26°C , Partly sunny | Kigali-Rwanda

U Rwanda rukomeje imyiteguro yo kwakira FEASSSA 2018

Yanditswe na BUGINGO FIDELE

Ku ya 10-05-2018 saa 08:10:32
Padiri Gatete Innocent, Perezida w'ishyirahamwe ry'imikino yo mu mashuri utangaza ko bari kwitegura neza FEASSSA 2018

Kuva tariki 10 kugeza 24  Kanama 2018 mu Karere ka Musanze mu Ntara y’Amajyaruguru  hazabera imikino ihuza amashuri yisumbuye yo mu karere k’Afurika y’ i Burasirazuba “FEASSSA 2018”.

Padiri Gatete Innocent, Perezida w’ishyirahamwe ry’imikino yo mu mashuri utangaza ko bari kwitegura neza FEASSSA 2018

Iyi mikino yatangiye gukinwa muri 2002, u Rwanda rwayitabiriye bwa mbere muri 2005.  Iyi ni  inshuro ya 3 igiye kubera mu Rwanda nyuma  y’iyahabereye bwa mbere muri 2008 i Kigali n’iyabereye i Huye muri 2015.

Perezida w’ishyirahamwe ry’imikino yo mu mashuri “FSS”,  Padiri Gatete Innocent yatangarije Imvaho Nshya ko imyiteguro yo kwakira iyi mikino igeze kure. Ati “Uko imyaka ishira birumvikana abantu bamaze kugira ubunararibonye mu kwitegura iyi mikino. Nk’ubu ku rwego rw’igihugu  dufite komite yaguye   irimo Abaminisitiri 5 batandukanye barimo uw’Uburezi, Ubuzima, Ubutegetsi bw’igihugu n’izindi”.

Padiri Gatete yakomeje avuga ko hari na komite ishinzwe gutegura irushanwa iyobowe n’umunyamabanga uhoraho muri Minisiteri y’Uburezi “MINEDUC”, Mulindwa Samuel. Uretse iyi komite hari n’izindi komite  8 zirimo n’ishinzwe gutegura amakipe azaserukira u Rwanda  iyobowe na Rurangirwa Aaron.

Ku bijyanye n’imyiteguro y’amakipe, Padiri Gatete avuga ko bari kunoza gahunda ku buryo mu minsi ya vuba  bazayishyira ahagaragara. Akomeza ashimangira  ko  u Rwanda rumenyereweho kwakira neza ariko ko bashaka no kuzatsinda. Ati “Nta bwo twatahira gutegura gusa ntitwereke Abanyarwanda ibikombe. Turifuza kuzegukana n’ibikombe”.

Rurangirwa Aoron, umuyobozi wa Tekinike mu ishyirahamwe ry’imikino yo mu mashuri  yatangarije Imvaho Nshya  ko  igihugu cyakiriye gishaka ibibuga, amacumbi n’ibindi  bikenerwa gusa buri gihugu kitabiriye kikaba kishyurira buri mukinnyi amadolari 7 ku munsi  ni ukuvuga asaga ibihumbi 6 by’amafaranga y’u Rwanda ku munsi  ari yo yifashijwe mu kurya n’ibindi .

Imikino iheruka u Rwanda rwegukanye ibikombe 3

Muri 2017, iyi mikino yabereye mu mujyi wa Gulu muri Uganda, u Rwanda rukaba rwaregukanye ibikombe 3. Muri Handball ES Kigoma yegukanye igikombe itsinze Kibuli yo muri Uganda ibitego 26 kuri 24. Muri Volleyball y’abahungu, ikipe ya Rusumo HS yatsinze Luyanzi yo muri Uganda amaseti 3-0 na ho muri Basketball y’abahungu, APE Rugunga itsinda Buddo yo muri Uganda amanota 71 kuri 70.

Amakipe yandi yitwaye neza, mu koga u Rwanda rwegukanye imidali 12 harimo  irimo 2 ya zahabu, 8 ya Feza n’indi ibiri ya Bronze.  Mu mikino ngororamubiri, u Rwanda rwegukanye imidari 3  itarimo uwa zahabu. Muri Tennis yo ku meza, u Rwanda rwegukanye imidali  3 mu bakobwa naho Tennis isanzwe  u Rwanda rwegukanye umudali wa zahabu.

Muri iyi mikino, u Rwanda rwari rwaserukiwe mu mikino itandukanye irimo umupira w’amaguru, Volleyball, Basketball, Handball, Rugby, Tennis, koga, imikino ngororamubiri “Athletisme” , Netball na Tennis yo ku meza.

Ubwo iyi mikino iheruka kubera mu Rwanda muri 2015, u Rwanda rwegukanye ibikombe 6.

 

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.