17°C , Thunderstorms | Kigali-Rwanda

Tuniziya: Ben Ali wavuye ku butegetsi mu mvururu za 2011 yaguye mu buhungiro

Yanditswe na Imvaho Nshya

Ku ya 19-09-2019 saa 21:07:27
Ben Ali wahoze ari Perezida wa Tuniziya

Ben Ali wabaye Perezida wa Tuniziya kuva muri 1987 kugeza muri 2011 ubwo yavaga ku butegetsi mu bihe by’imvururu, yaguye mu buhungiro kuri uyu wa Kane tariki 19 Nzeri 2019, ku myaka 83 y’amavuko.

Zine El-Abidine Ben Ali yaguye muri Arabie Soudite aho yabaga kuva yava ku butegetsi yamazeho imyaka 24, nk’uko Minisitiri w’Ububanyi n’Amahanga wa Tuniziya yabibwiye AFP.

Ben Ali yavuye ku butegetsi mu ntangiriro z’umwaka wa 2011 kubera igitutu cy’abaturage bamwamaganaga. Nubwo yari arambye ku butegetsi ntiyabashije guhosha imyigaragambyo itaramaze n’ukwezi kumwe.

Uyu mugabo apfuye nyuma y’amezi atatu arimo kwitabwaho n’abaganga mu buryo bwimbitse (intensive care), akaba yari amaze imyaka myinshi arwaye kanseri ya prostate.

Umunyamategeko w’umuryango we, Ben Salha yahamirije Reuters ko “Ben Ali yaguye muri Saudi Arabia.”

Apfuye nyuma gato y’amatora ya Perezida yabaye ku Cyumweru mu gihugu cye, amatora bivugwa ko yakozwe mu mucyo no mu bwisanzure, aho umwe mu bakandida Abir Moussi ari umwe mu bari bashyigikiye Ben Ali muri 2011.

Umurambo wa Ben Ali ugomba kujyanwa i Mecca aho agomba gushyingurwa kuri uyu wa Gatanu nk’uko yabyisabiye, nk’uko Ben Salha yabibwiye Associated Press.

Al Jazeera yatangaje ko Ben Ali nubwo nta demokarasi yaranze ubutegetsi bwe, ariko yazamuye imibereho y’abaturage be ku buryo ku ngoma ye bari babayeho neza kurusha abaturanyi babo bo muri Algeria na Morocco.

Umwanditsi:

Imvaho Nshya

Tanga Igitekerezo

Email yanyu ntigaragazwa ku rubuga. Amazina na Email ni ngombwa.