17°C , Thunderstorms | Kigali-Rwanda

U Rwanda rwashimiye Congo nyuma y’urupfu rwa Mudacumura

Yanditswe na Imvaho Nshya

Ku ya 18-09-2019 saa 16:18:15
Ambasaderi Nduhungirehe Olivier, Umunyamabanga wa Leta muri Minisiteri y’Ububanyi n’Amahanga

Umunyamabanga wa Leta muri Minisiteri y’Ububanyi n’Amahanga, Amb Nduhungirehe Olivier, yashimye ingabo za Congo zivuganye umuyobozi wa FDLR, Mudacumura Sylvestre.

Nduhungirehe yanditse kuri Twitter ati, “Ni uko ni uko FRDC (Igisirikari cya DR Congo) kubera ibyo mwakoreye Sylvestre Mudacumura n’abaliyetena be.”

Mudacumura yishwe arashwe mu ijoro ryakeye, muri sheferi ya Bwito muri teritwari ya Rutshuru mu Ntara ya Kivu y’Amajyaruguru, nk’uko bitangazwa n’Igisirikari cya Congo.

Richard Kasonga uvugira FARDC ahamya ko Mudacumura yicanwe n’ibyegera bye, avuga ko bishimiye kwica Mudacumura wari umaze igihe kirekire ayobora inyeshyamba za FDLR.

Kasonga yavuze ko ibyabaye kuri Mudacumura ari inkuru nziza ku gisirikari cya Congo “kuko yari ku isonga ry’intagondwa za FDLR zidakozwa ibyo kuba Abanyarwanda bataha iwabo ku bushake.”

Kasonga yavuze ko iyicwa rya Mudacumura rifite ubutumwa riha indi mitwe y’abarwanyi ibarizwa ku butaka bwa Repubulika Iharanira Demokarasi ya Congo.

Ku Rwanda, urupfu rwa Mudacumura ni ikimenyetso cy’ubushake Perezida wa Congo, Felix Tshisekedi afite mu kurandura “umutwe wa FDLR, RNC n’indi mitwe yakoze jenoside n’iterabwoba mu Burasirazuba bwa Congo.”

Mudacumura yishwe afite imyaka 65, akaba yaravukiye mu Cyahoze ari Perefegitura ya Gisenyi, ubu ni mu Ntara y’Uburengerazuba. Mu gihe cya Jenoside yakorewe Abatutsi yari mu buyobozi bw’Ingabo zirinda umukuru w’Igihugu.

Mudacumura yashyiriweho impapuro zo kumuta muri yombi n’Urukiko Mpuzamahanga Mpanabyaha rwa The Hague (ICC) kuwa 13 Nyakanga 2012 kubera ibyaha byo kugaba ibitero ku basivili, ubwicanyi, gufata ku ngufu no kwica urubozo byakorewe mu Burasirazuba bwa Congo.

Ni ibyaha byakozwe n’inyeshyamba yari ayoboye za FDLR ziri muri icyo gihugu kuva mu mwaka wa 1994.

Umwanditsi:

Imvaho Nshya

Tanga Igitekerezo

Email yanyu ntigaragazwa ku rubuga. Amazina na Email ni ngombwa.