SMAP yafashije amakoperative y’abahinzi b’umuceri n’imboga kongera urwunguko inshuro zirenga 3

Yanditswe na Ntawitonda Jean Claude

Ku ya 25-09-2019 saa 08:42:11
Impuguke z'Abayapani zafashije amakoperative guhinga kinyamwuga

Umushinga w’ubuhinzi buhingira isoko (SMAP/Smallholder Market-oriented Agriculture Project) umaze guhindura imikorere y’abahinzi b’imboga n’ab’umuceri bibumbiye mu makoperative bo mu turere 12 tw’u Rwanda.

Abahinzi bavuganye n’Imvaho Nshya batanga ubuhamya bw’uko umusaruro wabo wiyongereye nyuma yo kongererwa ubumenyi, bakamenya uko bahinga kinyamwuga bahingira isoko bamaze kubona.

SMAP ni umushinga ufasha abahinzi bato guhinga bahingira isoko mu Rwanda. Umushinga watangiye ibikorwa byawo mu kwezi k’Ukwakira 2014. Ni umwe mu mishanga y’iterambere Ikigo cy’Abayapani kigamije ubutwererane mpuzamahanga (JICA) gikorera mu Rwanda.

Abahinzi b’imboga, imbuto ndetse n’ab’umuceri mu turere 12 bigishijwe guhingira isoko

Mu myaka 5 ishize, SMAP yafatanyije n’inzego zitandukanye mu guhindura abahinzi nyarwanda ab’umwuga, yibanda ku kubahugura no kubaha rugari mu gushyira mu bikorwa ubumenyi bahawe.

Uyu mushinga wakoranye n’abahinzi b’imboga barenga 22,000 bibumbiye muri koperative 232, n’ab’umuceri barenga 8,900 bibumbiye muri koperative 22.

Abahinzi bigishijwe uko bashobora guhingira isoko aho gutegereza kuribona nyuma yo gusarura, uko bakora ubushakashatsi ku masoko y’ibihingwa bateganya guhinga n’uko barema umubano mwiza n’abaguzi babonye.

Bigishijwe kandi guhinga kijyambere kugira ngo umusaruro wabo ube wujuje ubuziranenge bukenewe ndetse n’akamaro k’uburinganire n’ubwuzuzanye hagati y’abagore n’abagabo mu mwuga w’ubuhinzi.

Ibi byatumye amafaranga yinjizwa n’umusaruro w’ubuhinzi bw’umuceri n’ubw’imboga yikuba inshuro zirenga eshatu nk’uko bitangazwa na Dr. Bucagu Charles, Umuyobozi Mukuru wungirije ushinzwe ubushakashatsi n’ikoranabuhanga mu buhinzi mu Kigo k’Igihugu gishinzwe Iterambere ry’Ubuhinzi n’Ubworozi (RAB).

Ati: “Abahinzi bamenye uko bashaka isoko, uko baganira n’umuguzi, n’uko bamushakira umusaruro umunogoye. Bigaragara ko babonye urwunguko rukubye gatatu urwo bari basanzwe babona, hari abandi benshi bagiye babona bagenzi babo bagera ku musaruro mwiza, na bo basaba guhugurwa n’uyu mushinga.”

Abahinzi b’umuceri bishimira impanuro bahawe zatumye bongera umusaruro

Ubuhamya bw’abahinzi biteje imbere

Abahinzi bungukiye ku mushinga SMAP baravuga imyato ibyo wabagejejeho.

Munyabugingo Bonavanture wo mu Murenge wa Musaza, Akarere ka Kirehe: “Ndi umunyamuryango wa Koperative ‘Duhinge Imboga’ ifite abanyamuryango bagera ku 120. Umushinga SMAP watugejeje kuri byinshi kuko utangira kuduhugura wasanze tutazi guhinga imboga neza, n’uwazihingaga akazihinga mu kajagari. SMAP ije yaduhuguye guhinga kinyamwuga.

Ku bijyanye n’ibaruramari, mbere twapfaga kubara uko tubonye, wasarura ukaba utazi ibyo wungutse, ariko SMAP yaduhuguye kubara igishoro n’inyungu tukamenya ko twungutse cyangwa ko twahombye.

Twahawe amahugurwa menshi y’uburinganire tumenya ko abagore bashoboye, dufatanya ubuhinzi ibintu birushaho kugenda neza cyane. Ubu twamaze kumenya ko tugomba guhingira isoko kuko bituma tugira umwete wo gukoresha ingufu zose ngo turihaze.”

Uzamukunda Marceline wo mu Murenge wa Muko, Akarere ka Musanze: “Dukorera muri ‘Koperative Twiteze Imbere Sangano, igizwe n’abanyamuryango 30 b’abagore, turi abahinzi b’imboga z’amashu n’imiteja na broccoli.

Iyi koperative imaze imyaka 12, imyaka itanu tumaze dukorana na SMAP twamenye guhinga kuri gahunda, kongera umusaruro dukoresheje ifumbire y’imborera n’ifumbire mvaruganda, kandi dusanga inyungu twabonaga mu musaruro yariyongereye cyane bituma twiteza imbere mu miryango yacu.

Twahuguwe na SMAP ko tugomba guhingira isoko, tugira ubufatanye n’Akarere ka Musanze mu kudushakira abaguzi. Uyu mushinga ndawushimira ko watwigishije kugemeka ingemwe, guhinga no gusarura kinyamwuga. Tekiniki z’uyu mushinga ni nziza cyane.”

Mbonyumugaragu Ananias wo mu Murenge wa Macuba Akarere ka Nyamasheke: “Ndi umuhinzi w’imboga mu gishanga cya Ntangara, maze imyaka 5 mbonanye n’Umushinga SMAP. Nge na Koperative nkoreramo duhinga karoti, beterave, intoryi, amashu n’ibindi, kandi byose tubikora neza kinyamwuga. Mbere twakoraga ubuhinzi bwa gakondo, ariko aho Abayapani baziye batwigishije guhinga dushaka isoko, bituma tumenyana n’abantu benshi batugurira umusaruro.

Tumaze kugera kure ku buryo twiguriye n’imashini yuhira imboga tukazihinga mu gihe k’izuba kuko ari ho ziba zifite amafaranga. Ubu dufite amatungo tworozanyije, dufite ikibanza tugomba kubakamo inzu yo kubikamo umusaruro, dufite ubwo bumenyi n’ibindi byinshi twungutse.”

Musabyemariya Josephine wo mu Murenge wa Macuba Akarere ka Nyamasheke: “Dukorera muri Koperative ‘Turwanye Imirire Mibi Macuba Twiteza Imbere’, duhinga imiteja, beterave, ibitunguru na karoti. Koperative yacu igizwe n’abantu 34 harimo abagore 28.

Nyuma yo guhugurwa umusaruro wiyongereye ku buryo bufatika, abanyamuryango babibonyemo inyungu nyinshi kuko hari abubatse inzu abandi bagura amatungo n’ibindi bikorwa by’iterambere. Aho twahingaga kuri ari 2 tugasarura ibiro 200 by’ibitunguru, ubu dusigaye dusaruraho ibiro birenga 600.”

Umusaruro w’abahinzi b’umuceri wiyonereye ku rwego rushimishije

Leta y’u Rwanda yishimiye kwegurirwa ibikorwa by’uyu mushinga

Minisiteri y’Ubuhinzi n’Ubworozi (MINAGRI) yatangaje ko Leta y’u Rwanda yishimiye kwegurirwa ibikorwa by’umushinga SMAP bikazakomeza gushyirwa mu bikorwa no kwagurwa mu Gihugu hose binyuze muri RAB.

Umunyamabanga Uhoraho muri Minisiteri y’Ubuhinzi n’Ubworozi (MINAGRI) Musabyimana Jean Claude, yagize ati: “Umushinga SMAP waje nk’igisubizo, twizeye ko RAB izakomeza gushyira mu bikorwa uyu mushinga kuko wagaragaje ko ufite ubushobozi bwo kugabanya ibibazo byo kubura amasoko y’umusaruro n’iby’ubumenyi buke ku buhinzi bw’umwuga.”

Dr. Bacagu Charles, Dr. Bucagu Charles, Umuyobozi Mukuru wungirije ushinzwe ubushakashatsi n’ikoranabuhanga mu buhinzi muri RAB na we yunzemo ati: “Izi nyigisho twashyize no mu mpapuro tuzazigira kimwe mu byo dukoresha mu iyamamazabuhinzi mu Gihugu hose.”

Umuyobozi w’Umushinga SMAP mu Rwanda Michio Goto, ahamya ko RAB izawushyira mu bikorwa neza kuko imaze imyaka ibiri iwegurirwa buhorobuhoro, hakanahugurwa abagoronome mu turere n’imirenge bazakomeza kugera ku bahinzi benshi bashoboka mu Gihugu.

Yagize ati: “Uyu mushinga ntiwazamuye urwunguko gusa ahubwo wongereye n’ubumenyi bw’abahinzi. Ku bufatanye bwa MINAGRI, RAB n’inzego z’ibanze uyu mushinga uzakomeza gutanga umusaruro urenze uwo watanze mu myaka itanu ishize.”

SMAP ni umwe mu mishinga itandukanye Leta y’u Buyapani ikora ibinyujije mu Kigo cy’Abayapani kigamije ubutwererane mpuzamahanga (JICA) mu Rwanda mu rwego rwo gushimangira umubano ibihugu byombi bifitanye.

Ambasaderi w’u Buyapani mu Rwanda Takayuki Miyashita, yatangaje ko Leta y’u Buyapani izakomeza uyu mubano mu mishinga itandukanye inyuzwa muri JICA.

Umwanditsi:

Ntawitonda Jean Claude

Tanga Igitekerezo

Email yanyu ntigaragazwa ku rubuga. Amazina na Email ni ngombwa.