Kigali-Rwanda

Partly sunny
27°C
 

Tour du Rwanda 2018: Lagab Azzedine yegukanye intera ya mbere

Yanditswe na Amani Claude

Ku ya Aug 6, 2018

Rwamagana-Rwamagana (97,5 km)

1.Lagab Azzedine 02h12’21”

2.Lozano Riba David 02h12’21”

3.Fourie James 02h12’31”

4. Doring Jonas 02h12’31”

5.Ndayisenga Valens 02h12’33”

Uyu munsi

Kigali-Huye (120,5 km)

Ejo hashize tariki 05 Kanama 2018 ni bwo hatangiye isiganwa mpuzamahanga mu mukino wo gusiganwa ku magare « Tour du Rwanda 2018 ». Intera ya mbere ikaba yarabereye mu Karere ka Rwamagana aho abakinnyi bazengurutse Umujyi wa Rwamagana ahareshya n’intera y’ibilometero 6,5  bakahazenguruka inshuro 15 basoza bakoze ibilometero 97,5.

Lagab Azzedine amaze kwambikwa umwambaro w’umuhondo na Perezida wa UCI, David Lappartient (uwa kabiri uhereye iburyo)

Umukinnyi ukomoka muri Algeria akaba akinira ikipe ya  GSP Algerie, Lagab Azzedine ni we wanikiye abandi asoza ari uwa mbere aho yakoresheje  amasaha 2, iminota 12 n’amasegonda 21. Yakurikiwe ku mwanya wa kabiri  na  Lozano Riba David ukomoka muri Espagne akaba akinira Novo Nordisk yo muri Amerika aho bakoresheje ibihe bimwe.

Ku mwanya wa 3 haje Fourie James ukinira ikipe y’igihugu y’Afurika y’Epfo naho ku mwanya wa 4 haza Doring Jonas ukinira ikipe ya  Team Descartes Romandie yo mu Busuwisi bombi bakaba barakoresheje amasaha 2, iminota 12 n’amasegonda 31.

Ndayisenga Valens ubu urimo gukinira ikipe ya  POC Cote de Lumière yo mu Bufaransa akaba ariwe ufite agahigo ko kwegukana ubugira kabiri Tour du Rwanda (2014 na 2016) ndetse akaba ariwe wegukanye intera nyinshi (5) yasoje ku mwanya wa 5 aho yakoresheje amasaha  02, iminota 12 n’amasegonda 33.

Lagab Azzedine ufite imyaka 31 y’amavuko   ni inshuro ya 3 yegukanye intera  muri Tour du Rwanda  kuko muri 2013 yegukanye intera 2 zirimo  intera ya  5 ya Muhanga-Nyamagabe ndetse n’intera ya nyuma ya 7 yo kuzenguruka muri Kigali.

Akimara kwegukana iyi ntera ya mbere yavuze ko ari intego baje bafite nk’ikipe ye yo kwegukana byibura intera. Gusa avuga ko  azi neza ko abakinnyi b’u Rwanda bakomeye ari na yo mpamvu  atizeye kugumana umwambaro w’umuhondo ugaragaza uyoboye isiganwa. Ati « Ikinyuranyo  cy’amasegonda n’abankurikiye ni gito kandi tugiye gutangira gusiganwa mu ntera zirimo imisozi ».

Iyi ntera ya mbere ya Tour du Rwanda 2018 iri kuba ku nshuro ya 10 yatangijwe na Perezida w’ishyirahamwe ry’umukino wo gusiganwa ku magare ku Isi « UCI »,  David Lappartient ari kumwe na Perezida w’impuzamashyirahamwe y’uyu mukino muri Afurika “CAC”, Dr Mohammed Wagih Azzam.

Uyu munsi harakinwa intera ya kabiri

Intera ya kabiri  ya Tour du Rwanda 2018  iraba uyu munsi tariki 06 Kanama 2018 aho abasiganwa bahaguruka i Kigali (Kicukiro) berekeze i Huye mu Ntara y’Amajyepfo abo basoza bakoze intera y’ibilometero 120,5.