Tennis: Niyonkuru na  Shokeir begukanye irushanwa mpuzamahanga mu batarengeje imyaka 18

Yanditswe na BUGINGO FIDELE

Ku ya Jun 24, 2019

Niyonkuru Aisha  ukomoka i Burundi  na Ally Shokeir ukomoka mu Misiri ni bo begukanye irushanwa  mpuzamahanga  mu batarengeje imyaka 18  mu ngimbi n’abangavu “Kigali Junior International Open 2019” .

Iri rushanwa ryabereye mu Rwanda kuva tariki 17  kugeza 22 Kamena 2019  ryari ryitabiriwe  n’abakinnyi 74 baturutse mu bihugu 20 ku Isi yose birimo u Bufaransa, u Burundi, Uganda, u Buhinde, Israel, Afurika y’Epfo,Comores, Kenya, Madagascar, u Bwongereza, Ethiopia, Misiri , u Burusiya, u Busuwisi, Mali ,Nigeria , Zimbabwe, Romania  n’u Rwanda rwakiriye.

Tariki 22 Kamena 2019 ni bwo habaye imikino ya nyuma yabereye muri Cercle Sportif  de Kigali mu Rugunga. Mu bakina ari umukinnyi umwe kuri umwe, mu ngimbi « Men Juniors », Ally Shokeir ukomoka mu Misiri  yatsinze ku mukino wa nyuma Maxene Rivet ukomoka mu Bufaransa amaseti 2-0 (6-1 na 7-5) naho mu bangavu, Niyonkuru Aisha from ukomoka i Burundi atsinda Sofiya Lebedeva ukomoka mu Burusiya amaseti 2-0 (6-0 na 6-0).

Mu bakinni ari babiri mu ngimbi, ikipe ya Kabura na Shokeir Aly yatsinze iya  Baron Jonathan na Penman Charlie amaseti 2-0 (6-4 na 6-4) naho mu bangavu, ikipe ya Fawzy Caroline na Niyonkuru Aisha itsinda iya  Lebedeva Sofiya  na  Valitova Arina.

Iyi mikino  yari ibereye  mu Rwanda ku nshuro ya kabiri dore ko no muri 2018 yari yabereye mu Rwanda. Imikino yasojwe ni  iy’ikiciro cya  mbere, kuri uyu wa Mbere  tariki 24 Kamena 2019  hakaba hagomba gutangira imikino y’ikiciro cya kabiri izasozwa tariki 28 Kamena 2019  aho izitabirwa n’abakinnyi bashya ndetse  na bamwe mu bakinnye imikino y’ikiciro cya mbere.

Aya marushanwa kaba agamije gufasha aba bakinnyi  kubona amanota atuma bazamuka ku rutonda rw’ishyirahamwe ry’umukino wa Tennis  ku Isi « ITF ».

Abitwaye neza mu byiciro byose nyuma yo guhabwa ibihembo