n’Umututsi none izo nzoka uzanye turaje tuzice tutarinze kuzihiga. Ntawakubwiye ngo usange Umututsi, nta bwo dushaka inzoka hano, wamushatse uri kumureba.”

Avuga ko ubwo yari ahetse umwana bahise bamukubita imihini n’udufuni, ari nako bahise bamushorerana n’abana kuri komini babashyira mu kizu kituzuye bakomeza kumukubitaramo bamwambura abana yari ashoreye ndetse n’uwari mu mugongo ntibamubabariye, ngo bose barabica, asigara aho ameze nk’uwapfuye.

Bavugamenshi avuga ko ubwo bazaga kumwicira abana, umwana mukuru yari umuhungu wari ufite imyaka 19 yahise anyerera ariruka asigarana abana batanu ariko na we ngo ntiyabayeho yaje kumenya ko na we bamwishe.

Avuga ko nyirasenge yagerageje kubinginga ngo ntibabice ahubwo ngo bavuge icyo bashaka, ariko interahamwe zo ziranga zivuga ko ntacyo zishaka uretse abo bana b’abatutsi bagomba kwicwa.

Nyuma yo kwicirwa abana agasigara ameze nk’uwapfuye, na we ngo nyirasenge yaje kumureba aho bamujyanye asanga yagaruye agatege amubwira ko hari umupadiri waje kumureba ngo age kumuvuza, amujyana kwa muganga aravurwa arakira asubira mu rugo kwa nyirasenge bakomeza kubana.

Uyu mukecuru avuga ko nyuma yo kumwicira abana mu maso ndetse n’umugabo wari wishwe mbere yabo ngo ntiyongeye gusinzira kuko yahoraga yibaza uko azabaho wenyine abana baramushizeho n’umugabo bakundanaga baramwishe.

Bavugamenshi avuga ko nyuma y’ibyo byose yakomeje kuba muri Nyakiriba nyuma aza kubona umugore uturutse muri AVEGA witwa Mariya Nyirabyera amujyana ku Karere bamugurira imyenda, bamuha  ibiryo n’ibindi byo kwikenura.

Avuga ko yakomeje kubaho afite agahinda kenshi kubera gupfusha abana be ndetse n’umugabo, yateka kurya bikamunanira, yakwireba akabona ari wenyine kandi yari yarigeze abana n’umugabo.

Ngo nyuma haje umukobwa na we ushinzwe ibya AVEGA ndetse haza n’uwo muri FARG bamujyana ahitwa Kanzenze baramwandika bakajya bamuha ibyo kurya, bakamwitaho nyuma yinjira mu Muryango wa AVEGA.

Bavugamenshi akomeza agira ati “Bampaye iradiyo ngo ige inganiriza ntazagira irungu, iradiyo koko iramfasha, nkomeza kubaho ngenyine ari nako mpabwa amafaranga n’ibyo kurya.”

Avuga ko yaje guhabwa inka ikajya imukamirwa amata y’inka akayagurisha akabika amafaranga, agahabwa n’andi akabaho neza, ariko ngo agakomeza kugira ikibazo kimwe cyo guhora atekereza abana be n’umugabo we bishwe bazira ko ari abatutsi.

Bavugamenshi ahamya ko ubuzima bwe bwose abukesha Perezida Kagame

Uyu mubyeyi avuga ko yatangiye kujya ahingisha isambu ye akoresheje amafaranga yahabwaga muri FARG ubuzima burakomeza. Ati “Inka yange narayirebaga, nkivuga Kagame wayimpaye, ngakamirwa amata, nkabaho neza, abari barandiriye inka bikoza ay’ubusa kuko nongeye kubona indi.”

Bavugamenshi aha ni ho ahera avuga ko Leta ya Kagame yamukijije, ikamukura ahakomeye ubwo yari apfuye nabi anuka kandi ari inshike yigunze.

Ati “U Rwanda rwa Habyarimana rwaranyishe rurasubira ruranyica, rungira inshike, runyambura umugabo wange twakundanaga rungira umupfakazi, umugabo wange twarakundanaga we.”

Yongeraho ati “Paul Kagame na Madamu we Jeannette ni bo bangejeje aha, ni bo banyitayeho kugeza bangejeje mu mpinganzima, ubu mfashwe neza, meze neza, nta cyo mbuze uretse abana bange bishwe.”

Avuga ko ubu afite abana bamufata neza, baramufurira, bakamusasira, kimwe na bagenzi be bari kumwe mu mpinganzima bameze neza, ngo kandi bakiri mu miryango yabo bari babayeho nabi.

Bavugamenshi ati “Umubyeyi Paul Kagame ni mwene nyina wa Yesu, Yesu yaragiye akorera muri Kagame uretse ko yabuze umwuka wo gukora abantu ariko yakijije benshi”.

Uyu mukecuru avuga ko icyo amushimira ari uko iyo hagize uwishyira hejuru Kagame ngo aramubwira ati “Ca bugufi ubane n’abandi amahoro.” Ashimira cyane  Madamu Jeannette Kagame watekereje ku babyeyi b’Intwaza akabubakira inzu z’impinganzima bakaba bariho neza kandi bishimye.

Ati “Ababasha kugera kuri uyu mubyeyi bamubwire ko Verediyana amushima cyane, amushimira aho yamukuye, amushimira ibyiza yamukoreye kimwe n’abandi babyeyi b’Intwaza, kuri ubu babayeho neza kandi turabasabira kuzahoza amata ku ruhimbi, guhora ishya n’ihirwe no gukomeza kuragira u Rwanda nk’igihugu kiza cyacu twese.”

Bavugamenshi ashimira inzego zose z’ubuyobozi zikomeje kubaba hafi, ngo yishimira ko agira n’igihe cyo gukora siporo kugeza ubu akaba atarahinamirana n’ubwo ari umukecuru.

Umwanditsi:

Mugisha Benigne

Tanga Igitekerezo

Email yanyu ntigaragazwa ku rubuga. Amazina na Email ni ngombwa.