25°C , Partly sunny | Kigali-Rwanda

U Rwanda rwungutse internet ya CANALBOX inyaruka bidasanzwe

Yanditswe na Rutayisire Emile

Ku ya 23-03-2020 saa 09:51:37
Umuyobozi wa GVA RWANDA Marco DE ASSIS

Sosiyete Group Vivendi Africa-Rwanda (GVA-Rwanda) yatangije ibikorwa byayo byo kugeza ku baturarwanda internet y’akataraboneka izwi ku izina rya CANALBOX, ikaba inyaruka bidasanzwe ndetse iri no ku giciro gito cyane ugereranyije n’iby’ahandi.

Internet ya CANALBOX yatangijwe ku mugaragaro tariki ya 13 Weruwe 2020, ikaba yaratangiye gushyirwa mu ngo z’abantu ndetse no mu bigo n’amasosiyete akoresha ikoranabuhanga hakoreshejwe imigozi (réseau de fibre/FTTH) izazenguruka Umujyi wa Kigali wose.

GVA Rwanda irizeza abakiriya bayo ko iyo internet igezweho kandi yizewe ku rwego mpuzamahanga ku muvuduko wayo no kuba idacika bya hato na hato.

Inzego zitandukanye zitabiriye Umuhango wo gutangiza CANALBOX

Abakiriya ba CANALBOX bashobora guhitamo ifatabuguzi rya internet bitewe n’amahitamo yabo :

• Hari ifatabuguzi ryitwa « START » : Uhabwa internet ingana na Mbps (megabits per second) 10 yihuta kandi idashira mu gihe cy’ukwezi rikishyurwa amafaranga y’u Rwanda 25.000. Umuryango wose ushobora gufungura no kumanura (download) amafirime arimo n’ay’uruhererekane, bakajya ku mbuga nkoranyambaga, guhanahana amafoto na video hagati yabo n’inshuti. Gukorera mu rugo biroroha hamwe no kohereza amakuru ntacyo wikanga.

• Hari n’irya «PREMIUM »: rigura amafaranga y’u Rwanda 40.000 buri kwezi ukabona internet ya mbere yihuta ingana na Mbps 50, ukaba ari umuvuduko wa internet udasanzwe ubona mu gihe cy’ukwezi kose.

Ushobora kurahurira imashini 15 zigakorerwaho zifite internet inyaruka, ukareba ibyo ushaka byoroshye nka video zifunguka vuba cyane, gukora inama ukoresheje video (videoconference) ndetse no kujya ku mikino ya video (video games) n’ibindi.

Utangiye gukoresha CANALBOX wese agomba kugura dekoderi y’amafaranga 40.000, noneho ay’ifatabuguzi akaba ari yo atanga buri kwezi. Urugero ushaka PREMIUM yishyurira rimwe Frws 80.000 naho kubigeza aho utuye ni ubuntu.

Abanyakigali batangiye kuryoherwa n’ibyiza bya CANALBOX

Serivisi za CANALBOX zamaze kugezwa mu Mujyi wa Kigali. Guhera ku wa Gatanu tariki 13 Werurwe 2020 abaturage bo mu Murenge wa KIMIRONKO, Akarere ka Gasabo basabwe gutangira kwiyandikisha.

Ubuyobozi bwa GVA-Rwanda buvuga ko bukomeje kwagura imiyoboro ya internet mu bindi bice by’Umujyi wa Kigali ku bufatanye n’Ikigo k’Igihugu gishinzwe Ingufu (REG-EUCL) n’ikigo NETIS Rwanda.

Sosiyete GVA RWANDA, nk’Umunyamuryango w’Ikigo SMART AFRICA gifite ikicaro i Kigali kikaba gikwirakwiza umurongo mugari wa internet muri Afurika, yishimiye ko ikomeje kugira uruhare mu guhindura imibereho n’ubukungu by’Abanyarwanda yifashishije ikoranabuhanga.

Umuyobozi wa GVA RWANDA Marco DE ASSIS, yagize ati: “Itsinda ryacu ry’abatekinisiye rikomeje kwegereza Abanyarwanda batuye muri Kigali umuyoboro wa internet ya mbere kuko twizera ko internet inyaruka ari imwe mu nkingi za mwamba z’iterambere ry’ubukungu n’imibereho myiza y’abaturage. Ikindi kandi GVA ifite gahunda yo gukwiza internet mu ngo zose. Ndashima byimazeyo Minisiteri y’Ikoranabuhanga na Inovasiyo, RURA na RDB ku kizere batugiriye.”

Ahantu hose hari amashanyarazi hagezwa internet ya CANALBOX kuko imigozi itwara internet inyura ku nsinga z’amashanyarazi. Kugeza Internet ku bakiriya ni ubuntu bigakorwa n’inzobere z’abatekinisiye bizewe ko babikora neza.

Ibi byose bishoboka kubera ubunararibonye bwa Sosiyete GVA mu kugeza ikoranabuhanga rya Internet y’umugozi ku baturage, ibigo ndetse na sosiyete sivile.

Ubuyobozi bwa GVA burasaba abaturarwanda kwakira neza abakozi bambaye imipira yanditseho CANALBOX bazajya baza kubasobanurira ibya internet nziza bazaniwe mu Rwanda.

CANALBOX nk’ishami rya CANAL + Telecom, irimo no kubaka inzu y’imyidagaduro ku i Rebero mu Mujyi wa Kigali.

 

 

Umwanditsi:

Rutayisire Emile

2 Comments on “U Rwanda rwungutse internet ya CANALBOX inyaruka bidasanzwe”

  1. Nifuza kumenya niba umuntu wese utuye muri Kigali yabona internet. Nabonye ko bisaba 40.000, umuntu agitangira, hanyuma akajya yishyura 25.000 y’ifatabuguzi buri kwezi. None se ko ntuye mu Murenge wa Remera, Akagari ka Nyabisindu, Umudugudu wa Kagara, ubwo nange nagerwaho n’iyo internet? Nifuza ko mwansubiza.

    1. Mwiriweho neza Faustin,

      Mwakoze kubw’igitekerezo cyanyu mwatanze ku Imvaho Nshya, ni byo koko internet izakwizwa muri Kigali hose, bivuze ko na we izakugeraho aho utuye.

      Ibihe byiza

Tanga Igitekerezo

Email yanyu ntigaragazwa ku rubuga. Amazina na Email ni ngombwa.