Taekwondo: Kuba mu bakinnyi 112 ku Isi byanteye gukomeza gukora cyane-Kayitare

Yanditswe na BUGINGO FIDELE

Ku ya 10-11-2019 saa 11:14:55
Kayitare Benoit afite intego zo gukomeza gukora cyane ku buryo yaza mu bakinnyi 10 ba mbere muri Afurika

Kapiteni w’ikipe y’igihugu na Police TC mu mukino njyarugamba ukomoka muri Koreya “Taekwondo”, Kayitare Benoit yazamutseho imyanya 21 ku rutonde  rw’abakinnyi bakomeye ku Isi rukorwa n’ishyirahamwe ry’umukino wa Taekwondo ku Isi “World Taekwondo Federation (WTF)”.

Nk’uko bigaragara ku rutonde rw’uku kwezi k’Ugushyingo 2019, Kayitare Benoit ari ku mwanya wa 112    ku Isi na 20 muri Afurika avuye ku wa 133 yari ariho mu kwezi k’Ukwakira 2019.

Mu kiganiro kihariye  Imvaho Nshya  yagiranye na Kayitare Benoit   yagize byinshi atangaza ku rugendo rwe mu mukino wa Taekwondo   avuka  uko yakiriye kuzamukaho imyanya 21 ku rutonde rw’abakinnyi ba mbere ku Isi.

KAYITARE NI MUNTU KI?

Amazina ye ni Kayitare Benoit, yavukiye mu Karere ka Gasabo mu Murenge wa Kimironko mu 1999. Ni umwana wa 4 mu bana 7 ba  Mudaheranwa Henry na Kabanyana Henriette.

Kayitare  yize amashuri abanza kuri Remera Academy akomereza muri GS Remera Protestant mu mashuri yisumbuye aho yasoje ikiciro rusange atsindira kujya kwiga  mu ishuri rya Kagarama kwiga PCM (Physics , Chemistry and Mathematics).

Nyuma y’igihe gito, Kayitare Benoit yasubiye muri GS Remera Protestant aba ari naho asoreza mu ishami  ry’indimi muri 2017. Atangaza ko mu minsi ya vuba yifuza gutangira amasomo muri Kaminuza.

UKO KAYITARE YATANGIYE GUKINA TAEKWONDO

Kayitare atangaza ko yatangiye gukina umukino wa Taekwondo muri 2012 gusa mbere akaba yarakinaga umupira w’amaguru ndetse anawukunda.

Akomeza avuga ko akiri muto yakoreraga siporo ahakorera umuryango w’Abanyakoreya ufasha urubyiruko guhindura   imyumvire no kwiteza imbere: International Youth Fellowship (IYF).

Yagize ati : “Nakinaga umupira w’amaguru cyane n’ababyeyi bari bazi ko ari wo nzakina, ariko ikipe twakinagamo muri IYF yaje  gusenyuka  bituma nkomereza muri Taekwondo kuko ngikina umupira w’amaguru nanyuzagamo nkajya  gukina Taekwondo.”

Kayitare   yahise akomeza gukinira ikipe ya IYF muri Teakwondo, muri 2013 yitabiriye irushanwa ryo kwibuka aratsinda yumva arabikunze ndetse aniyemeza gukomeza gushyiramo ingufu akazamura urwego rwe.

Avuga ko umuryango we batigeze bamenya ko akina uyu mukino kuko babonaga ajya muri siporo. Ati : “Umuryango wange nta bwo  amakuru bayamenyega  kuko babonaga ngiye ariko nyuma barabyumvise kandi barabyishimira.”

KAYITARE AMAZE KWITABIRA  AMARUSHANWA AKOMEYE

Kayitare avuga ko mu myaka 7 yagiye yitabira amarushanwa atandukanye kandi akomeye aho yabanje mu kiciro k’ingimbi ubu akaba akina mu bakuru “Senior” mu batarengeje ibiro 54.

Akomeza avuga ko uretse amarushanwa muri Afurika yanitabiriye amarushanwa yo ku rwego rw’Isi arimo shampiyona y’Isi.

Ati: “Muri uyu mwaka wa 2019 nitabiriye shampiyona y’Isi yabereye mu Bwongereza, nakinnye  n’umukinnyi ukomeye  ankuramo ariko nenda kumutsinda. Byaranshimishije kandi binyereka ko byose bishoboka.”

Kayitare avuga ko kandi muri uyu mwaka wa 2019 yitabiriye imikino ya gisirikare ku rwego rw’Isi yitwara neza aho yatsinze umukino akaza gukurwamo mu kiciro cyo guhatanira umwanya wa 3.

KUZAMUKA KU RUTONDE KU RWEGO RW’ISI

Kayitare Benoit ufite imyaka 20 y’amavuko ubu ni we mukinnyi ukina umukino wa Taekwondo mu Rwanda uri hafi ku rutonde   rukorwa na WTF aho ari ku mwanya wa 112.

Nyuma yo kuzamukaho imyanya 21 dore ko mu Kwakira 2019 yari ku mwanya wa 133, Kayitare yagize ati : “Byaranshimishije  cyane byanyongereye imbaraga zo gukomeza gukora cyane.”

Kayitare uretse kuba ku mwanya wa 112 ku Isi, ni uwa 20 muri Afurika yose. Aha agira ati: “Intego mfite ni ugukomeza gukora cyane nkakomeza kuzamuka ku rutonde ku buryo naza mu bakinnyi 10 ba mbere muri Afurika kuko byampesha amahirwe yo kuzitabira imikino Olempike izabera Tokyo mu Buyapani umwaka utaha wa 2020.”

KAYITARE HARI IBYO YUNGUTSE KUVA ATANGIYE GUKINA TAEKWONDO

Kayitare avuga ko  inyungu ya mbere ari uko umukino wamufashije kumenyekana kandi ko ubu  hari abakiri bato bamufate nk’ikitegererezo.  Anavuga ko hari n’ibindi amaze kwigezeho mu buzima busanzwe abikesha gukina uyu mukino.

Akomeza avuga ko afite intego yo gukomeza gukina uyu mukino gusa  bagihura n’imbogamizi zo kutabona ubufasha buhagije ngo bitabire amarushanwa akomeye. Ati: “Twifuza ko twafashwa tukajya twitabira amarushanwa akomeye kandi bikomeje  twajya twitabira tukegukana imidari tugahesha ishema igihugu.”

Kayitare avuga benshi bazi ko umukino wa Taekwondo kimwe n’indi mikino njyarugamba  ari ukwiga kurwana ariko atari byo ahubwo ko uyu mukino wigisha  imyitwarire myiza.

Ati: “Nakundaga kurwana  ntaratangira  kuwukina ariko mbitangiye  byahise bishira kuko hari ibyo nigiyemo byinshi.”

Kayitare yakomeje agira ati :Mba naramenyereye gukubitwa dukina mu kibuga,  baragutsinda  ugataha nta kibazo ufite  nta bwo numva ko umuntu yakubwira ikintu kibi ngo urakare  kurusha ugukubita  ikintu ukababara ariko ukamworohera.”

Kayitare watangiriye mu ikipe ya IYF kuva muri 2012 ubu akaba ari umukinnyi wa Police kuva muri uyu mwaka wa 2019 avuga ko akiri muto agifite umwanya wo gukina ariko ko aramutse ahagaritse ikintu yakora ari ukuba umutoza.

Ati: “Ndabikunda cyane kandi narabitangiye kuko akenshi mu ikipe nazamukiyemo njyayo ngatoza kandi abana uba ubona babikunze.”

MU TUNTU N’UTUNDI

Kayitare Benoit avuga ko n’ubwo akina Taekwondo ajya akurikirana n’umupira w’amaguru kuko aho afana ikipe ya FC Barcelone muri Espagne naho mu Rwanda akaba akurikirana cyane ikipe ya Police FC.

Uretse gukina Taekwondo hari igihe ajya akina n’umukino wa Basketball mu rwego rwo kwishimisha kuko arawukunda.

Kayitare  avuga ko ku wa Gatatu no ku wa Kane buri cyumweru agomba kujya gusenga aho asengera muri  Good News Mission  Kimironko  aho yatangiriye gukina Taekwondo akaba ari naho ababyeyi be basengera.

Ubwo Kayitare Benoit (ibumoso) yari agiye gukina na Yahya wo muri Arabie Saudite muri shampiyona y’Isi 2019 yabereye mu Bwongereza

Kayitare Benoit ubu ari ku mwaya wa 112 ku Isi na 20 muri Afurika

Kayitare avuga ko n’ubwo Taekwondo ari umukino njyarugamba usa no kurwana abawukina bigiramo kwihangana no koroherana

Umwanditsi:

BUGINGO FIDELE

One Comment on “Taekwondo: Kuba mu bakinnyi 112 ku Isi byanteye gukomeza gukora cyane-Kayitare”

Tanga Igitekerezo

Email yanyu ntigaragazwa ku rubuga. Amazina na Email ni ngombwa.