Kigali-Rwanda

Mostly cloudy with showers
23°C
 

Tanzania yisubije igikombe cya CECAFA mu bagore

Yanditswe na BUGINGO FIDELE

Ku ya Jul 29, 2018

Ethiopia 1-4 Tanzania
Rwanda 0-2 Kenya

Kuva tariki 19 kugeza 27 Nyakanga mu Rwanda habereye mikino ya CECAFA mu kiciro cy’abagore “CECAFA Women Challenge Cup 2018”. Ikipe y’igihugu ya Tanzania “Kilimanjaro Queens” itari yatangiye neza irushanwa ni yo yegukanye igikombe ikaba yarakisubije kuko ni yo yari yakegukanye muri 2016 ubwo iri rushanwa ryaherukaga gukinwa.

Ikipe y’igihugu ya Tanzania ubwo yari imaze gushyikirizwa igikombe cya CECAFA 2018 (Foto FERWAFA)

Iri rushanwa ryari ryitabiriwe n’amakipe atanu ari yo u Rwanda rwakiriye, Kenya, Tanzania, Uganda na Tanzania. Aya makipe yakinnye hagati yayo hanyuma ikipe yasoje ifite amanota menshi yegukana igikombe.

Inzira ya Tanzania kugera ku gikombe

Muri 2016, Tanzania yatwaye iki gikombe itsinze ku mukino wa nyuma Kenya. Muri uyu mwaka iyi kipe nabwo yahabwaga amahirwe ariko ku mukino wa mbere tariki 19 Nyakanga 2018 itungurwa n’u Rwanda ruyitsinda igitego 1-0.

Iyi kipe ya Tanzania yari isigaje imikino 3, ku mukino wa kabiri yanganyije na Kenya igitego 1-1. Aha ni ho benshi bavuze ko bishobora kuba bigoye ko iyi kipe yakwegukana igikombe.

Ikipe y’igihugu ya Tanzania  yitwaye neza mu mikino ibiri  yari isigaye itsinda   Uganda ibitego 4-1 irongera itsinda Ethiopia ibitego 4-1, umukino wabaye tariki 27 Nyakanga 2017. Tanzania yahise iyobora urutonde n’amanota 7 n’ibitego 6 yari izigamye.

Ku mwanya wa kabiri haje, Uganda n’amanota 7 n’umwenda w’igitego 1. Iyi kipe yatsinze Kenya igitego 1-0, itsinda Ethiopia ibitego 2-1, itsindwa na Tanzania ibitego 4-1 isoza inganya n’ u Rwanda ibitego 2-2.

Ikipe ya  Ethiopia yasoje  ku mwanya wa 3 n’amota 6 aho yatsinze u Rwanda ibitego 3-0  inatsinda Kenya igitego 1-0 ariko itsindwa na Uganda ibitego 2-1 na Tanzania ibitego 4-1.

Ku mwanya wa 4 haje ikipe ya Kenya n’amanota 4  mu gihe ku mwanya wa nyuma  wa 5 hasoje ikipe y’u Rwanda nayo n’amanota 4.

Amakipe atatu ya mbere yahawe ibihembo

Ikipe y’igihugu ya Tanzania yegukanye “CECAFA Women Challenge Cup 2018” yahawe igikombe n’amafaranga 2500 y’amadolari y’Amerika. Ikipe ya Uganda yahawe amadolari 1500 naho ikipe ya Ethiopia yahawe  amadolari 1000. Aya mafaranga akaba ari inkunga yatanzwe na Banki ya Kigali.

Mu bakinnyi ku giti cyabo bahembwe, Ruth Aturo ukinira Uganda ni we wabaye umunyezamu mwiza w’irushanwa naho  Fatuma Issa Maonyo ahabwa igihembo cy’umukinnyi witwaye neza mu irushanwa “Best Player”.  Abakinnyi babiri bakinira Ethiopia, Meselu Abera Tesfamariam na Donisia Daniel Minja ni bo batsinze ibitego byinshi  buri wese yatsinze ibitego 3.