Kigali-Rwanda

Partly cloudy
23°C
 

Shampiyona y’u Rwanda izasubukurwa muri Gashyantare 2018

Yanditswe na admin

Ku ya Jan 3, 2018

Shampiyona  y’ikiciro cya mbere y’umupira w’amaguru mu Rwanda, tariki 27 Ukuboza 2017 ubwo hasozwaga imikino y’umunsi wa 10 yahise isubikwa kuko ikipe y’u Rwanda igomba kwitabira imikino  ya nyuma ya CHAN 2018 izabera muri  Maroc  kuva  tariki 13 Mutarama kugeza  04 Gashyantare  2018.

Nk’uko tubikesha urubuga rw’ishyirahamwe ry’umupira w’amaguru mu Rwanda “FERWAFA”, shampiyona y’ikiciro cya mbere izasubukurwa tariki 06 na 07 Gashyantare 2018 hakinwa imikino y’umunsi wa 11.

Mu mpera za 2017, Rayon Sports yatsinze APR FC imikino ibiri yikurikiranya

Imikino izaba kuri uyu munsi irimo umukino ukomeye cyane uzahuza ikipe ya Rayon Sports yegukanye shampiyona iheruka ya 2016-2017   izakira ikipe ya APR FC isa n’aho mu mpera z’umwaka wa 2017 yayifatiye, kuko Rayon Sports yayitsinze imikino ibiri yikurikiranya. Kuri ubu  APR FC iri ku mwanya wa 3 n’amanota 17 naho Rayon Sports ikaba ku mwanya wa 4 n’amanota 15 n’umukino w’ikirarane.

Aya makipe nyuma yo gukina uyu mukino hagati yayo azahita yitabira imikino y’Afurika  aho Rayon Sports  izahura na LLB yo mu  Burundi mu mikino y’amakipe yabaye aya mbere iwayo “CAF Champions League 2018”   naho APR FC igahura na Anse Réunion  yo muri Seychelles mu mikino y’amakipe yitwaye  neza iwayo “CAF Confederation Cup 2018”. Imikino ibanza izaba hagati  ya tariki 9–11 Gashyantare 2018  naho imikino yo kwishyura ibe hagati ya tariki 16–18 Gashyantare 2018.

Ku rundi ruhande ikipe ya Kiyovu iyoboye shampiyona izakira Bugesera FC naho AS Kigali  iri ku mwanya wa kabiri ku rutonde  yakire Kirehe FC mu gihe Police FC izaba yasuye Marines FC i Rubavu.

Nyuma y’imikino y’umunsi wa 10 ari nayo yasoje umwaka wa 2017, Kiyovu irayoboye n’amanota 20, ikurikiwe na AS Kigali n’amanota 18 hakaza, APR FC n’amanota 17 na Rayon Sports n’amanota 15 naho ku mwanya wa nyuma wa 16 hari Espoir FC n’amanota 8.

BUGINGO FIDELE