Kigali-Rwanda

Partly cloudy
19°C
 

Taekwondo: Hagiye kuba irushanwa “Korean Ambassador’s Cup 2021”

Yanditswe na BUGINGO FIDELE

Ku ya 19-10-2021 saa 23:01:17

Mu mpera z’iki cyumweru taliki 23 na 24 Ukwakira 2021, ishyirahamwe ry’umukino wa Taekwondo mu Rwanda “RTF” ku bufatanye na Ambasade ya Korea mu Rwanda bateguye irushanwa ngarukamwaka “The Korean Ambassador’s Cup Championships 2021” rizaba rikinwa ku nshuro ya munani kuko ryatangiye gukinwa bwa mbere mu 2013.

Ni irushanwa rizakinwa  hubahirizwa ingamba zo kwirinda ikwirakwira ry’icyorezo cya COVID-19. Irushanwa rizabera muri Sitade Nto Amahoro i Remera.

Ubusanzwe iri rushanwa ryari risanzwe ari mpuzamahanga kuko  ryitabirwaga n’amakipe yo mu bihugu byo hanze ndetse ikipe ikandikisha abakinnyi bose ishaka gusa uyu mwaka  rizitabirwa n’abakinnyi b’imbere mu gihugu kandi buri kipe yandikishe  umukinnyi umwe muri buri cyiciro (Category) hagamijwe kwirinda ubucucike mu irushanwa.

Ni irushanwa rizakinwa muri Kyorugi “Kurwana” ku ngimbi n’abangavu n’abakuze mu bagabo n’abagore, abazaba biyandikishije aha bakaba ari bo bazemererwa kurushanwa no mu myiyereko “Poomsae” mu gihe abana (Cadets) bo bazarushanwa muri “Poomsae” gusa.

Irushanwa rizakinwa mu buryo bukurikira

Abagabo: Abatarengeje ibiro 58 (U-58kg), Abatarengeje 68 (U-68kg) n’Abari hejuru y’ibiro 68 (Above 68kg)

Abagore:  Abatarengeje ibiro 49 (U-49kg), Abatarengeje 57 (U-57kg) n’Abari hejuru y’ibiro 57 (Above 57kg)

Ingimbi: Abatarengeje ibiro 48 (U-48kg), Abatarengeje 55 (U-55kg) n’Abari hejuru y’ibiro 55 (Above 55kg)

Abangavu: Abatarengeje ibiro 44 (U-44kg), Abatarengeje 49 (U-49kg) n’Abari hejuru y’ibiro 49 (Above 49kg)

Abana (Cadets): Bazarushanwa mu myiyereko (Poomsae) gusa.

Abakinnyi n’amakipe bazaba bahize abandi mu irushanwa bazahabwa imidari n’ibikombe, ndetse banahabwe ibindi bihembo birimo telefoni zigezweho  n’ibikoresho bya Taekwondo.

Irushanwa  “Korean Ambassador’s Cup” ryaherukaga gukinwa mu 2019, umwaka ushize wa 2020 rikaba ritarakinwe bitewe n’icyorezo cya COVID-19. Irushanwa riheruka ryari ryegukanywe n’ikipe ya Paradisso TC yo muri Kenya, ikurikirwa na Dream TC   na Police TC.

Taekwondo: Bishimiye uko irushanwa “Korean Ambassadors Cup 2019” ryagenze

Ndacyayisenga Aline ukinira  Police TC  ni we wari wahize abandi mu cyiciro cy’abagore  naho mu bagabo, Francis Ngugi Mulwa  (Kenya) aba ari we witwara neza.

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.