Kigali-Rwanda

Mostly cloudy
20°C
 

Tour du Rwanda 2018: Mugisha yegukanye intera ya kabiri ahita ayobora isiganwa

Yanditswe na BUGINGO FIDELE

Ku ya Aug 7, 2018

Kigali-Huye (120,5 km)

  1. Mugisha Samuel 03h08’56”
  2. Uwizeye Jean Claude 03h09’17”
  3. Hailemichael Mulu 03h09’17”
  4. Munyaneza Didier 03h12’20”
  5. Doring Jonas 03h12’22”

Urutonde rusange (218 km)

  1. Mugisha Samuel 05h21’39”
  2. Uwizeye Jean Claude 05h22’00”
  3. Hailemichael Mulu 05h22’00”
  4. Lozano Riba David 05h24’43”
  5. Lagab Azzedine 05h24’43”

Mugisha Samuel nyuma yo kwegukana intera ya Kigali-Huye yahise yambikwa umwambaro w’umuhondo ugaragaza uyoboye isiganwa

Uyu munsi

Huye-Musanze (199,7 km)

Mugisha Samuel ukina nk’uwabigize umwuga mu ikipe ya Dimension Data yo muri Afurika y’Epfo ariko iba mu Butaliyani   ni we wegukanye intera ya kabiri ya Tour du Rwanda 2018 bituma ahita afata n’umwanya wa mbere ku rutonde rusange.

Mugisha ufite imyaka 20 y’amavuko   ubu  akaba arimo gukinira ikipe y’igihugu, yitwaye neza mu ntera ya kabiri yavaga i Kigali yerekeza i Huye ahareshya n’ibilometero 120,5  aho yasize bagenzi be akagera ku murongo wenyine akoresheje amasaha 3, iminota 08 n’amasegonda 56.  Iyi akaba ari nayo ntera ya mbere yegukanye muri Tour du Rwanda yitabiriye ku nshuro ya 3.

Yakurikiwe na Uwizeye Jean Claude ubu ukinira ikipe ya POC Cote de Lumière yo mu Bufaransa na Hailemichael Mulu ukinira ikipe y’igihugu ya Ethiopia bombi bakoresheje amasaha 3, iminota 9 n’amasegonda 17.

Kwegukana iyi ntera byatumye Mugisha Samuel ahita ayobora isiganwa muri rusange  aho mu bilometero 2018 amaze gukoresha amasaha   5, iminota 21 n’amasegonda 39.

Mugisha Samuel yatangaje ko yishimiye cyane kwegukana iyi ntera ndetse no kuba ayoboye isiganwa gusa avuga ko  we na bagenzi be bakoze cyane kandi ko biteguye gukomeza gukora cyane kuko hagisigaye  intera nyinshi.

Ku mwanya wa kabiri hari Uwizeyimana Jean Claude  na Hailemichael Mulu bombi bamaze gukoresha amasaha 5, iminota 22. Ku mwanya wa 4 hari  Lozano Riba David umaze gukoresha amasaha 5,  iminota 24 n’amasegonda 43 mu gihe ku mwanya wa 5 hari  Lagab Azzedine    ukomoka muri Algeria  akaba ari nawe wari wegukanye intera ya mbere ya Tour du Rwanda 2018  yo kuzenguruka i Rwamagana. Uyu mukinnyi  ufite imyaka 31 y’amavuko  nawe amaze gukoresha amasaha 3, iminota 24 n’amasegonda 43.

Mu bakinnyi 79 batangiye isiganwa, ubu hasigayemo 79 nyuma y’aho 3  bamaze kuvamo barimo  Behringer Oliver ukinira Team Novo Nordisk  yo muri USA, Bissa Badoja  ukinira  SNH Vélo Club yo muri Cameroun   na Jilowa Agoster ukinira  Sampada  yo muri Afurika y’Epfo.

Uyu munsi harakinwa intera ndende kurusha izindi

Uyu munsi tariki 07 Kanama 2018 harakinwa intera ya 3   ituruka i Huye isorezwe i Musanze ahareshya n’ibilometero 199,7. Iyi akaba ari yo ntera ndende kurusha izindi muri uyu mwaka ndetse akaba ari nayo ndende mu zindi ntera zose zakinwe muri Tour du Rwanda kuva 2009.