Kigali-Rwanda

Partly sunny
27°C
 

Tumenye amateka y’Umuganura mu Rwanda n’akamaro kawo

Yanditswe na Kayira Etienne

Ku ya 22-07-2019 saa 08:48:30
Dr Nzabonimpa Jacques ushinzwe umuco muri RALC

Mu gihe Abanyarwanda bitegura kwizihiza Umuganura 2019, ibirori biteganyijwe kuba ku itariki 2 Kanama ku rwego rw’Igihugu, Imvaho Nshya irabagezaho amateka y’Umuganura mu Rwanda nk’uko yagaragajwe na Dr Nzabonimana Jacques ushinzwe ishami ry’umuco mu Nteko y’Ururimi n’Umuco (RALC) mu kiganiro yagiranye n’Imvaho Nshya.

Dr Nzabonimpa Jacques yagize ati “Mu mateka y’u Rwanda, Umuganura wari umunsi mukuru ngarukamwaka wubahwaga kandi ugahabwa agaciro ibwami no mu muryango w’Abanyarwanda. Bivugwa ko Umuganura watangiye kwizihizwa mu Rwanda ku ngoma ya Gihanga Ngomijana mu kinyejana cya kenda, hanyuma uza kongera guhabwa imbaraga na Ruganzu II Ndoli hagati y’imyaka ya 1510-1543 ubwo yabohoraga u Rwanda nyuma y’imyaka irenga cumi n’itanu ruri mu maboko y’abanyamahanga (Abanyoro n’Abanyabungo).”

Ku rwego rw’Igihugu, Umuganura wayoborwaga n’Umwami ngo afashijwe n’abanyamihango b’Umuganura (abo kwa Rutsobe n’abo kwa Myaka ya Musana) naho ku rwego rw’umuryango, umukuru w’umuryango akaba ari we wayoboraga iyo mihango.

Ku munsi w’Umuganura, ngo abayobozi basabanaga n’abayoborwa mu gitaramo k’imihigo, abana bagasabana n’ababyeyi. Ni muri icyo gitaramo cy’Umuganura hamurikwaga ibikorwa by’indashyikirwa (inka nziza, umusaruro ushimishije…) maze abakoze neza ngo bagashimwa, ibigwari bikagawa.

Dr Nzabonimpa ati “Kwizihiza Umuganura byaciwe n’abakoroni mu wa 1925, igihe umutware Gashamura ka Rukangirashyamba wari umwiru ushinzwe Umuganura yacibwaga mu Gihugu agaciribwa mu Burundi. Kuva icyo gihe Umuganura ntiwongeye kwizihizwa. Nyuma y’uko u Rwanda rubonye ubwigenge, abantu bakomeje kwizihiza Umuganura mu miryango ariko ubuyobozi bwariho muri icyo gihe ntibwashyiramo imbaraga ngo Umuganura uhabwe agaciro ukwiye.”

Leta y’u Rwanda igendeye ku byiza n’akamaro Umuganura wagize mu kubaka Igihugu, yawuhaye agaciro gakomeye, ngo ishyiraho n’umunsi w’ikiruhuko uba buri wa Gatanu wa mbere w’ukwezi kwa Kanama. Iteka rya Perezida no 54/01 ryo ku wa 24/02/2017 mu ngingo ya 3 (100) kugira ngo kuri uwo munsi, Abanyarwanda basabane, bunge ubumwe, bazirikane ibyiza bagezeho ari nako bahiga gukora neza kurushaho umwaka utaha.

Umuganura mbere y’Abakoroni

Mbere y’Abakoroni, ibirori ngo byizihizwaga w’amasaka, maze Abanyarwanda bagashimira Imana uburumbuke bw’umuryango, imyaka n’amatungo yabahaye. Ngo baganuzaga Umwami amata, amasaka, n’izindi mbuto nkuru ari zo uburo, inzuzi n’isogi ariko bakongeraho n’ibindi byose byabaga byeze muri icyo gihe.

Amateka avuga ko Umwami yafataga umwuko ngo agatangiza umuhango wo kuvugira umutsima rubanda baje kuganuza, akawuvuga apfukamye yerekana icyubahiro aha abo ayobora ndetse n’Igihugu. Nyuma y’umuhango wo kuganura hakurikiragaho ibirori by’Umuganura byasozwaga n’igitaramo k’imihigo. Muri icyo kiganiro n’Imvaho Nshya Dr Nzabonimpa yamenyesheje ko muri ibyo birori Umwami ngo yamurikaga umusaruro w’Abanyarwanda bavuye impande zose z’Igihugu, hakaba amarushanwa y’indashyikirwa.

Ati “Kuri uwo munsi kandi, imiryango na yo yarateranaga maze umukuru w’umuryango akayobora imihango n’ibirori byayikurikiraga. Cyaraziraga kugira uwo wima cyangwa uheza ku munsi w’Umuganura, buri wese yagombaga kugira umuturanyi asura.”

Umuganura ngo ni kimwe mu byatumye u Rwanda ruba Igihugu gikomeye kitavogerwa kuko watumye Abanyarwanda bunga ubumwe. Ikindi kandi, ibirori byo kwizihiza Umuganura cyane cyane amarushanwa yabaga abiherekeje, ngo byagize uruhare runini mu kongera agaciro bimwe mu byari bigize ubuzima bw’Abanyarwanda: imbyino, imitako, inka imyaka n’ibindi.

Kwizihiza Umuganura 2019

Ushinzwe ishami ry’Umuco muri RALC yakomeje atangaza ko kwizihiza Umuganura muri iki gihe ngo byarenze imbibi zo kwita ku musaruro w’ubuhinzi n’ubworozi gusa, bigera no mu zindi nzego zireba ubuzima n’iterambere by’Abanyarwanda. Dr Nzabonimpa ati “Ibirori by’Umuganura 2019 bizizihiza umusaruro w’ibyagezweho mu by’ubuzima, uburezi, ikiranabuhanga, imikino n’imyidagaduro, ubucukuzi bw’amabuye y’agacio, inganda, ibikorwa remezo, umuco, ubukerarugendo n’ibindi.” Kwizihiza umusaruro muri izo nzego zose ngo bigamije, nk’uko byahoze, kwishimira umusaruro wagezweho ari nako hafatwa ingamba zo kuzagera kuri byinshi umwaka utaha.

Insanganyamatsiko y’Umuganura 2019 ngo igira iti “Umuganura isoko y’ubumwe n’ishingiro ryo kwigira”. Iyi nsanganyamatsiko ngo ishingiye ku ndangagaciro z’umuco w’u Rwanda zijyanye no kwizihiza umuganura ari zo: Gukunda Igihugu; Ubumwe; Kurangwa n’ubupfura no Gukunda umurirmo. Izi ndangagaciro ngo ni zimwe mu zifasha kurema Umunyarwanda nyawe ari we abakurambere bitaga: Umunyarwanda w’Umutima.

Mu myumvire y’Abanyarwanda, umutima ngo ni cyo gicumbi k’indangagaciro. Bityo rero, umutima ukubiyemo ibyiza byose biranga Umunyarwanda, indangagaciro agenderaho na kirazira yitwararika. Ati “Nk’uko insanganyamatsiko ibivuga, Umuganura ni kimwe mu byatumye u Rwanda ruba Igihugu gikomeye kitavogerwa kuko watumye Abanyarwanda bunga ubumwe. Ubwo bumwe bwagaragariraga mu gusabanya abagize umuryango muto: ababyeyi n’abana ndetse ukanasabanya umuryango mugari.”

Umuganura kandi watumaga habaho gushyikirana hagati y’abayobozi n’abayoborwa ngo bigatuma Abanyarwanda bagira umutima umwe wo gukunda Igihugu, kukirwanirira no kugiteza imbere.

Mu Muganura 2019, ngo hari ibikorwa byatoranyijwe mu cyumweru cy’Umuganura, bigamije gushyira mu bikorwa intego u Rwanda rwihaye yo guteza imbere inganda ndangamuco n’ubukerarugendo bushingiye ku muco. Bityo rero, ikerekezo cyo kwizihiza Umuganura w’uyu mwaka bikaba ngo bifite intego yo kubaka umuryango, guteza imbere umuco wo guhanga udushya, gukunda umurimo no guhiganwa.

Kwizihiza Umuganura 2019, ngo bishimangira urugendo Abanyarwanda barimo rwo kwigira no kwibohora nyako, hifashishwa umuco kugira ngo hashakwe ibisubizo bihamye by’ibibazo bagenda bahura na byo.

Impamvu Dr Nzabonimpa yatangaje ko Umuganura warenze imbibi z’u Rwanda, ni uko n’Abanyarwanda baba mu mahanga na bo bazizihiza Umuganura aho batuye. Ngo bazaboneraho umwanya wo kwereka abo babana bimwe mu byiza biranga umuco w’u Rwanda. Uretse gusabana no kunga ubumwe, Umuganura ngo utuma Abanyarwanda bazajya bishimira ibyo gahunda za Leta zatumye bagerayo ari mu mibereho myiza, mu bukungu, mu miyoborere myiza, mu butabera ndetse no mu mu birebana n’umutekano.

Umwanditsi:

Kayira Etienne

2 Comments on “Tumenye amateka y’Umuganura mu Rwanda n’akamaro kawo”

  1. Ikiganiro ni kiza, u Rwanda rumaze gukataza mu iterambere, ubukungu, imibereho myiza byose dukesha imiyoborere myiza ya H. E Paul K a game umuze kwamamara ,dukwiye gusigasira ibyo twagezeho twirinda abadusubiza inyuma, twishimire ibyagezwe. Mukomere

  2. Umuco wo kuganura mu gihugu cyacu cy’u Rwanda ntugakomwe mu nkokora habe naga to.

    Ababigerageje mu w’1925 nti bazongere kuduca urwaho. Twimike uyu muco wo gushima”Ruganzu ndoli II ndamushimiye watsitsimuye amahanga akabambura u Rwanda” Aho tugeze niho heza, Intore izirusha intambwe Nyakubahwa Perezida wa Repuburika Paul Kagame kuba yaratugaruriye umuco w’umuganura kumushimira kwange ni ukuba maso mubikorwa byo gusigasira umuco wacu n’ibyo yatugejejeho abanyarwanda twese.

Tanga Igitekerezo

Email yanyu ntigaragazwa ku rubuga. Amazina na Email ni ngombwa.