Kigali-Rwanda

Partly cloudy
18°C
 

Taekwondo: Ibihugu 10 ni byo bishobora kwitabira “Ambassador’s Cup 2018”

Yanditswe na BUGINGO FIDELE

Ku ya Aug 18, 2018

Tariki 06 na 07 Ukwakira 2018  hateganyijwe irushanwa “Ambassador’s Cup 2018” rizaba ribaye ku nshuro 6 rikaba ritegurwa n’ishyirahamwe ry’umukino wa Taekwondo mu Rwanda “RTF”  ku nkunga y’Ambasade ya Koreya mu  Rwanda.

Perezida w’Ishyirahamwe ry’umukino wa Taekwondo mu Rwanda, Bagabo Placide

Bagabo Placide, Perezida wa RTF nk’uko   abitangaza, iri rushanwa   rishobora kwitabirwa n’ibihugu 10 dore ko ubushize muri 2017 hari hitabiriye ibihugu 8.   Ibi bihugu akaba ari Tanzania, Uganda, Kenya, Sudani y’Epfo , RDC, Rwanda, Burundi,  Ethiopia, Sudani na Somalia.

Iri rushanwa nk’uko bisanzwe ryitabirwa n’abakinnyi  bari munsi y’imyaka 18 ndetse n’abakinnyi bakuru “Senior”.

Ubusanzwe iri rushanwa ribera kuri Sitade Nto Amahoro i Remera gusa kuva muri Gicurasi 2018 iyi Sitade yagombaga kuba yafunzwe kugira ngo hatangire imirimo yo kuyisana. Kugeza ubu iyi mirimo ntiratangira ndetse n’imikino imwe n’imwe irahabera. Perezida wa RTF, Bagabo avuga ko  komite ishinzwe gutegura iri rushanwa iri kuvugana n’ahantu habiri hashobora kubera iri rushanwa harimo Green Hills Academy i Nyarutarama ndetse no muri Camp Kigali.