Kigali-Rwanda

Partly cloudy
19°C
 

Tugiye kwigira ku mukino ubanza  twakinye na Mamelodi-Minnaert

Yanditswe na BIZIMANA ERIC

Ku ya Mar 23, 2018

Tariki 06-04-2018

Rayon Sports- Costa do Sol

Tariki 18-04-2018

Costa do Sol-Rayon Sports

Umutoza wa Rayon Sports, Ivan Minnaert aravuga ko bagomba kwigira ku mukino bakinnye na Mamelodi Sundowns mu gihe bazaba bahura na Club Desportivo Costa do Sol yo muri Mozambique mu mukino ubanza  w’imikino y’Afurika  mu makipe yitwaye neza iwayo “Total CAF Confederation Cup 2018”.

Ubwo Rayon Sports yari imaze kunganya na Mamelodi 0-0 mu mukino ubanza kuri Sitade Amahoro

Tariki 21 Werurwe 2018, Rayon Sports yatomboye iyi kipe yo muri Mozambique nyuma yo gusezererwa na Mamelodi mu mikino y’amakipe yatwaye ibikombe iwayo “Total CAF Champions League 2018” ku kinyuranyo k’ibitego 2-0 mu mikino yombi.

Uyu mutoza wa Rayon Sports asanga bagomba kwigira ku mukino ubanza wabahuje na Mamelodi wabereye i Kigali, aho Rayon Sports yabonye uburyo bwo gutsinda ikirangaraho. Aha yavuze ko bagomba gushaka impamba y’ibitego bihagije mu rugo. Ati “Bishobora kuba byiza kimwe nuko byaba bibi. Gusa byaba bibi kurushaho tudakuye isomo ku mukino twakinnye na Mamelodi. Nitwiga tuzakora byinshi. Gusa tugiye gushaka amakuru ahagije kuri iyi kipe”.

Minnaert yemeza ko babonye impamba mu rugo bajya i Maputo badafite ikibazo  ku buryo bahita bajya mu matsinda ya “Total CAF Confederation Cup 2018” bikaba byaba ari ubwa mbere ikipe yo mu Rwanda igeze  muri iki kiciro.

Club Desportivo Costa do Sul yo mu mujyi wa Maputo muri Mozambique ikinira kuri “Estádio do Costa do Sol” yakira abafana ibihumbi icumi, yashinzwe tariki 5 Ukwakira 1955. Itozwa na Leonardo Costas ukomoka muri Argentine ndetse yitabiriye imikino y’Afurika inshuro ebyiri (2010 na 2018).  Yageze muri iki kiciro isezereye Juaneng Galaxy yo muri Botswana ku bitego 2-0  na Cape Town yo muri Afurika y’Epfo ku bitego 2-2.

Muri shampiyona y’uyu mwaka Costa do Sol   iri ku mwanya gatanu n’amanota 4  ikarushwa inota rimwe na Clube Ferroviário de Maputo ya mbere ku rutonde rwa shampiyona.