Kigali-Rwanda

Partly sunny
26°C
 

Shampiyona y’ikiciro cya mbere izatangira APR FC ihabwa igikombe

Yanditswe na Bugingo Fidele

Ku ya 05-10-2018 saa 18:38:15
APR FC izakina umukino ufungura shampiyona ya 2018-2019 ikina n'Amagaju FC inashyikirizwe igikombe cya shampiyona ya 2017-2018

Shampiyona y’ikiciro cya mbere mu mupira w’amaguru umwaka w’imikino wa 2018-2019 “Azam Rwanda Premier League 2018-2019” biteganyijwe ko izatangira tariki 19 Ukwakira 2018 aho ikipe ya APR FC izashyikirizwa igikombe cya shampiyona iheruka ya 2017-2018.

APR FC izakina umukino ufungura shampiyona ya 2018-2019 ikina n’Amagaju FC inashyikirizwe igikombe cya shampiyona ya 2017-2018

Nk’uko tubikesha ishyirahamwe ry’umupira mu Rwanda “FERWAFA”, umukino w’umunsi wa mbere uzafungura shampiyona uzaba tariki 19 Ukwakira 2018 uhuze ikipe ya APR FC n’Amagaju FC kuri Sitade ya Kigali i Nyamirambo.

Kuri uyu mukino uzaba ari wo wonyine, ikipe ya APR FC izashyikirizwa igikombe cya shampiyona ya 2017-2018 yegukanye ariko ntigishyikirzwa kuko umukino w’umunsi wa nyuma wabaye igomba kwitabira imikino ya CECAFA muri Tanzania.

Indi mikino y’umunsi wa mbere izaba tariki 20 Ukwakira 2018 aho Etincelles FC izakira Rayon Sports, Gicumbi FC yakire Espoir FC, Mukura yakire Sunrise FC naho Kirehe FC yakire Kiyovu. Tariki 21 Ukwakira 2018, AS Muhanga izakina na Police FC, AS Kigali ikine na Musanze FC naho Marines FC yakire Bugesera FC.

Kuri gahunda y’imikino ya shampiyona, tariki 12 Ukuboza 2018, ikipe ya APR FC izakira Rayon Sports kuri Sitade ya Kigali i Nyamirambo (18h00) naho umukino wo kwishyura uzabe tariki 24 Mata 2019.

Biteganyijwe ko nta gihindutse shampiyona y’ikiciro ya 2018-2019 yarangira tariki 08 Kamena 2019.

APR FC yegukanye shampiyona ya 2017-2018 izahagararira u Rwanda mu mikino y’Afurika y’amakipe yabaye aya mbere iwayo “Total CAF Champions League 2018-2019” naho Mukura yegukanye igikombe cy’Amahoro ihagararire u Rwanda mu mikino y’Afurika y’amakipe yitwaye neza iwayo “Total CAF Confederations Cup 2018-2019”.

Umwanditsi:

Bugingo Fidele

Tanga Igitekerezo

Email yanyu ntigaragazwa ku rubuga. Amazina na Email ni ngombwa.