20°C , Partly cloudy | Kigali-Rwanda

Taekwondo: Kayitare yazamutseho imyanya 21 ku rutonde rwa WTF

Yanditswe na Bugingo Fidèle

Ku ya 07-11-2019 saa 09:00:53
Kayitare Benoit uri ku mwanya wa 112 ku rutonde rw'Isi

Kayitare Benoit, usanzwe ari kapiteni w’ikipe y’igihugu mu mukino njyarugamba ukomoka muri Koreya “Taekwondo” yazamutseho imyanya 21 ku rutonde  rw’abakinnyi bakomeye ku Isi rukorwa n’ishyirahamwe ry’umukino wa Taekwondo ku Isi “World Taekwondo Federation (WTF)”.

Nk’uko bigaragara ku rutonde rw’uku kwezi k’Ugushyingo 2019, Kayitare Benoit ari ku mwanya wa 112 avuye ku wa 133 yariho mu kwezi gushize k’Ukwakira 2019.

Ni urutonde rukorwa buri kwezi  hagamijwe kwerekana uko abakinnyi bahagaze buri kwezi hagendewe ku bigwi byabo mu marushanwa bakinnye.

Kayitare Benoit yazamutseho imyanya 21 nyuma yo kwegukana umwanya 7 mu mikino yo ku rwego rw’Isi y’abasirikare yabereye i Wuhan mu Bushinwa mu mpera z’Ukwakira 2019.

Kayitare yari umwe mu bakinnyi batatu bari bahagariye u Rwanda muri iyo mikino ya Gisirikare akaba ari na we washoboye kwitwara neza kurusha abandi, dore ko umukinnyi w’Umunya-Brazil wamutsinze ari we wegukanye umudari wa Zahabu  mu kiciro cy’abari munsi y’ibiro 54.

Umwanditsi:

Bugingo Fidèle

Tanga Igitekerezo

Email yanyu ntigaragazwa ku rubuga. Amazina na Email ni ngombwa.