20°C , Partly cloudy | Kigali-Rwanda

Tchabalala wakiniraga Rayon Sports yerekeje muri Baroka FC yo muri Afurika y’Epfo

Yanditswe na BUGINGO FIDELE

Ku ya Jun 18, 2018

Rutahizamu ukomoka i Burundi akaba yakiniraga ikipe ya Rayon Sports,  Shaban Hussein  Tchabalala ubu ni umukinnyi w’ikipe  Baroka FC  mu kiciro cya mbere muri Afurika y’Epfo aho yamusinyishije imyaka 2.

Hussein Shaban Tchabalala yamaze kwerekeza muri Baroka FC yo muri Afurika y’Epfo

Uyu rutahizamu yageze muri Rayon Sports muri Mutarama 2018 asinya amasezerano y’amezi 6 ashobora kongerwa. Mu ntego ikipe ya Rayon Sports yari ifite ni uko yabafasha kugera kure mu mikino y’Afurika.

Ibi byaje guhira iyi kipe kuko Tchabalala ari we  wafashije Rayon Sports gusezerera ikipe ya LLB y’i Burundi  mu ijonjora ribanza ry’imikino y’Afurika y’amakipe yatwaye ibikombe iwayo “Total CAF Champions League 2018”.

N’ubwo ikipe ya Rayon Sports ititwaye neza mu kiciro cya kabiri dore ko yasezerewe na Mamelodi Sundowns yo muri Afurika y’Epfo ku bitego 2-0 mu mikino yombi, Tchabalala ni umwe mu bakinnyi bigaragaje cyane yaba umukino ubanza wabereye i Kigali warangiye ari 0-0 n’uwo Rayon Sports yatsindiwe muri  Afurika y’Epfo ibitego 2-0.

Ikipe ya Rayon Sports nyuma yo kuva muri “Total CAF Champions League 2018” yakomereje muri “Total CAF Confederation Cup 2018” aho yagombaga  gukina n’ikipe imwe yayikuramo  igahita ijya mu matsinda.

Muri iki kiciro ni ho, Tchabalala yongeye kwigaragaza mu mukino ubanza Rayon Sports yatsinze Coste do Sol yo muri Mozambique ibitego 3-0 aho yatsinzemo ibitego 2.  Ibi bitego byabaye impamba nziza kuri Rayon Sports kuko muri Mozambique yatsinzwe ibitego 2-0 ariko ikomeza ku bitego 3-2.

Uku kwitwara neza no gufasha ikipe ya Rayon Sports ni byo byatumye, Tchabalala yifuzwa n’amakipe atandukaye mu karere ndetse no muri Afurika y’Epfo  bikaba byarangiye ikipe ya Baroka FC yasoje shampiyona iri ku mwanya wa 14 imwegukanye.

Ku rubuga rw’iyi kipe   bagaragaza ko Tchabalala yinjiranye na  Elvis Chipezeze, Tshediso Patjie, Bheki Maliba, Thabo Moseki, Bonginkosi Makume, Siseko Manana, Armand Gnanuillet, Ananias Gebhardtna  Orebotse Mongae.