19°C , Mostly cloudy | Kigali-Rwanda

Tugomba kunoza imikorere n’imikoranire kugira ngo Siporo itere imbere-Min  Munyangaju

Yanditswe na BUGINGO FIDELE

Ku ya 16-11-2019 saa 13:05:02
Hon. Nyirasafari (ibumoso) ahererekanya ububafasha na Minisitiri mushya wa Siporo, Munyangaju Aurore Mimosa (iburyo)

Tariki 15 Ugushyigo 2019 ni bwo habaye umuhango w’ihererekanyabubasha hagati ya Minisitiri mushya wa Siporo “MINISPOR”, Munyangaju Aurore Mimosa,  Minisitiri w’Urubyiruko n’Umuco, Mbabazi Rose Mary ndetse na Hon. Nyirasafari wari usanzwe ari  Minisitiri muri Minisiteri y’Umuco na Siporo “MINISPOC”.

Hon. Nyirasafari Esperance  wari Minisitiri w’Umuco na Siporo kuva mu Kwakira 2018 kugeza mu Kwakira 2019 ubwo yagirwaga umusenateri yabanje gusobanurira  ba Minisitiri ibikorwa by’iyi Minisiteri.

Yeretse Minisitiri w’Urubyiruko n’Umuco  ibigo  byari bishamikiye kuri MINISPOC   byose byafashaga mu guteza imbere umuco. Muri ibi bigo harimo Ikigo k’Ingoro z’Igihugu  z’Umurage w’u Rwanda, Urwego rw’igihugu rushinzwe intwari  n’impeta z’ishimwe, Inteko Nyarwanda y’ururimi n’Umuco ndetse n’ikigo gishinzwe ishyinguranyandiko n’inkoranyabitabo.

Muri  Siporo, Hon. Nyirasafari yabwiye Minisitri mushya wa Siporo ko  iki gice nta kigo cya Leta  gihari ahubwo hari  amashyirahamwe y’imikino  itadukanye ndetse na Komite Olempike.

Mu byo yamubwiye ni uko hari  gahunda yo kuvugurura poRitiki ya siporo kugira ngo ihure na  gahunda z’igenamigambi zashyizweho. Yasabye ko bagomba gukomeza gukorana na Minisiteri y’Uburezi ndetse n’ishyirahamwe ry’imikino mu mashuri mu rwego rwo kuvumbura no guteza imbere impano z’abakiri bato mu mikino inyuranye.

Hon. Nyirasafari yongeye gusaba ko  siporo ya bose  ikomeza  kwitabwaho kandi igashishikarizwa abaturarwanda bose.

Yagaragaje ko hari umushinga wo gutunganya igice cya Remera ahubatse Kigali Arena, Sitade Amahoro hakaba ahantu hari ibikorwa remezo bitandukanye bya siporo ku buryo abantu bazajya bahaza bagakora siporo  zinyuranye. Aha yasabye ko byakwihutishwa

Kuba Sitade Amahoro iri mu zizavugurwa kandi yakoreragamo Minisiteri ndetse n’amashyirahamwe atandukanye y’imikino, Hon. Nyirasafari yasabye Minisitiri wa Siporo, Munyangaju ko nibashaka aho bazimukira bazabibuka kuko  ari bo bafatanyabikorwa b’ibanze kandi bakaba bagorwa ahanini n’amikoro.

Minisitiri wa Siporo, Munyangaju Aurore Mimosa  yashimiye Perezida w’u Rwanda Paul Kagame ku kizere yamugiriye. Akaba yari  asanzwe ari umuyobozi muri SONARWA.

Munyangaju yashimiye kandi Hon. Nyirasafari ku mpanuro n’inama yamugiriye nk’uwari umuyobozi w’iyi Minisiteri.

Yakomeje avuga ko ikintu gikomeye bagomba gukomerezaho ari ukonoza  imikorere n’imikoranire kuko ari kimwe mu bintu   bizatuma siporo itera imbere bityo bakagera ku ntego bihaye.

Yasabye abakozi ba Minisiteri ya Siporo kubakira ku ihame ryo gukorera hamwe kandi ku gihe byose bigamije kugera ku musaruro mwiza.

Minisitiri w’Urubyiruko n’Umuco, Mbabazi Rose Mary nawe yashimiye Perezida  Paul Kagame  kuba yarahuje Minisiteri y’Urubyiruko n’Umuco kuko   byerekana ko   u Rwanda rwifuza kurera urubyiruko rufite indagagaciro z’umuco Nyarwanda.

Yavuze ko biteguye gukorana neza n’ibi bigo byari bishakimiye muri Minisiteri y’Umuco na Siporo.

Mu bandi bayobozi bashya hari Bamporiki Edouard wagizwe Umunyamabanga wa Leta muri Minisiteri y’Urubyiruko n’Umuco naho Shema Maboko Didier aba Umunyamabanga Uhoraho muri Minisiteri ya Siporo aho yasimbuye Ntigengwa  John.

Hon. Nyirasafari (iburyo) na Minisitiri w’Urubyiruko n’Umuco, Mbabazi Rose Mary (ibumoso)

Abayobozi bari bitabiriye umuhango w’ihererekanyabubasha

Nyuma y’umuhango abari bitabiriye bafashe ifoto y’urwibutso

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.