21°C , Partly sunny | Kigali-Rwanda

Rusizi: Abanyekongo n’Abarundi bashima ibitaro bya Gihundwe

Yanditswe na Rutayisire Emile

Ku ya 13-01-2020 saa 19:21:17
Dr. Nshizirungu Placide uyobora ibitaro bya Gihundwe

Usibye Abanyarwanda bivuriza mu Bitaro bya Gihundwe, hari abanyamahanga bishimira ubuvuzi bahabwa mu bitaro bya Gihundwe kubera urwego biriho  mu mikorere ugereranyije n’uko babona ubuvuzi iwabo.

Imvaho Nshya yaganiriye na bamwe mu Banyekongo baturuka muri Repubulika Iharanira Demokarasi ya Kongo, DRC ndetse n’Abarundi bivuriza mu bitaro bya Gihundwe bagira icyo bayitangariza.

Mutombo Dikembe Jordan atuye muri Komini ya Kadutu muri DRC avuga ko kwivuriza mu Rwanda ari kimwe muri serivisi akunda Igihugu gifite kandi abona Leta y’u Rwanda yitaho.

Agira ati, “N’ubwo ntuye muri Kongo ntabwo njya mpivuriza ndetse n’abo mu muryango wanjye ntabwo ariho mbavuriza bose mbavuriza mu Rwanda. Nkunda ko mu bitaro bya Gihundwe bakora vuba, kandi ngasanga ubuvuzi budahenze. Hari ibikoresho bigezweho ku buryo usanga atari ngombwa kujya mu bindi bihugu bya kure”.

Akomeza avuga ko yarwaje mukuruwe arwaye y’impyiko kadi agomba gukorerwa ibyo bita “dialyse”, asanga ku bitaro bya Gihundwe bafite ibikoresho bigezweho ku buryo bamuvuye. Ati, “Mbona Leta yanyu yita ku baturage bayo kuko no mu mavuriro mato yo mu Rwanda nabonye babakurikirana bakamenya imikorere yayo.

Christine Muambe akomoka muri Komini ya Bagira, avuga ko akunda kwivuriza mu Rwanda mu bitaro bya Gihundwe kubera ko bagira serivisi yihuta kandi akaba yizeye ubuvuzi bwaho.

Agira ati, “Iyo mfashwe n’indwara nihutira kujya ku bitaro bya Gihundwe ku Kigo nderabuzima cyaho kuko mba nzi neza ko ndi bubone ubuvuzi bwihuse kandi n’iyo banyohereje mu bitaro mba nzi neza ko mpita mvurwa kandi neza.”

Akomeza avuga ko u Rwanda rufite Perezida wita ku buzima bw’abaturage nk’uko yita ku mutekano w’abaturage be.

Kayembe Kabukura ni umukongomani ukorera mu Rwanda agataha i Bukavu ariko akomoka muri Komini ya Ibanda avuga ko akunda mu Rwanda kubera ko nta ruswa ihari.

Agira ati, “Ahandi ugera aho bakwakirira ugasanga bagutinza kugira ngo ubahe ruswa kugira ngo bakwakire vuba cyangwa ngo ubonane na muganga vuba. Mu Rwanda ntabwo bibaho kuko abarwayi babakira bakurikije uko baje bakurikirana kandi serivisi ikihuta”.

Akomeza avuga ko usibye ruswa itaba mu Rwanda yishimira ko mu Rwanda usanga hari ibikoresho byifashishwa mu buvuzi, ubona bikiri bishya mu gihe aho atajya kwivuriza usanga hari ibikoresho bya kera ndetse bitagezweho.

Ntahoturi Antoine na Karirekinyana Anne ni Abarundi baturuka mu Ntara ya Bujumbura Rural (Icyaro) muri Komini ya Mukike bakunze kwivuriza mu bitaro bya Gihundwe kubera serivisi nziza bahabwa.

Aba bombi bahuriza ku kuba Ivuriro rya Gihundwe rifite ibikoresho bigezweho kandi kuvurwa bikihuta. Karirekinyana agira ati, “Mu Rwanda hari ibikoresho kandi bavura indwara zikomeye nk’impyiko, umwijima n’izindi kandi ugasanga bafite ibikoresho byo kukuvura batakohereje ahandi”.

Akomeza ashima uburyo Abanyarwanda bakira abarwayi agasanga ari isomo ibihugu bimwe na bimwe  bya Afurika byagombye kwigira ku Rwanda.

Biribuze Simon Pierre ni Umurundi atuye mu Karere ka Rusizi avuga ko serivisi z’ubuvuzi mu Rwanda zateye imbere  ariko agashima uburyo abakozi b’ibitaro bakira abarwayi.

Agira ati, “Nivurije mu bihugu byinshi bya Afurika ariko uko mbona ubuvuzi mu Rwanda mbona bwarateye imbere. Mu myaka yashize ntabwo abarwayi bakirwaga neza ariko kuri ubu ugera kwa muganga ukabona umuntu arakwegereye akakubaza serivisi ukeneye ku buryo niyo wayobye ahita akuyobora muri serivisi ukeneye”.

Akomeza avuga ko kuba ibitaro byareguriwe Akarere nabyo byagize akamaro kuko bikurikiranirwa hafikandi imikorere yabyo ikamenyekana. Ikindi avuga n’uko Abanyarwanda basigaye bavuga ikitabashimishije kandi iyo bigaragaye ntihabeho kwikosora uwakosheje arabihanirwa.

Ubuyobozi bw’ibitaro bya Gihundwe busanga kuba ibitaro byaraguwe, bigahabwa ibikoresho bishya kandi bigezweho, hakiyongeraho gutanga serivisi nziza aribyo bituma bikundwa kuganwa n’abanyamahanga kandi bataha bakagenda babivuga neza.

Dr Nshizirungu Placide uyobora Ibitaro bya Gihundwe agira ati” Ibitaro bya Gihundwe bifite intego yo gutanga ubuvuzi bufite ireme, gukurikirana imikorere y’ibigo nderabuzima ibitaro bishinzwe, guhugura abakozi b’ibitaro ndetse n’ab’ibigo nderabuzima no gukumira, kugenzura no kurwanya indwara z’ibyorezo.”

Akomeza avuga ko iyo mikorere ariyo ituma abanyamahanga baza kwivuriza mu Rwanda badakukurikiye gusa ubuvuzi bwo mu bitaro bya Gihundwe ahubwo ko aho bivurije hose usanga bahashima.

Dr. Nshizirungu agaruka ku bintu bituma Abanyarwanda n’abanyamahanga bakunda kwivuriza mu bitaro bya Gihundwe agira ati” Usibye umubare w’abaganga, abaforomo ndetse n’ababyaza nabo barongerewe. Ubu ibitaro bya Gihundwe bitanga services z’ubuvuzi bw’inzobere mu ndwara z’ababyeyi (Gyneco-obstetrique), indwara z’abana (pédiatrie), indwara zo kubaga (Chirurgie), indwara zo mu mubiri (Médecine Interne) n’indwara z’impyiko (Nephrologie et dialyse)”.

Ikindi avuga gikurura abantu ni Service ya laboratoire yongerewe ubushobozi mu bumenyi, abakozi n’ibikoresho bihambaye. Hashyizweho kandi na service yo gukurikirana no kuvura abarwayi bafite indwara z’akarande zitandura (NCDs: No Communicable Diseases).

Abajyanama b’ubuzima na bo batuma serivise zitangwa neza

Mu rwego rwo kugabanya ubwiyongere bwa Malaria n’indwara zifata abana hashyizweho gahunda yo kuvurira abaturage mu mbaga nyarwanda ( Communauté ) bikozwe n’abajyanama b’ubuzima babihuguriwe.

Ku bigendanye no gukumira indwara, mu rwego rwo gukingira abana ndetse n’abakuru; hatangijwe inkingo nshya zitari zisanzwe zikoreshwa za Roubeole, Rotavirus, HPV (rwo kurinda abana b’abakobwa Cancer y’inkondo y’umura) , fièvre jaune ndetse n’urukingo rwa Hepatite B.

Hatangijwe kandi na service nshya yo gupima cancer y’inkondo y’umura na cancer y’amabere, hashyirwaho komite ishinzwe by’umwihariko gukumira ibyorezo, hanatangizwa  gahunda yo gupima ibimenyetso bya Ebola abinjira mu Gihugu bavuye muri DRC hakoreshejwe ibikoresho byabigenewe bigezweho.

Nyiramana Odette ni umurundikazi avuga ko iyo agiye kubyara aza kubyarira mu Rwanda. Agira ati” Buri gihe iyo ngiye kubyara nza kubyarira mu Rwanda kubera ko mba nizeye ubuvuzi bwaha”.

Dr. Nshizirungu avuga ko kuba hari banyamahanga baza kubyarira mu Rwanda ari uko ibitaro byungutse inyubako nshya nini y’igorofa ijyanye n’igihe yo kubyariramo no kwita ku mpinja (Maternité et Néonatologie).

Agira ati” Si iyo nyubako gusa kuko hari n’abaganga b’inzobere mu kubyaza. Hari kandi n’inyubako nshya ikorerwamo ubuvuzi bw’inzobere (Services spécialisés) ; inyubako nshya yakira indembe (urgence); inyubako nshya y’ahakorerwa ubugororangingo (Physiotherapie) n’inyubako nshya y’ahatwikirwa imyanda”.

Akomeza avuga ko ibyo byose ari byo bikurura abanyamahanga kuko akenshi usanga izo serivisi iwabo kuzibona bibagora.

Umwanditsi:

Rutayisire Emile

Tanga Igitekerezo

Email yanyu ntigaragazwa ku rubuga. Amazina na Email ni ngombwa.