16°C , Intermittent clouds | Kigali-Rwanda

Shampiyona y’u Rwanda igiye gusubukurwa hakinwa imikino y’umunsi wa 4

Yanditswe na BUGINGO FIDELE

Ku ya 19-10-2019 saa 22:53:05
Rayon Sports na Bugesera FC ni wo mukino w'umunsi wa 4 utegerejwe cyane

Tariki 20-10-2019

Heroes FC-AS Muhanga (Nyamata-15h00)

Sunrise FC-Espoir FC (Nyagatare-15h00)

Musanze FC-Kiyovu (Musanze-15h00)

Gicumbi FC-Mukura (Mumena-15h00)

Tariki 22-10-2019

Gasogi United-Police FC (Mumena-15h00)

Marines FC-APR FC (Rubavu-15h00)

Rayon Sports -Bugesera (Nyamirambo-18h00)

Tariki 23-10-2019

Etincelles FC-AS Kigali (Rubavu-15h00)

Nyuma y’aho shampiyona y’ikiciro cya mbere yari yasubitswe kugira ngo ikipe y’igihugu yitegure, kuri iki Cyumweru tariki 20 Ukwakira 2019, imikino irakomeza aho igeze ku munsi wa 4.

Mu mikino iteganyijwe, ikipe ya Heroes FC yazamutse mu kiciro cya mbere uyu mwaka irakira ikipe ya AS Muhanga. Ikipe ya Heroes FC kugeza ubu nyuma y’imikino 3 ntirabasha kubona amanota 3 mu gihe AS Muhanga yatsinze umukino umwe ikanganya imikino 2.

Mu yindi mikino, Sunrise FC irakira Espoir FC, Musanze FC yakire Kiyovu naho Gicumbi FC itarabona inota na rimwe  ikine na Mukura.

Indi mikino iteganyijwe

Shampiyona izakomeza tariki 22 Ukwakira 2019 ahateganyijwe imikino 3. Ikipe ya Gasogi United izakira Police FC kuri Sitade Mumena. Gasogi United mu mikino 3 iheruka yatsinze umukino umwe inganya 2 bivuze ngo iri ku mwanya wa 8 n’amanota 5. Ku rundi ruhande Police FC iri ku mwanya wa 3 n’amanota 7 aho yatsinze 2 ikanganya umwe.

Kuri uyu munsi kandi ikipe ya Marines FC izakira APR FC i Rubavu. Izi kipe zombi zihuje byinshi dore ko ari ikipe za gisirikare zigiye guhura APR FC iyoboye urutonde mu gihe Marines FC iri ku mwanya wa 10 n’amanota 4

Undi mukino w’umunsi wa 4 utegerejwe ni ugomba guhuza ikipe ya Rayon Sports   izakira ikipe ya Bugesera FC, umukino uzabera kuri Sitade ya Kigali i Nyamirambo saa kumi n’ebyiri z’umugoroba (18h00).

Uyu mukino ntabwo uzaba woroshye ku mpande zombi dore ko ikipe ya Bugesera FC yiyubatse aho afite abakinnyi bakomeye barimo Shaban Hussein Tchabalala wanakiniye Rayon Sports, Mashingilwa Kibengo Jimmy, Mustafa Francis n’abandi.

Gusa mu myaka 4 ishize kuva ikipe ya Bugesera FC yazamuka mu kiciro cya mbere imaze gukina na Rayon Sports imikino 8. Muri iyi mikino Rayon Sports yatsinzemo 6, umukino umwe izi kipe ziranganya undi Bugesera FC irawutsinda.

Kuri ubu Rayon Sports iri ku mwanya wa kabiri n’amanota 7 naho Bugesera FC iri ku mwanya wa 9 n’amanota 4.

Umukino uzasoza iy’umunsi wa 4 wa shampiyona uzahuza ikipe ya Etincelles FC izakira AS Kigali. Umukino uzabera i Rubavu tariki 23 Ukwakira 2019.

Mbere y’imikino y’umunsi wa 4, APR FC irayoboye n’amanota 7 inganya na Rayon Sports na Police FC naho Gicumbi FC ikaba iya nyuma ku mwanya wa 16 aho nta nota na rimwe ifite.

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.