21°C , Mostly clear | Kigali-Rwanda

U Rwanda rwashimwe na Amerika intambwe rwateye mu kwimakaza ubumwe  

Yanditswe na Sezibera Anselme

Ku ya 15-01-2020 saa 08:08:52
Perezida wa Sena Dr. Iyamuremye Augustin iburyo hamwe na Amb. Peter H. Vroom uhagarariye Amerika mu Rwanda

Perezida wa Sena y’u Rwanda Dr. Iyamuremye Augustin kuwa 14 Mutarama 2020 yakiriye uhagarariye igihugu cya Leta Zunze Ubumwe z’Amerika mu Rwanda Amb. Peter. H. Vroom, ibiganiro bagiranye byibanze ku nkingi zitandukanye by’umwihariko haganiriwe ku rugendo rw’u Rwanda mu kwimakaza ihame ry’ubumwe n’ubwiyunge n’uburyo bwagiye bugerwaho mu banyarwanda ndetse rwizezwa ubufasha no kurushyigikira.

Nyuma y’ibyo biganiro, Perezida wa Sena Dr. Iyamuremye yatangarije abanyamakuru ko Amerika nk’Igihugu kigihanganye kimaze igihe kirekire gifitanye umubano mwiza n’u Rwanda kuva mu mwaka wa 1962, uwo mubano ahanini ukaba ushingiye kuri za Ambasade.

Dr. Iyamuremye avuga ko mu biganiro yagiranye na Ambasaderi w’Amerika mu Rwanda, ahanini byibanze mu kumenya gahunda u Rwanda rufite zo kubakira ku bumwe n’ubwiyunge. Yagize ati: “mu biganiro twagiranye twarebye mbere na mbere icyangije ubumwe bw’Abanyarwanda, dushingiye ku mateka y’ibihe byahise yatumye ubwo bumwe busenyuka, twanakomoje no kuri Jenoside yabaye mu Rwanda, uruhare yagize ndetse n’urw’ubukoroni mu kwangiza ubwo bumwe”.

Dr. Iyamuremye yavuze ko bavuganye ku butwererane hagati y’impande zombi mu nzego nyinshi haba mu bucuruzi, mu buhinzi no mu burezi ndetse no mu gufasha abatishoboye, kandi Amb. Peter. H. Vroom agaragaza ko ibyo byose igihugu ke kibishyigikiye.

Akomeza avuga ko Sena nk’urwego rushinzwe cyane cyane ishyirwa mu bikorwa ry’amahame remezo bamusobanuriye ibyo bakora arabishima, bongera kuganira n’ububanyi n’amahanga bishingiye ku Nteko Ishinga Amategeko kandi bumvikana ko Abasenateri bo mu gihugu ke cya Leta zunze ubumwe z’Amerika bazajya basura u Rwanda ndetse n’ab’u Rwanda bakaba bajyayo kugira icyo bigirayo.

Muri rusange yanakomoje ku mubano w’ibihugu byombi urebana bucuruzi by’umwihariko ku bijyanye n’ikemezo u Rwanda rwafashe rwo kuva mu myambaro yambawe n’abandi hagatezwa imbere imyambaro ikorerwa imbere mu gihugu, avuga ko Amerika yagaragaje ko yemera kandi bashyigikiye ibyo u Rwanda rwahisemo, ariko bifuza ko habaho imihahiranire hagati y’ibihugu byombi.

Uhagarariye Igihugu cya Leta zunze ubumwe z’Amerika mu Rwanda Amb. Peter H. Vrooman yavuze ko Abanyarwanda bagiye bavangirwa n’abanyamahanga bagendaga babasobanurira ibitari ukuri ari yo mpamvu asanga kubaka ubumwe bisaba ingufu zikomeye.

Yagize ati: “Mu biganiro twagarutse ku birebana n’urugendo u Rwanda rwakoze ku birebana no kubaka ubumwe n’ubwiyunge ndetse n’uburyo byagiye bigerwaho, ndetse nkanashima umwihariko w’u Rwanda muri gahunda yashyizweho yiswe Ndi Umunyarwanda ikwiye gushyigikirwa”.

Amb. Peter yavuze ko ashyigikiye gahunda Abanyarwanda batoranyije yerekeranye n’ubumwe n’ubwiyunge kandi yizeza ko azakomeza kugenda avuganira u Rwanda mu gihugu ke cyamutumye kugira ngo gahunda y’ubumwe n’ubwiyunge bayishyigikire.

Amb. Peter yakomeje avuga ko banagarutse ku bufatanye bw’ibyo bihugu mu kubungabunga amahoro n’umutekano kandi akaba yizeza inkunga zitandukanye zaba i’zibikoresho n’ubumenyi. Anavuga umubano kandi ukwiye kubaho ushingiye ku bucuruzi bwambukiranya umupaka, iyubahirizwa ry’uburenganzira bw’ikiremwa muntu, iterambere ndetse n’amasoko.

Ubusanzwe u Rwanda na Leta Zunze ubumwe z’Amerika bisanganywe umubano mu byerekeranye no kubungabunga ubuzima mu kurwanya virusi itera SIDA, guteza imbere ubuhinzi, ku bijyanye n’isuku n’isukura ndetse n’uburyo bwo guhanga imirimo.

Umwanditsi:

Sezibera Anselme

Tanga Igitekerezo

Email yanyu ntigaragazwa ku rubuga. Amazina na Email ni ngombwa.