Sitade ya Rayon Sports izubakwa  ku buso bwa hegitari 13,5

Yanditswe na BUGINGO FIDELE

Ku ya 13-11-2019 saa 18:30:07
Perezida wa Rayon Sports, Munyakazi Sadate uvuga ko babanje gukora inyigo ya Sitade kugira bemenye uko aho izubakwa hangana

Perezida w’ikipe ya Rayon Sports, Munyakazi Sadate  ubwo yatorerwaga kuyobora iyi kipe muri Nyakanga 2019 yatangaje ko mu bikorwa by’ibanze yumva azakora mu myaka 2 ari ugutangiza igikorwa cy’uko Rayon Sports  yakwiyubakira Sitade yayo.

Kuri uyu wa Gatanu tariki 15 Ugushyingo 2019, ubuyobozi bwa Rayon Sports bwateguye igikorwa “Rayon Sports Day” kigamije kugaragaza  ibikorwa bitandukanye  harimo no kwerekana igishushanyo mbonera cya Sitade   bashaka kwiyubakira “Gikundiro Stadium” yaba iri ku rwego rwo kwakira abantu barenga ibihumbi 60.

Mu kiganiro n’abanyamakuru cyabaye tariki 12 Ugushyingo 2019, Perezida w’ikipe ya Rayon Sports, Munyakazi Sadate  yagize ati: Ni byo  tuzerekana igishushanyo mbonera cya Sitade  Gikundiro, inyigo yararangiye, tuzaboneraho umwanya wo kukereka abafana n’abakunzi b’umupira w’amaguru  muri rusange.”

Iyi Sitade izubakwa he?

Kugeza ubu ubuyobozi bw’ikipe ya Rayon Sports nta bwo buratangaza aho iyi Sitade izubakwa ariko bafite ikizere ko bazahabona mu minsi ya vuba.

Perezida wa Rayon Sports, Munyakazi Sadate yagize ati: Uyu ni umushinga umaze igihe kuva muri 2003 aho bakomeje kwiyegeranya. Dufite isezerano rya Perezida w’ u Rwanda, Paul Kagame twizera ko tuzabonamo ibishoboka byose birimo n’ubwo butaka.”

Munyakazi yavuze ko gukora inyigo bidasaba ko waba ufite ubutaka ahubwo ko iyo nyigo ikwereka ubutaka uzakenera uko bungana. Ati:Sitade yacu twifuza kubaka izajya ku buso bwa hegitari 13,5.”

Yakomeje agira ati: Ibi twabikoze kugira ngo n’uwatwemereye ubutaka tuzagende tumubwira ngo dukeneye ikibanza kingana gutya.”

Muri Kamena 2019 ni bwo ikipe ya Rayon Sports yasinye amasezerano   y’ubufatanye na MK Sky Vision na Sosiyete icuruza ibikomoka kuri peterori  “MOGAS”  aho  abakunzi b’iyi kipe ku mafaranga bazajya bakoresha  bagura risansi na mazutu  hari azajya ahabwa iyi kipe. Nyuma y’aho iyi kipe yasinye amasezerano n’abandi bafatanyabikorwa barimo Gas Oil, RITCO na La Palisse Hotel byose bigamije gushaka amikoro yazatuma  Rayon Sports yiyubakira Sitade.

Uyu mushinga nuramuka ushyizwe mu bikorwa, ikipe ya Rayon Sports ni yo izaba ibashije kwiyubakira Sitade yayo kuko mu Rwanda nta yindi kipe  kugeza ubu ifite sitade.

Umwanditsi:

BUGINGO FIDELE

One Comment on “Sitade ya Rayon Sports izubakwa  ku buso bwa hegitari 13,5”

Tanga Igitekerezo

Email yanyu ntigaragazwa ku rubuga. Amazina na Email ni ngombwa.